نامۀ یعقوب 1
1
1وَ طرفِ یعقوب، غلامِ خدا وِ عیسی مسیح خداوند،
وَ دُوازَه طِیفَه که مِنِه دنیا پخشِپَلایَن.
سلام!
اِمتحانِ ایمون
2ای کَکایَلُم، هر وَخت بِی امتحانَلِ جورواجور ریوَری وابیئیت، تا ایتَریت شای بِیت! 3سییِکِه دونیت امتحانِ ایمونِ ایشا، سیتون پاوَرجایی وَ بار ایارِه. 4پَ بِلیت ای پاوَرجایی کارِ خِشَه تمام وُ کمال بِکِنِه تا بالِغ وُ کامِل وابِیت وِ چیئی کم نَیاشتَه بِیت. 5اَر کسی وَ ایشا متاجِ حکمت بو، وَ خدایی دَرخواس کِنِه که بِی دَسِدِلوازی وِ بیسَرکوفت وَ هَمَه عطا ایکِنِه، وِ وَش عطا ایابو. 6امّا بِی ایمون دَرخواس کِنِه وِ هیچ شَکی وَ خُوش رَه نَیِه، سییِکِه کسی که شک دارِه، مِی موجِ دریایَه که بِی اومَیَنِ بای ایرَه وَ هرلَت وِ اییُفتِه مِنِه تَلاطم. 7ایطو کسی گَمون نَکِنِه که وَ خداوند چیئی وَ دَس ایارِه، 8وِّ آیَمِ دو وَشَکی یَه وِ مِنِه تمومِ رفتارِ خُوش حالحالی یَه.
9کَکِی فقیر وَ سَرفَرازیش افتخار کِنِه، 10وِ کَکِی دارا وَ کوچِکنظمیش، سییِکِه مِی گِلِ صَحرا عمری نَیارِه. 11هَموطو که اَفتو بِی گَرمِی تُندِش ایدَرا وِ عَلَفَه خشک ایکِنِه وِ گِلِش ایریزِه دومِن وِ قشنگیش وَ بِین ایرَه، هَمیطو دارا هَم تَمومِ چییَلی که مِنِه زِندِیش وَ دینِشونِه، ایپیسِه وُ وَ بِین ایرَه.
12خَش وَ حالِ وِه که مِنِه امتحان طاقت ایارِه، سییِکِه وَختی وَ امتحان سربلند بیا وَدَر، هَمو تاجِ حیاتی نَه وَ دَس ایارِه که خدا وَ دوسدارَلِ خُوش وَعدَه دایِه.
13هیشکَه وختی وَسوَسَه ایابو، نَگُ: «یِه خدایَه که مِنَه وَسوَسَه ایکِنِه،» سییِکِه خدا بِی هیچ بَدی وَسوَسَه نیابو، وِ کسی نَه هَم وَسوَسَه نیکِنِه. 14امّا موقِی که کسی وَسوَسَه ایابو، یِه نفسِ خِشِه که گولِش ایزَنِه وُ وِرِش اییِه مِنِه تَلَه. 15اوسِه نفس که حامِلَه وابو، گِنا ایزایِه وِ گِنا هَم وَختی گَپو وابو، مرگ وَ بار ایارِه.
16کَکایَلِ عزیزم، گول مَخَریت! 17هر پیشکِشِ خوب وِ هر پیشکِشِ کامل وَ بالایَه، وَ طرفِ بو نورَل ایایِه دومِن، هَمو خدایی که نَه تغییری مِنِش هِه وِ نَه اثری وَ سایۀ تغییر. 18وِّ طبقِ ارادۀ خُوش ایما نَه بِی کلامِ حقیقت وَ وجود آوُرد تا مِی نوبرِ آفریدِهیَلِش بِیم.
اِشنُفتَن وُ وَجا آوُردَنِ کلام
19کَکایَلِ عزیزم، حَواستون بو: هر کس باید مِنِه اِشنُفتَن تیز بُو، مِنِه گَپ زَیَن آروم وِ مِنِه خِشم هَم سُس بو! 20سییِکِه خِشمِ آیَم نیلِه اوطو که خدا ایخوا، صالح بِیم. 21پَ هر طور گَندی وِ هر اثری وَ شَرارَتَه وَ خِتون دیر کِنیت وِ بِی کوچِکنظمی، کلامی نَه که مِنِه ایشا کاشتَه وابییِه وِ ایتَرِه جونِتونَه نجات بییِه، قبول کِنیت.
22امّا وَجا آوَرَندۀ کلام بِیت، نَه تِنا شِنوَندَهش؛ خِتونَه گول مَزَنیت! 23سییِکِه هر کس که کلامَه ایشنِفِه امّا وَش عمل نیکِنِه، مِی کسی یَه که مِنِه اِینَه سِیلَ ری خِش ایکِنِه 24وِ خِشَه مِنِش ایبینِه، امّا تا وَ وَرِ اِینَه دیر ایابو، وَ حوشِش ایرَه که چطو سیمِی داشته. 25امّا وِّ که تییَش وَ شریعتِ کاملِه که هَمو شریعتِ آزادی یَه، نَه تِنا وِه نَه وَ نظر دیر نیکِنِه، وِ شنوندۀ فراموشکاری نی، بلکم وِه نَه وَجا ایارِه، وِّ مِنِه کارِ خُوش مبارک ایابو.
26وِّ که خِشَه دیندار بِیونِه، امّا اوسارِ زُوونِشَه نَیاشتَه بو، خِشَه گول ایزَنِه وِ دینداریش بیارزشِه. 27دینداریِ پاک وُ بیعیب مِنِه نظرِ خدا، بُو آسمونی ایما، یِنِه که دَسِ یَتیمَل وِ بیوهزَنَلَه مِنِه موقِی گرفتاری بِگِریم وِ خِمونَه وَ ناپاکیِ ای دنیا دیر کِنیم.
Currently Selected:
نامۀ یعقوب 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
