نامَه وَ کِلیسِی اَفِسُس 5
5
مِنِه محبت رفتار کنید
1پَ مِی اولادَلِ عزیز، وَ خدا سَرمشق بِگِریت. 2وِ مِنِه محبت رفتار کِنیت، هَموطو که مسیح هَم ایما نَه محبت کِه وِ جونِ خِشَه مِی قُربونی وِ پیشکِشی خوشبو سی ایما وَ خدا تقدیم کِه.
3امّا مابینِ ایشا وَ بیعفتی وِ هَر طور ناپاکی یا حرص و طمع حتی نَبایِس گَپی بیا مابین، سییِکِه ای کارَل شایستۀ ایموندارَل نی. 4گَپَلِ رَکیک وِ ناشایِس وِ یا گَپَلِ گَند مابینِتون نَبو که شایستَه نی؛ وَ جاش شکر کِنیت. 5سییِکِه خاطرجَم بِیت که آیَمَلِ بیعفت وُ ناپاک یا طَمعخوار، که هَمو بُتپَرَستَل بون، مِنِه پادشاییِ مسیح وِ خدا نَصیبی نَیارِن. 6نَلیت کسی ایشا نَه بِی گَپَلِ پیک گول بِزَنِه، سییِکِه وَ خاطرِ هَمی چییَلِه که غضبِ خدا نازل ایابو وَ آیَمَلِ تور. 7پَ بِی اونگَل شریک نَوابِیت.
8سییِکِه یِه موقِی ایشا تاریکی بیئیت، امّا ایسِه مِنِه خداوند نوریت. پَ مِی اولادَلِ نور رفتار کِنیت. 9سییِکِه ثمرۀ نور، مِنِه هَر چیئی که خوب وِ راس وِ دِرِسِه، آشکار ایابو. 10تلاش کِنیت تا بِفَمیت خشنودیِ خداوند مِنِه چِنِه. 11مِنِه کارَلِ بیثَمَرِ تاریکی شَریک نَوابِیت، بَلکَم اونگَلَه بَرمَلا کِنیت. 12سییِکِه حتی وَ زُوون آوُردَنِ اوچییَلی که اونگَل مِنِه خَفا ایکِنِن، شرم آوَرِه. 13امّا وختی که چیئی بییُفتِه وَرِ نور آشکار ایابو. 14سییِکِه هر چیئی که آشکار ایابو نورِه. سی هَمیِنِه که ایگُ:
«ای که مِنِه خُویِی، دیار وابو،
وُ وَ مُردِهیَل وَری،
مسیح نورِ خِشَه ایبویِه وَ ریت.»
15پَ، مَهلی حَواستون بو که چطو رفتار ایکِنیت، رفتارتون مِی آیَمَلِ دونا بو نَه مِی نایونَل. 16قدرِ ای وَختَه بِیونیت، سییِکِه ای روزَل شَریرِه. 17پَ نایون نَبِیت، بَلکَم ارادۀ خداوندَ بِفَمیت. 18وِ مَهسِ شراب نَوابِیت، سییِکِه ایشا نَه ایکَشِه وَ کارَلِ گَند؛ بَلکَم پُر وابِیت وَ روحِ خدا. 19بِی مَزامیر وِ سِرویَل وِ آوازَلی که وَ روحِ خدایَه بِی یَک گَپ بِزَنیت وُ وَ تَهِ دل سی خداوند بِخونیت وِ قَص بِسازیت. 20هَمیشَه خِدِی بُو نَه وَ نومِ خداوندِمون عیسی مسیح سی هَمَه چی شکر کِنیت.
رابطۀ زَنَل وِ میرِهیَلِشون
21وَ حُرمتِ مسیح، مطیعِ یَک بِیت. 22ای زَنَل، مطیعِ میرِهیَلِتون بِیت، هَموطو که مطیعِ خداوندیت. 23سییِکِه میرَه سَرِ زَنِه، هَموطو که مسیح سرِ کلیسا یعنی بَیَنِ خِشِه، وِ خُوش نجات دهندۀ کلیسایَه. 24ایسو هَموطو که کلیسا مطیعِ مسیح یَه، زَنَل هَم بایِس مِنِه هَر چیئی مطیعِ میرِهیَلِشون بون.
25ای میرِهیَل، زَنَلِ خِتونَه دوس داشتَه بِیت، هَموطو که مسیح هَم کلیسا نَه دوس داشت وِ جونِ خِشَه نَها وَ رَش، 26تا وِه نَه بِی اُو کلامِ خدا بِشورِه وِ پاک کِنِه وِ ایطو کلیسا نَه تقدیس کِنِه، 27تا کلیسا نَه مِنِه او شکوه وِ بِرچهای که دارِه بیارِه طِی خُوش، بی هیچ لَک و چین و چروک یا هر چیئی دییَه، تا کلیسا مقدس وِ بیعیب بو. 28هَمیطو، میرِهیَل بایِس زَنَلِ خِشونَه مِی بَیَنِ خِشون دوس داشتَه بون. وِه که زَنِشَه دوس دارِه، خِشَه دوس دارِه. 29سییِکِه هیشکَه وَ بَیَنِ خُوش نفرت نَیارِه، بَلکَم وَش غذا اییِه وِ ویردارِش ایابو، هَموطو که مسیح هَم ویردارِ کلیسا یَه؛ 30سییِکِه ایما اَعضِی بَیَنِ وِّنیم. 31«سی هَمیو مِرد، وَ دِیبُو خُوش جیا ایابو، ایچَسبِه وَ زنِش، وِ او دِتا یِه تَن ایابون.» 32یِه سِرِّ گَپویی یَه، وِ ای چیئی که مِ ایگُم، دَرموردِ مسیح وِ کلیسا یَه. 33وَ هَر حال، هَر کویَکی وَ ایشا هَم بایِس زَنِ خِشَه مِی خُوش دوس داشتَه بو، وِ زَن بایِس حَواسِش بو وَ میرِی خُوش حرمت بِنِه.
Currently Selected:
نامَه وَ کِلیسِی اَفِسُس 5: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
