نامَه وَ عبرانییَل 13
13
قُربونییَلی که موردِ پَسندِ خدایَن
1محبتِ کَکاگَری مابِینتون ادامَه داشتَه بو. 2وَ مِمونوازیِ غَریبهیَل غافل نَبِیت، سییِکِه بِی ای کار، یِهپارهای بی یِکِه خَوَر داشتَه بون، وَ فرشتهیَل پذیرایی کِردِنِه. 3وَ یادِ زندانییَل بِیت، طوری که انگار خِتون هَم باشون مِنِه بَندیت؛ وِ هَمیطو وَ یادِ کَسَلی بِیت که عذاب ایکَشِن، وَ وُچِه که خِتون هَم مِنِه بَیَن عذاب ایکَشیت.
4بِلیت ازدواج طِی همَه حُرمت داشتَه بو وِ رابطۀ زنِشیتون پاک بو، سییِکِه خدا بیعفَتَل وِ زِناکارَلَه داوری ایکِنِه. 5زِندِییتونَه وَ پیلدوسی دیر نِگَه کِنیت، وُ وَ اوچیئی که داریت قانع بِیت، سییِکِه خدا فرمایش کِردِه:
« وَتَه وِلِت نیکِنُم،
وِ تِنا نینِمِت.»
6پَ ایما ایتَریم بِی اِطمینون بِگِیم:
«خداوند یاورِ مِنِه، زَلَم نیرَه.
آیَم ایتَرِه چِه وَم کِنِه؟»
7رَهبَرلِ خِتونَه وَ یای داشتَه بِیت، اونگَلی که کلامِ خدا نَه سیتون گُتِن. وَ عاقبتِ شیوۀ زِندِییشون فکر کِنیت وُ وَ ایمونِشون سَرمشق بِگِریت. 8عیسی مسیح دیگ وِ اُمرو وِ تا ابد هَموِّنِه.
9بِی تعلیمَلِ جورواجور وِ عجیب وَ رَه وِل وانَبِیت؛ سییِکِه یِه خوبِه، که دلِ آیَم وَ فیض قویَت بِگِرِه، نَه وَ خَردَنییَلی که سی کَسَلی که وَ دینِشونِن نفعی نَیارِه. 10ایما مذبَحی داریم که خِذمتکارَلِ او بِهون، حق نَیارِن وَ اوچیئی که وَ ریشِه بِخَرِن.
11وَ وُچِه که کاهنِ اعظم، خینِ حِیونَلَه سی قُربونیِ گِنا ایبَرِه وَ قُدسالاقداس، امّا لاشهیَل صَرا وَ اردوگاه سُتَه ایابون، 12هَمیطو، عیسی هَم صَرا وَ دروازۀ شهر عذاب کَشی تا بِی خینِ خُوش، مردِمَه تقدیس کِنِه. 13پَ بییِیت ایما هَم بِرِیم طِیش صَرا وَ اردوگاه وِ مِنِه عارِ ننگِ وِّ شریک بِیم. 14سییِکِه ایما وِیچِه شهری موندِگار نَیاریم بلکَم بِی شوق بَندیرِ او شهری یِیم که ایا.
15پَ بییِیت وَ واسطۀ عیسی قُربونیِ شکر کِردَنَه همیشَه وَ خدا تقدیم کِنیم، ای قُربونی، هَمو ثمرۀ لُویَلی یَه که وَ نومِش اعتراف ایکِنِن. 16وَ خوبی کِردَن وِ شریک کِردَنِ بَقیَه مِنِه اوچیئی که داریت غافل نَوابِیت، سییِکِه ایطو قُربونییَلی موردِ پسندِ خدا یَه.
17وَ رَهبرَلِ خِتون اطاعت کِنیت وِ مطیعِ اونگَل بِیت؛ سییِکِه اونگَل وَ جونِ ایشا پاسَبونی ایکِنِن، وِ بایِس حساب پَس بییِن. بِلیت کارِ خِشونَه بِی شایَمونی بِکِنِن نَه بِی آه وُ نالَه، سییِکِه یِه وَ نفعِتون نی.
18سی ایما دِعا کِنیت، سییِکِه خاطِرجَمیم که وُجدانِمون پاکِه وِ ایخِیم وَ هر بابَت سربِلَند بِیم. 19بیشترَبیشتر وَتون تمنا دارُم دعا کِنیت که بِتَرُم هر چه زیتَر وَرگَردُم طِیتون.
20ایسو، خِدِی صلحوُسلامتی که بِی خینِ او عهدِ ابدی، خداوندِ ایما عیسی نَه وَ مُردِهیَل زِندَه کِه یعنی چِپونِ اعظمِ میشَلَه، 21هَمو خدا ایشا نَه مجهز کِنِه وَ هر چیِ خوبی تا ارادۀ وِّ نَه وَجا بیاریت، وِ اوچیئی نَه که پَسندِشِه وَ واسطۀ عیسی مسیح مِنِه ایما وَ کار بِگِرِه، جلال این مسیح بو تا ابد الآباد. آمین.
22ای کَکایَل، وَتون تمنا ایکِنُم ای کلامِ نصیحتِ مِنَه طاقت بیاریت، سییِکِه خلاصَه سیتون نوشتِمِه.
23بایِس بِیونیت که کَکامون تیموتائوس آزاد وابییِه. اَر زی بیا، باش ایام وَ دییَنِتون.
24وَ تَمومِ رهبَرَلِ خِتون وِ تَمومِ ایموندارَلِ وَ مسیح سلام بِرَسونیت. اونگَلی که این ایتالیا یَن وَتون سلام ایرَسونِن.
25فیض بِی همۀ ایشا بو.
Currently Selected:
نامَه وَ عبرانییَل 13: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
