نامَه وَ کِلیسِی کولُسی 3
3
انسانِ تازَه نَه کِنیت وَرِتون
1پَ اَر ایشا بِی مسیح زِندَه وابیئیتِه، وَ دینِ اوچییَلی بِیت که وَ بالایَه، وُچه که مسیح وَ دَسِ راسِ خدا نِشَسِه. 2فکرتونَه بِنیت وَ ری چییَلی که وَ بالایَه، نَه وَ ری چییَلی که وَ ری زمینِه. 3سییِکِه ایشا مُردیتِه وِ زِندِییتون بِی مسیح مِنِه خدا پَنونِه. 4وَختی مسیح که زِندِیی ایشانِه، ظهور کِنِه، اوسِه ایشا هَم بِی وُّ مِنِه جلال ظاهر ایابِیت.
5پَ اوچیئی نَه که مِنِه ایشا زمینی یَه، بِکِشیت: یعنی هرزهای، ناپاکی، شهوت، خواسهیَلِ گَند، و طمع که هَمو بُتپرستی یَه. 6وَ خاطرِ هَمینگَل غضبِ خدا وَ آیَمَلِ تور نازل ایابو. 7ایشا هَم نِهِی یو مِنِه ای چییَل قَیَم اییَگِرُتیت، اوسِه که مِنِه اونگَل زِندِیی ایکِردیت. 8امّا ایسِه ایشا بایِس تمومِ اینگَلَه بِنیت اوبال، یعنی خِشم، غضب، بَدخوایی، بُهتون وِ گَپَلِ زشتی که وَ دِهونِتون ایا وَدَر. 9وَ یَک دِرو نَگِیت، سییِکِه ایشا او انسانی نَه که نِهِی یِه بیئیت بِی کارَلِش وَ وَرتون درآوُردیتِه 10وِ انسانِ تازَه نَه کِردیتِه وَرِتون، که مِنِه شناختی دِرُس هر دَقَه نو ایابو تا مِی آفرینَندَش وابو. 11نو بییَنی که مِنِش یونانی وِ یهودی، ختنَه وابییَه وِ ختنَه نَوابییَه، بَربَر، سَکایی، غلام وِ آزاد دَ معنی نَیارِه، بَلکَم مسیح هَمَه چی وِ مِنِه هَمَه یَه.
12پَ مِی برگزیدهیَلِ خدا که مقدّس وِ عزیزِن، دلسوزی، مِرَبونی، کوچِکنظمی، نَرمی و صبرَ کِنیت وَرِتون. 13یَکَه تحمل کِنیت، وِ یِکدو نَه بویَخشیت، اَر کسی وَ یکی شکایتی دارِه، هَموطو که خداوند ایشا نَه بَخشی، ایشا هَم بایِس یَکَه بُویَخشیت. 14وُ وَ ری تمومِ اینگَل محبتَه کِنیت وَرِتون، که هَمَه چی نَه بِی یَک وَ طورِ کامل وَ یَک پیوند اییِه.
15صلحوُسلامتیِ مسیح وَ دِلِتون حاکم بو، که وَ راسی مِنِه یِه بَیَن سیش خُوندَه وابیئیت. وِ شکرگزار بِیت. 16کلامِ مسیح وَ فراوونی مِنِه ایشا منزل کِنِه، بِی تَمومیِ حکمت، یَکَه نصیحت کِنیت و تعلیم بِئیت، بِی مزامیر وِ سِرویَل وِ آوازَلی که وَ روحِ خدایَه، بِی شکر کِردن وَ تَهِ دلتون سی خدا بِخونیت. 17وِ هر چی ایکِنیت، مِنِه گفتار یا مِنِه کردار، هَمَه نَه وَ نومِ خداوند عیسی کِنیت، وُ وَ واسطۀ وُّ خِدِی بُو نَه شکر کِنیت.
قانونَلی سی خانوادهیَلِ مسیحی
18ای زَنَل، مطیعِ میرِهیَلِتون بِیت، هَموطو که مِنِه خداوند شایستَه یَه. 19ای میرِهیَل، زَنَلِ خِتونَه دوس داشتَه بِیت وِ باشون تندی مَکِنیت. 20ای اولادَل، مِنِه هر چیئی مطیعِ دِیبُوتون بِیت، سییِکِه یِه خداوندَ خشنود ایکِنِه. 21ای بُویَل، بِی اولادَلِتون اوقاتتلخی مَکِنیت، نَکِنه دلسرد وابون. 22ای غلامَل، مِنِه هر چیئی مطیعِ بالادَسَلِ زمینیتون بِیت، نَه وَختی که حَواسِشون وَتون هِسی مِی اونگَلی که وَ دینِ رضایتِ آیَمَلِن، بَلکَم وَ دل وِ بِی ریراسی، وِ بِی ترسِ خداوند. 23هر چه ایکِنیت، وَ دل کِنیت، طوری که انگار سی خداوند ایکِنیت نَه سی مردم، 24سییِکِه دونیت میراثی که پاداشِتونِه وَ طرفِ خداوند وَتون ایرَسِه، ایشا خداوند مسیحَ خذمت ایکِنیت. 25سییِکِه هرکه بَدی کِنِه، سِزِی بَدی که کِردِه اییَرگَردِه وَ خُوش، وِ فَرخجویی مِنِه کار نی.
Currently Selected:
نامَه وَ کِلیسِی کولُسی 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
