نامَه وَ کِلیسِی اَفِسُس 4
4
یِکی بییَن مِنِه بَیَنِ مسیح
1پَ مِ که سی خداوند مِنِه بَندُم، وَ ایشا تَمنا دارُم، شایستۀ او دَعوتی که وَتون وابییِه رفتار کِنیت، 2بِی کوچِکنظمیِ تَموم و مِرَبونی؛ بِی صبر، مِنِه محبت یَکَه تحمل کِنیت. 3تلاش کِنیت تا او یکی بییَنِ روحِ خدا نَه مِنِه صلحوُسلامت نِگَه کِنیت. 4هَموطو که یِه بَیَن وِ یِه روح هِسی، خدا هَم وَختی که ایشا نَه خُوندِه، یِه اِمید وَتون دایِه؛ 5یِه خداوند، یِه ایمون، یِه تعمید؛ 6یِه خدا وِ بُو آسَمونی هَمَه، که بالاتَر وَ هَمَه یَه وِ مِنِه هَمَه کار ایکِنِه وِ مِنِه همَه یَه.
7امّا وَ هَر کویَکی وَ ایما وَ قَدِ بخشش مسیح، فیض بَخشییَه وابییِه. 8سی هَمیو کتابِ زَبور ایگُ:
«موقِی که وِّ رَت بالا وَ عَرشِ بَرین
لشکَری وَ اسیرَلَه وَ دین خُوش بالا بُرد
وُ وِّ پیشکِشَلی دا وَ آیَمَل.»
9منظور وَ "رَت بالا" چِنِه، غیرَ یِکِه وِّ اومَیِه بییِه دومِن وَ جایَلِ دومِنترِ زمین؟ 10وِّ که اومَه دومِن، هَموِّنِه که وَ هَمۀ آسمونَل رَت بالاتَر، تا هَمَه چی نَه پُر کِنِه. 11وُ وِّ بَخشی رسولَل، نَبییَل، مبشرَل، چِپونَل وِ معلمَل، 12تا ایموندارَلَه سی کارِ خِذمت آمایَه کِنِن، سی تقویتِ بَیَنِ مسیح، 13تا اوسِه که هَمۀ ایما ایمونمون یکی بو وِ شناختِ همۀ ایما وَ کِرِ خدا یکی بو، تا وَ ای ترتیب ایما وَ قَدِ انسانِ کامل رشت کِنیم، وِ ایطو وَ قَدِ پُریِ قامتِ مسیح بِرَسیم.
14تا دَ مِی بَچهیَل نَبِیم، تا موجَل وِرِمون بییِن وَ هَرلَتی وِ بایِ تَعلیمَلِ جورواجور ایما نَه بِکَشِن وَ هَرلَتی، وِ گولِ کَلَک وِ حیلۀ آیَمَلی نَه نَخَریم که ایخوان ایما نَه وَ رَه وِل کِنِن. 15بَلکَم بِی گُتَنِ حقیقت مِنِه محبت، وَ هَر بابت تا وَ حَدِّ وُّ که سَرِه، یعنی مسیح، رشت ایکِنیم. 16وَ وِّنِه که تَمومِ بَیَن، بِی هر مَفصَلی که مربوط وَ هر عضوی یَه، وَ هَم وَصل ایابو وِ ایچَسبِه، موقِی که هر عضو دِرُس کار کِنِه، بَیَن رشت ایکِنِه وِ خِشَه مِنِه محبت تقویت ایکِنِه.
زِندِییِ نو
17ایسو یِنَه ایگُم وِ مِنِه خداوند شهادت اییُم که رفتارِ ایشا دَ نَبایِس مِی قومَلِ خدانَشناس بو که مِنِه فکرَلِ باطلِ خِشون رفتار ایکِنِن. 18عقلِ اونگَل تاریک وابییِه، وُ وَ خاطرِ نایونی وِ سختدِلیشون، وَ حیاتِ خدا دیر اُفتانِه. 19اونگَل سنگدِل وابییِنِه وِ خِشونَه دانِه وَ دَسِ نَفسِشون، بِی حِرص، دَس وَ هَر ناپاکی ایزَنِن. 20امّا ایشا مسیحَ ایطو یای نَگِرُتیت، 21بِی ای فرض که ایشا دَرموردِ وِّ اِشنُفتیتِه وِ طبقِ او حقیقَتی که مِنِه عیسی یَه، تعلیم گِرُتیتِه. 22تا روشِ زِندِیی قَدیمی خِتون، یعنی او انسانِ کهنَه نَه که وَ خاطرِ هوی وُ هَوَسِ گِنا فاسد بی، وَ وَرِتون دَراریت. 23وِ مِنِه روح فکرِ ایشا نو وابو، 24وِ انسانِ تازَه نَه کِنیت وَرِتون، وِه که مِنِه صالحی وِ قدوسیَتِ حقیقی، مِی خدا آفَرییَه وابییِه.
25پَ، دِرو کِردَنَه بِنیت اوبال، هَر کویَکیتون بِی هُمسا خُوش وَ راسی گَپ بِزَنِه، سییِکِه ایما هَمَه، اَعضِی یَکیم. 26«خِشم بِگِریت، امّا گِنا مَکِنیت» نَلیت تَشِ خِشمِتون بِکَشِه وَ تَنگِپَسین، 27وِ مِجال نَئیت وَ اِبلیس. 28دُز دَ دِزی نَکِنِه، بَلکَم زحمت بِکَشِه، وِ بِی دَسَلِ خُوش بِی صداقت کار کِنِه، تا بِتَرِه وَ فَقیرَل هَم چیئی بییِه.
29دِهونِتون وَ هیچ گَپِ گَندی واز وانَبو، بَلکَم گَپَلِتون وَ خوبی سی بَنا کِردَن بَقیَه بو تا اِتیاجی نَه بَرطرف کِنِه وُ وَ کَسَلی که ایشنِفِن فیض بِرَسونِه. 30روحِ قدوسِ خدا نَه که باش مُهر وابیئیتِه سی روزِ نجات، غَم وَبار مَکِنیت. 31هَر طور تَلی وِ تندی وِ خِشم وِ قارِقیر وِ بُهتون وِ هَر طور بَدخوایی نَه وَ خِتون دیر کِنیت. 32بِی یَک مِرَبون بِیت، دِلسوزِ یَک بِیت وِ هَموطو که خدا ایشا نَه مِنِه مسیح بَخشییِه، ایشا هَم یَکَه بُویَخشیت.
Currently Selected:
نامَه وَ کِلیسِی اَفِسُس 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
