Popular Bible Verses from نامَه وَ کِلیسِی فیلیپی‌ 2

Share

هیچ کاری نَه وَ ری غُت بییَن وِ غِدی نَکِنیت، بَلکَم بِی کوچِک‌نظمی بَقیَه نَه وَ خِتون بِختَر بِیونیت. هیچ کویَکی وَ ایشا تِنا وَ فکرِ نفعِ خُوش نَبو، بَلکَم وَ فکرِ بَقیَه هَم بو.

هَمو فکرَ داشتَه بِیت که مسیح عیسی داشت

وِّ که هَرچَن بِی خدا هُم‌شکل بی، دِدَسی نَچَسبی وَ برابریِ بِی خدا، بَلکَم خِشَه خالی کِه شکلِ غلامی وَ خُوش گِرُت، وَ شباهتِ آیَمَل دَراومَه. وِ وختی که وَ شکلِ بشر دَراومَه خِشَه کوچِک‌نظم کِه وِ تا وَ مُردَن، حتی مُردَن وَ ری صلیب مطیع وابی.

سی‌یِکِه خدایَه که سی خشنودیِ خُوش مِنِه ایشا کار ایکِنِه، هَم مِنِه ارادَه وِ هم مِنِه عمل.

پَ خدا وِّ نَه مَهلی بِلَند کِه وِ نومی بالاتَر وَ تَمومِ نومَل وَش بَخشی، تا وَ نومِ عیسی هر زونی‌ای خَل وابو، مِنِه آسمون، ری زمین وِ زِرِ زمین، وِ هر زُوونی اعتراف کِنِه که عیسی مسیح "خداوندِه"، سی جلالِ خِدِی بُو.

تَمومِ کارَلَه بی غُرَغُر وُ یِکِه‌وَدو اَنجوم بِئیت، تا بی‌عیب وِ سادَه‌دل، اولادَلِ بی‌عیبِ خدا بِیت، مابینِ نسلی فاسد وُ ناخَلَف که مابینِشون مِی نور مِنِه ای دنیا بِرچ ایزَنیت،

پَ ای عَزیزَل، هَموطو که هَمیشَه مطیع بیئیتِه، ایسو، نَه تِنا مِنِه حضورِ مو، بلکَم مَهلی بیشتر مِنِه نَبییَنُم، نجاتِ خِتونَه بِی ترس و لرز وَ عمل بیاریت؛