نامۀ یعقوب 4
4
خِتونَه وَ دوسیِ دنیا دیر نِگَه کِنیت
1وَ کوچِه مابینِتون جَرِدعوا ایابو؟ مَه نَه وَ نَفسِتونِه که مِنِتون وَ سِتیزِه؟ 2آرمونِ چیئی نَه داریت وِ نَیاریت. پَ قتل ایکِنیت، طمع ایکِنیت وِ نیتَریت وَ دَس بیاریت. پَ جَرِدعوا وَ پا ایکِنیت، نَیاریت، سییِکِه وَ خدا دَرخواس نیکِنیت! 3ایشا وَ خدا دَرخواس ایکِنیت، امّا نیجوریت، سییِکِه وِه نَه بِی نیتِ گَند دَرخواس ایکِنیت تا خَرجِ عیاشییَلِتون کِنیت.
4ای زناکارَل، مَه نُونیت دوسی بِی دنیا دشمنی بِی خدا یَه؟ پَ هرکه وَ دینِ دوسی بِی دنیا یَه، خِشَه دشمن خدا ایکِنِه. 5مَه گَمون ایکِنیت نوشتۀ مقدس بیفِیدَه گُتِه: «خدا نِسوت وَ روحی که خُوش مِنِه ایما نَهایِه غیرَتِ زیادی دارِه.» 6امّا فیضی که خدا ایبَخشِه، یِکِلی بیشتَرِه. سی هَمیو نوشتۀ مقدس مِنِه امثالِ سِلِیمون ایگُ:
«خدا وَرِ آیَمَلِ غُد ایوِیسِه،
امّا وَ کوچِکنظمَل فیض اییِه.»
7پَ تسلیم خدا بِیت. وَرِ اِبلیس وِیسیت، که وَتون ایدَرَه. 8وَ خدا نِزِنگ وابِیت، که خدا هَم وَ ایشا نِزِنگ ایابو. ای گِناکارَل، دَسَلِ خِتونَه وَ گِنا بِشوریت، وِ ای دو وَشَکَل، دِلِ خِتونَه پاک کِنیت. 9بیُفتیت وَ حالِ زار وِ شَربَه بِخونیت وِ زاری کِنیت. خندَتون ماتم وابو، وِ شاییتون شیوَن. 10مِنِه حضورِ خدا کوچِکنظم وابِیت وُ وِّ ایشا نَه سَرفَراز ایکِنِه.
11ای کَکایَل، بَدگوییِ یَکَه نَکِنیت. هرکه بَدی کَکاشَه بِگُ یا وِّ نَه داوری کِنِه، وَ شریعت بَد گُتِه وِ شریعتَه داوری کِردِه. امّا اَر تِ شریعتَه داوری کِنی، دَ وِه نَه وَجا نیاری، بلکم داورِشی! 12تِنا یِه قانونگذار وِ یِه داور هِسی، هَموِه که ایتَرِه نجات بییِه وِ هلاک کِنِه. امّا تِ کییِی که هُمساتَه داوری کِنی!
افتخارِ نادِرُس وَ صَبا
13ایسو ایشا که ایگِیت: «اُمرو یا صَبا ایرِیم وَ ای شهر یا او شهر وِ یِه سال وُچِه ایوِیسیم وِ کارِ کاسِبی ایکِنیم وِ یِکِلی منفعت ایکِنیم،» خوب گوش کِنیت: 14وا ای حال ایشا حتی نُونیت صَبا چه ایابو. زِندِیی ایشا چِنِه؟ مِی کِرِمِنجییِیت که ظاهر ایابو وِ بعد یِچِی وَ بِین ایرَه. 15وَ جاش باید ایطو بِگِیت: «اَر خداوند بِخوا، زندَه ایوِیسیم وِ ایطو وِ اوطو ایکِنیم.» 16دَرحالی که ایشا وَ غُد بییَنِ خِتون افتخار ایکِنیت. هر افتخاری که ایطو بو، نَه خوبِه! 17پَ، هرکه بِیونِه چه کاری دِرِسِه وُ وِه نَه نَکِنِه، گِنا کِردِه.
Currently Selected:
نامۀ یعقوب 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
