نامَه وَ کِلیسِی اَفِسُس 3
3
سِرِّ انجیل آشکار وابی
1سی هَمیو، مو پولُس، که وَ خاطِرِ ایشا غیرِیَهودییَل، سی مسیح عیسی مِنِه زندانُم.
2بیگَمون ایشا دَرموردِ یِه اِشنُفتیتِه که نظارتِ فیضِ خدا سی خِذمت وَ ایشا وَ مِ بَخشییَه وابییِه. 3هَموطو که یِچِی سیتون نِوِشتِمِه، که چطو ای سِر وَ رَه مکاشِفَه وَ مِ آشکار وابی. 4وَختی یِنَه ایخونیت، ایتَریت بِفَمیت که چطو مِ سِرِّ مسیحَ فَمِسِمِه، 5او سِرّی که مِنِه نَسلَلِ دییَه وَ کُرَلِ آیَمَل آشکار نَوابییَه بی، او طوری که ایسِه وَ واسطۀ روحالقدس وَ رَسولَلِ مقدسِ وُّ وِ پِیغَمبَرَل آشکار وابییِه. 6ای سِر یِنِه که غیرِیَهودییَل هَم مِنِه مسیح عیسی وَ واسطۀ انجیل، هُمارثِن وِ اَعضِی هَمو بَیَنِن وِ شریکِ وعدۀ خدایَن.
7مِ طبقِ عطای فیضِ خدا خادمِ ای انجیل وابییِمِه که وَ طریقِ کارِ قدرتِ وُّ وَ مِ دایَه وابییِه. 8هَرچَن مِ مابینِ تَمومِ ایموندارَل وَ همَه کَمتَرُم، ای فیض وَ مِ عطا وابی تا ای گنجِ بیحَدِحسابِ مسیحَ وَ غیرِیَهودییَل اعلام کِنُم، 9وِ سی هَمَه نَخشۀ سِرّی نَه روشَن کِنُم که مِنِه طولِ دورهیَل وِ طِی خدایی که هَمَه چی نَه آفَری، پوشییَه بی. 10تا وَ طریقِ کلیسا حکمتِ جورواجورِ خدا وَ ری ریاسَتَل وِ قُدرَتَلِ جایَلِ آسمونی آشکار وابو. 11یِه هَمو قَصتی بی که خدا وَ اَزَل داشت که بِی وِه مِنِه خداوندِ ایما مسیح عیسی اَنجوم دا. 12ایما مِنِه مسیح وُ وَ واسطۀ ایمون وَ وُّ، ایتَریم بِی جرأت وِ بِی اِطمینون وَ خدا نِزِنگ وابِیم. 13پَ وَتون تَمنا دارُم وَ خاطرِ عذابَلی که سی ایشا ایکَشُم دِلسرد نَوابِیت، سییِکِه اونگَل باعثِ افتخارِ ایشانِه.
دعا سی قویَتِ روحانی
14سی هَمیو، زونی ایزَنُم دَر برابرِ او بُو آسَمونی 15که هَر خانوادهای مِنِه آسمون وِ ری زمین، وَ وِّ نوم ایگِرِه، 16که طبقِ دولتمندیِ جلالِ خُوش وَتون عطا کِنِه که وَ خاطرِ روحِ خدا، مِنِه باطِنِتون قَوی وِ زوردار وابِیت، 17تا مسیح وَ واسطۀ ایمون مِنِه دِلِتون منزل کِنِه، وِ مِنِه محبت ریشَه کِنیت وِ پاوَرجا وِیسیت، 18تا قویَت داشتَه بِیت که بِی تَمومِ ایموندارَل، پَهنا وِ دِرازا وِ بِلَندی وِ غوریِ محبتِ مسیحَ بِفَمیت. 19وِ محبتِ مسیحَ که بالاتَر وَ درک وُ شناختِ بشری یَه، بِشناسیت تا وَ پُریِ کاملِ خدا لُوریز وابِیت.
20ایسو جلال وَ خدایی بو که ایتَرِه وَ واسطۀ او قویَت که مِنِه ایما کار ایکِنِه، خیلی بیشتَر وَ اوچیئی که ایما بِخِیم یا فِکرِشَه کِنیم، کار کِنِه. 21مِنِه کلیسا وِ مِنِه مسیح عیسی، مِنِه تَمومِ نَسلَل، تا ابدالآباد وَ خدا جلال بو! آمین.
Currently Selected:
نامَه وَ کِلیسِی اَفِسُس 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
