نامَه وَ کِلیسِی فیلیپی 1
1
1وَ طرفِ پولُس وِ تیموتائوس، غلامَلِ مسیح عیسی،
وَ تَمومِ ایموندارَلِ وَ مسیح عیسی که مِنِه شهرِ فیلیپی یَن، بِی ناظِرَل وِ شَماسَل:
2فیض وِ صلحوُسلامتی وَ طرفِ خدا، بُو ایما، وِ خداوند عیسی مسیح، وَ ایشا بو.
دعا وِ شکر کِردن
3هر وَخت ایشا نَه وَ حوشِم ایارُم، خِدِی خِمَه شکر ایکِنُم 4هَمیشَه مِنِه تَمومِ دِعایَلُم سی تَمومِ ایشا بِی شایی دعا ایکِنُم، 5وَ خاطرِ هُمکاری که ایشا مِنِه کارِ انجیل وَ روزِ اَوَل تا وَ ایسِه داریت. 6وِ مِ خاطِرجَمُم، وِّ که کارِ خوبی مِنِه ایشا شروع کِه، وِه نَه تا روزِ وَرگَشتِ مسیح عیسی کامِل ایکِنِه. 7سی مِ دِرِسِه که دَرموردِ تَمومِ ایشا ایطو فکری کِنُم، سییِکِه مِنِه دلُم جا داریت؛ سییِکِه ایشا همَتون بِی مو مِنِه فیضِ خدا شریکیت، هَم مِنِه زندان بییَنُم وِ هم مِنِه دفاع وَ انجیل وِ ثابت کِردَنِ دِرِسیِ وُ. 8سییِکِه خدا شاهدِه، که چِطو بِی محبتِ مسیح عیسی، مشتاقِ هَمَتونُم.
9وِ دعام یِنِه که محبتِ ایشا بیشتر وُ بیشتر وابو وِ بِی شناخت و فهم کامل بو، 10تا اوچیئی نَه که وَ همَه بِختَرِه قبول کِنیت، وِ سی روزِ مسیح، پاک و بیعیب بِیت 11وِ پُر بِیت وَ ثَمَرَلِ صالحی که وَ واسطۀ عیسی مسیح وَ بار ایایِه وِ باعثِ جلال و ستایشِ خدا ایابو.
زنجیرَلِ پولُس وِ پیشرفتِ انجیل
12ای کَکایَل، ایخوام بِیونیت که اوچیئی که وَ سرُم رَتِه، در واقع باعثِ پیشرفتِ انجیل وابی، 13طوری که وَ تَمومیِ ناتورَلِ کاخ سلطنتی وُ وَ هَمَه آشکار وابی که مِ وَ خاطرِ مسیح مِنِه زِندانُم؛ 14مِنِه بَند بییَنُم باعث وابی که بیشترِ کَکایَل، مِنِه خداوند دِلِشون قرص بو تا بِی جرأتِ تموم، کلامِ خدا نَه بییِکِه زَلَشون بِرَه، بِگُن.
15یِهپارهای وَ حَسودی و تییَه مِنِه تییَهای مسیحَ موعظَه ایکِنِن، امّا یِهپارهای دَ بِی نیتِ خوب. 16ای دسۀ دِوم وَ ری محبت ای کارَ ایکِنِن، سییِکِه دونِن که مِ سی دفاع وَ انجیل نَهایَه وابییِمِه وِچُو. 17او دسۀ اوَل وَ ری غِدی و غُت بییَن وَ مسیح موعظَه ایکِنِن، نَه بِی نیتِ خوب، بِی ای گَمون که مِنِه زندان عذابُم بییِن. 18که چِه؟ مهم یِنِه که وَ هر صورت، مسیح موعظَه ایابو، چه نیت دِرُس بو، چه نادِرُس! وُ مِ وَ ای بابت شایَمونُم، بَله، شایی ایکِنُم. 19سییِکِه دونُم که بِی دعایَلِ ایشا وِ کِمَکِ روحِ عیسی مسیح، اینگَل باعثِ آزادیِ مِ ایابو، 20طوری که بِی شوق بَندیرِشُم وِ اِمید دارُم که مِنِه هیچی سرافکَندَه نیابوم، بَلکَم بِی جرأتِ تموم، ایسِه هَم مِی هَمیشَه، مسیح مِنِه بَیَنُم جلال ایجورِه، چه بِی زِندِیی چه بِی مرگ. 21سییِکِه سی مِ زِندِیی مسیح یَه، وِ مُردَن، سود. 22اَر قرارِه مِنِه ای بَیَن هَنی زِندِیی کِنُم، یِه سیم مِی تلاشی یَه که ثَمَر دارِه. وا ای حال نونُم کویِکی نَه انتخاب کِنُم! 23مِ مابینِ ای دِتا سخت مِنِه جنگِ جِدالُم: اُرزوم یِنِه که وَ ای دنیا بِرَم وِ بِی مسیح بوم، سییِکِه یِه مَهلی بِختَرِه؛ 24امّا مُندَنُم مِنِه جسم سی ایشا واجبتَرِه. 25سییِکِه وَ یِه خاطِرجَمُم، دونُم که سی پیشرفت و شاییِ ایشا مِنِه ایمون، زِندَه ایوِیسُم وِ بِی تَمومِ ایشا وَ سَر ایبَرُم، 26تا بِی دِبارَه اومَیَنُم طِی ایشا، افتخارِتون مِنِه مسیح عیسی وَ خاطِرِ مِ بیشتر وُ بیشتر وابو.
27تِنا بِلیت رَه زِندِییتون شایستۀ انجیلِ مسیح بو، طوری که چه بیام وِ ایشا نَه بِوینُم وِ چه مِنِه نَبییَنُم، وَتون بِشنِفُم که مِنِه یِه روح پاوَرجایِیت، بِی یِه فکر، شونَه وَ شونَه سی ایمونِ انجیل تلاش ایکِنیت، 28وِ مِنِه هیچی وَ اونگَلی که وَ ضِدِتونِن هَراسی نَیاریت. یو یِه نِشونۀ آشکار مِنِه هلاکَتِشونِه، امّا نشونهای یَه سی نجاتِ ایشا، وِ یِه وَ خدایَه. 29سییِکِه ای افتخار نصیبِ ایشا وابییِه که نَه تِنا وَ مسیح ایمون بیاریت، بَلکَم سیش عذاب هَم بِکَشیت. 30سی ایشا هَم هَمو مِرافهای هِسی که دیئیت مِ درگیرِش بییُم وِ ایسو ایشنِفیت که هَنی هَم دَرگیرِشُم.
Currently Selected:
نامَه وَ کِلیسِی فیلیپی 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
