نامۀ یعقوب 2
2
فَرخجویی نَکِنیت
1کَکایَلُم، ایشا که وَ ایمونِتون وَ خداوندِمون عیسی مسیح، خداوندِ پُرجلالِمون سفت چَسبِسیتِه، فَرخجویی نَکِنیت. 2سییِکِه اَر کسی بِی انگشتری طلا وِ جومۀ شاهانَه بیا مِنِه جَمِتون وِ فقیری هَم بِی جومۀ نیمدارِ پِلَشتی بیا داخل، 3وِ اَر ایشا وِّ نَه که جومۀ شاهانَه وَرِشِه بیشتَر تحویل بِگِریت وِ وَش بِگِیت: «بِفرما بِشی وَ ای جِی خوب،» امّا وَ فقیر بِگِیت: «هَم وُچِه وِیس!» وِ یا: «بِشی وِیچِه طِی پایَلُم وَ ری زمین» 4مَه مِلِی خِتون فَرخجویی نَکِردیته وِ بِی نیتِ بَد قضاوت نَکِردیته؟
5ای کَکایَلِ عزیز، گوش کِنیت! مَه خدا فقیرَلِ ای دنیا نَه نَوَرچییِه تا مِنِه ایمون دارا بون وِ پادشاییای نَه وَ میراث بُویَرِن که وُّ وَ دوسدارَلِ خُوش وَعدَه دایِه؟ 6امّا ایشا وَ فقیر بیحرمتی کِردیتِه. مَه نَه دارایَلِن که وَ ایشا ظلم ایکِنِن وِ ایشانَه ایکَشِن وَ مَحکَمَه؟ 7مَه اینگَل نَه همونگَلِن که وَ او نومِ شریف که نَهایَه وابییِه ریتون، کُفر ایگُن؟
8اَر ایشا وَراسی او شریعتِ شاهانَه نَه طبقِ ای نوشتۀ تورات وَجا بیاریت که فرمایش ایکِنِه: «هُمساتَه مِی خُوت محبت کُ،» کارِ خوبی ایکِنیت. 9امّا اَر فَرخجویی کِنیت، گِنا ایکِنیت وِ شریعت ایشا نَه تخصیرکار دونِه وِ محکومِتون ایکِنِه. 10سییِکِه هَرکه تمومِ شریعتَه نِگَه کِنِه امّا تِنا مِنِه یِه چی بِسُرِه، تَخصیرکارِه وِ جُرمِش اِشکَنایَنِه تمومِ شریعَتِه. 11سییِکِه، وِّ که گُت: «زنا مَکُ،» هَمیطو هَم گُت: «قتل مَکُ.» هَرچَن زنا نَکِنی، امّا اَر قتل کِنی، شریعَتَه اِشکَنائییِی.
12پَ مِی کَسَلی گَپ بِزَنیت وِ عمل کِنیت که دونِن طبقِ شریعتِ آزادی، وَشون داوری ایابو، 13سییِکِه داوری خدا نِسوَت وَ وِه که رحم نَکِردَه بو، بی رحم ایابو. امّا رحم وَ داوری زور ایابو!
ایمون بیعمل مُردِه یَه
14کَکایَلُم، چه فِیدَه دارِه اَر کسی اِدعا کِنِه ایمون دارِه، امّا عمل نَیاشتَه بو؟ مَه ایطو ایمونی ایتَرِه نجاتِش بییِه؟ 15اَر کَکا یا دَیَهای مُتاجِ لباس یا غَذِی روزِش بو 16وِ کسی وَ ایشا وَشون بِگُ: «بِرِیت وَ سلامت، وِ خِتونَه گرم کِنیت وِ سیر وابِیت،» بییِکِه سی رفعِ اِتیاجَلِشون کاری کِنِه، چه فِیدَهای دارِه؟ 17پَ همیطو ایمون وَ تِنایی وِ بیعمل، مُردَه یَه.
18امّا یِکی ایگُ: «تِ ایمون داری، مِ عمل دارُم!» تِ ایمونِتَه بِدونِ کارَلِت وَ مِ نِشون بییِه وِ مِ هَم ایمونِمَه بِی کارَلُم وَ تِ نِشون اییُم. 19تِ باور داری که خدا یِکی یَه. خوب ایکِنی! حتی دیوَل هَم یِنَه باور دارِن وُ وَ زَلِی وَ خِشون ایدَکِن!
20ای نایون، ایخِی بِیونی سیچِه ایمونِ بیعمل بیثَمَرِه؟ 21مَه جَدِ ایما ابراهیم نَبی که بِی کارَلِش صالح وَ حساب اومَه، اوسِه که کِرِش اِسحاقَ ری مذبَح پیشکِش کِه؟ 22ایبینی که ایمون وِ کارَلِش بِی یَک عمل ایکِردِن، وِ ایمونِش بِی کارَلِش کامل وابی. 23وِ او نِوشتۀ تورات وَ حقیقت رَسی که ایگُ: «ابراهیم وَ خدا ایمون آوُرد وِ یِه سیش صالحی وَ حساب اومَه،» وُ وِّ دوسِ خدا خُوندَه وابی. 24پَ ایبینیت که آیَم بِی کارَلِشِه که صالح وَ حساب ایا، نَه بِی ایمونِ تِنا.
25هَمیطو مَه راحابِ بَدکارَه نَبی که بِی کارَلِش صالح وَ حساب اومَه، اوسِه که وَ قاصِدَل پَنا دا وِ اونگَلَه وَ رَیی دَ رُونَه کِه؟ 26بَلِه، سییِکِه هَموطو که بَیَن بیروح مُردَه یَه، ایمون هَم بیعمل مُردَه یَه.
Currently Selected:
نامۀ یعقوب 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
