نامۀ یعقوب 3
3
بَلایِ زُوون
1کَکایَلُم، نَکِنِه یِکِلی وَ ایشانَل وَ دینِ معلّم وابییَن بون، سییِکِه دونیت که وَ ایما مُعَلِمَل، سختتَر داوری ایابو. 2سییِکِه تَمومِ ایما مِنِه یِکِلی چییَل ایسُریم وِ ایخَریم وَ گِل. اَر کسی مِنِه گپ زَیَنِش نَسُرِه وِ نَیُفتِه، آیَمی کامِلِه وِ ایتَرِه تمومیِ وجودِ خِشَه کنترل کِنِه.
3ایما بِی دَهَنَه نَهایَن وَ دِهونِ اسبَل، وِه نَه مطیعِ خِمون ایکِنیم وُ وَ ای وَسیلَه ایتَریم تمومیِ بَیَنِ حِیونَه وَ هر لَتی بُویَریم. 4هَمیطو هَم سِیلَ کشتییَل کِنیت! سکانی کِچِلو ایتَرِه کشتیِ گَپویی نَه که تِنا بایَلِ سخت وِه نَه تَکون اییِه، بُویَرِه وَ هر لَتی که ناخدا بِخوا. 5هَمیطو، زُوون هَم عضوی کِچِلو یَه، امّا اِدعایَلِ گَپو دارِه. چِرِنگی کِچِلو ایتَرِه تَش بِنِه مِنِه جنگلی گَپو. 6زُوون تَشی یَه؛ دنیایی یَه پُر وَ شرارَت. زُوون عضوی وَ اَعضِی بَیَنِمونِه که تمومِ وجودِ آیَمَه آلودَه ایکِنِه وِ تمومِ دنیا نَه ایکَشِه وَ تَش - تَشی که جَنَم بِرِش کِردِه!
7آیَم هَمَه طور حِیون وِ باهِندَه وِ خَزندَه وِ جونِوَرِ دریایی نَه رام ایکِنِه وِ رام کِردِه، 8امّا هیچ آیَمی نیتَرِه زُوونَه رام کِنِه. زُوون شرارتی یَه نافِرمون وِ پُر وَ زهرِ کُشندَه!
9بِی زُوونِ خِمون خداوند وِ بُو آسمونی نَه مبارک ایخونیم وِ بِی هَمو زُوون آیَمَلی نَه که وَ شباهتِ خدا آفرییَه وابییِنِه، لعنت ایکِنیم. 10وَ یِه دِهون، هم ستایش ایا وَدَر، هَم نُرفین! ای کَکایَلُم، نَه خوبِه ایطو بو. 11مَه ایابو وَ چشمهای هَم اُو شیرین بیا وَدَر، هَم اُو سور؟ 12کَکایَلُم، مَه ایابو دارِ انجیر، زیتون بییِه؟ یا دارِ رَز، انجیر بییِه؟ هَمیطو هَم چشمۀ سور نیتَرِه اُو شیرین بییِه.
حکمت وَ آسمون
13کی مِلِی ایشا حکیم وِ دونایَه؟ بِلیت بِی کارَلِ خوبِ خُوش، بِی کوچِکنظمی که وَ حکمت سرچشمَه ایگِرِه نِشون بییِه. 14امّا اَر مِنِه دلِتون حَسودی وِ غِدی داریت، وَ خِتون نبالیت وِ خلافِ حقیقت گَپ مَزَنیت. 15ایطو حکمتی وَ آسمون نیا، بلکم زمینی وِ نفسانی وُ وَ طرفِ شِیطونِه. 16سییِکِه هر جا حَسودی وِ غِدی بو، وُچِه خَلَقی وِ هَرکیهَرکی یَه وِ هر طور کارِ گَند هَم هِسی.
17امّا او حکمتی که وَ آسمونِه، اَوَل پاکِه، اوسِه صلحطَلَب وِ آروم وِ حرف گوش کُن، وِ لوریز وَ رحمت وِ ثمرهیَلِ خوب، وِ بی هیچ فَرخجویی وِ ریا یَه! 18صالح بییَن، مَصولی یَه که مِنِه صلح و صفا، وُ وَ دَسِ صلحطَلَبَل کاشتَه ایابو.
Currently Selected:
نامۀ یعقوب 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
