نامَه وَ کِلیسِی اَفِسُس 6
6
رابطۀ اولادَل وِ دِیبُوشون
1ای اولادَل، وَ دِیبُو خِتون مِنِه خداوند اطاعت کِنیت، سییِکِه کارِ دِرُس هَمیِنِه. 2«دِیبُو خِتَه حُرمت کُ»، که یِه اَوَلین حکمِ بِی وَعدَه یَه: 3«تا عاقبت وَ خیر وابِی وِ ری زمین عمرِ زیاد کِنی.»
4ای بویَل، اولادَلِ خِتونَه وَ خِشم مَیاریت، بَلکَم اونگَلَه بِی تعلیم و تربیتِ خداوند گَپو کِنیت.
رابطۀ غلامَل وِ اربابَل
5ای غلامَل، اربابَلِ زمینیِ خِتونَه بِی ترس و لرز، وِ بِی دلوُجون، اطاعت کِنیت، طوری که اِنگار مسیحَ اطاعت ایکِنیت. 6وِ یِه هَم، نَه تِنا موقِی که حَواسِشون وَتون هِسی، مِی کَسَلی که وَ دینِ رضایتِ آیَمَلِن، بَلکَم مِی غلامَلِ مسیح که ارادۀ خدا نَه بِی دلوُجون وَجا ایارِن. 7بِی نیتِ خوب خِذمت کِنیت، طوری که اِنگار خداوندَ خذمت ایکِنیت نَه انسانَه، 8دونیت که هر کس هر کارِ خوبی کِنِه، جوابِشَه وَ خداوند ایگِرِه، ایخوا غلام بو، ایخوا آزاد.
9ای اربابَل، بِی غلامَلِ خِتون هَمیطو رفتار کِنیت، وُ وَ خطِ نِشون کَشییَن سیشون دَس وَگِریت، یادِتون بو وِّ که هم اربابِ اونگَل وِ هم اربابِ ایشانِه، مِنِه آسمونِه، وِ طِیش فَرخجویی نیسی.
اسلحۀ تمام وُ کمال خدا
10آخِرِ سَر، مِنِه خداوند، وِ مِنِه قویَتی که وَ قدرتِ وِّ ایایِه، زوردار بِیت. 11اسلحۀ خدا نَه تمام وُ کمال کِنیت وَرِتون تا بِتَریت دَر برابرِ حیلهیَلِ اِبلیس وِیسیت. 12سییِکِه ایما بِی جسم و خین گوشتَری نیگِریم، بَلکَم ایما وَ ضِدِ ریاسَتَل، وَ ضِدِ قُدرَتَل، وَ ضِدِ او قُویَتَلِ تاریکی که وَ ری ای دنیا حاکِمِن، وَ ضِدِ قشونِ روحانیِ شریر که مِنِه جایَلِ آسمونی یَن گوشتَری ایگِریم. 13پَ اسلحۀ خدا نَه تمام وُ کمال کِنیت وَرِتون، تا مِنِه روزِ شَر جونِ وِیسایَن داشتَه بِیت، وِ بِتَریت دِندِی اَنجومِ هَمَه چی، پاوَرجا وِیسیت. 14پَ وِیسیت، درحالی که دویالِ حقیقتَه بَسیتِه وِ زرۀ صالحی نَه کِردیتِه وَرتون، 15وِ اورسی آمادِهای سی اعلامِ انجیلِ سلامتی نَه کِردیتِه وَ پا. 16مِنِه هر وَضعی سپرِ ایمونَه هَم وَگِریت، تا باش بِتَریت، تَمومِ تیرَلِ گُر گِرُتۀ شریرَ کور کِنیت. 17وِ کِلَهخودِ نجاتَه بِنیت وَ سَر وِ شُمشیرِ روحَه که هَمو کلامِ خدایَه، بِگِریت وَ دَس. 18مِنِه هَمَه وَخت، بِی هَمَه طور دعا وِ تَمنا، مِنِه روحِ خدا دعا کِنیت. سی هَمیِه دیار وِ هوشیار بِیت وِ هَمیشَه پاوَرجا سی تَمومِ ایموندارَل دعا کِنیت،
19وِ سی مِ هَم دعا کِنیت، تا هَر موقَع دِهونِمَه سی گَپ زَیَن واز ایکِنُم، قدرتِ کلام وَم عطا وابو تا سِرِّ انجیلَه بِی جرأت اعلام کِنُم، 20سییِکِه سَفیرِ وِنُم، هَرچَن مِنِه بَندُم! دعا کِنیت که وِه نَه بِی جرأت اعلام کِنُم، هَموطو که شایستَه یَه.
آخِرِ سَر
21سییِکِه وَ حالُم باخَوَر بِیت وِ بِیونیت چه ایکِنُم، تیخیکوس، کَکِی عزیزِ ایما وِ خادمِ وفادار مِنِه خداوند، هَمَه چی نَه سیتون ایگُ. 22وِّ نَه سی هَمیِه بِسی کِردِمِه طِیتون، تا وَ حالِمون باخَوَر بِیت، وِ دِلگَرمِتون کِنِه.
23صلحوُسلامتی وِ محبتِ بِی ایمون وَ کَکایَل، وَ طرفِ خِدِی بُو وِ عیسی مسیح خداوند. 24فیض وَ ری تَمومِ کَسَلی که خداوندِ ایما عیسی مسیحَ بِی محبتی که وَ بین نیرَه، دوس دارِن.
Currently Selected:
نامَه وَ کِلیسِی اَفِسُس 6: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
