نامَه وَ کِلیسِی کولُسی 2
2
1سییِکِه ایخوام بِیونیت که سی ایشا وِ سی اونگَلی که مِنِه لائودیکیَه یَن وِ سی تَمومِ اونگَلی که مِنَه نَدییِنِه، چطو تلاش ایکِنُم، 2تا دلگرم وابون، وِ در حالی که مِنِه محبت بِی یَک متحدِن، وَ تَمومی پُر وابون وَ اِطمینونِ کامل که وَ وسیلۀ فهم وَ دَس ایا وُ وَ ای رَه، سِرِّ خدا یعنی مسیحَ بِشناسِن، 3مِنِه وِّ که تمومِ گَنجَلِ حکمت و شناختِ خدا پَنونِه. 4یِنَه ایگُم تا هیشکَه بِی دَلیلَلی که قانِعتون ایکِنِه، ایشا نَه وَ رَه وِل نَکِنِه. 5سییِکِه هَرچَن مِنِه بَیَن نَه طِیتونُم، امّا مِنِه روح بِی ایشانُم وُ وَ دییَنِ نظم و ایمونِ پاوَرجایی که مِنِه مسیح داریت شایَمونُم.
زِندَه مِنِه مسیح
6پَ هَموطو که مسیح عیسی خداوندَ قبول کِردیت، مِنِه وِّ قَیَم وَگِریت: 7مِنِه وِ ریشَه کِنیت وِ رُشت کِنیت وِ هَموطو که یای گِرُتیتِه، مِنِه ایمون پاوَرجا بِیت، لُوریز بِیت وَ شکر کِردن.
8حَواستون بو تا کسی ایشا نَه بِی فلسفَه وِ حیلۀ پیک گرفتار نَکِنِه، که نَه وَ طبقِ مسیح، بَلکَم وَ طبقِ رسمِ رسومِ بشری وِ طبقِ اصولِ ای دنیا یَه. 9سییِکِه تَمومِ پُریِ ذاتِ الهی وَ شکلِ جسمانی مِنِه مسیح منزل دارِه، 10وِ ایشا پُر وابیئیتِه وَ وُّ، که سَرِ تَمومِ ریاسَتَل وِ قُدرَتَلِه. 11وُ مِنِه وِّ خَتنَه هَم وابیئیتِه، خَتنهای که نَه بِی دَس، بَلکَم بِی وَ وَر دَرآوُردنِ بَیَنِ جسمانی، وَ وسیلۀ ختنۀ مسیح، اَنجوم گِرُتِه. 12بِی وِّ مِنِه تعمید دفن وابیئیت، که مِنِه وِّ هَم بِی وُّ وَ مُردِهیَل زندَه وابیئیت وَ رَه ایمون وَ کارِ پُرقویَتِ خدا، که وِّ نَه وَ مُردِهیَل زِندَه کِه.
13وِ خدا ایشا نَه که مِنِه گِنایَل وِ جسمِ خَتنَه نَوابییِۀ خِتون مُردَه بیئیت، بِی مسیح زِندَه کِه، وِ تَمومِ گِنایَلِ ایما نَه آمرزی، 14وِّ سندِ او قرضی نَه که بِی قانونَلِش وَ ضِدِ ایما بی باطل کِه، وُ وِه نَه وَ بِین بُرد، وِ میخِش کِه وَ صلیب. 15وِّ حاکِمَل وِ قُدرَتَلَه خلعِسلاح کِه وُ وَ ری صلیب بِی پیروز وابییَن وَ اونگَل، وَرِ تییۀ هَمَه رسواشون کِه.
16پَ نَلیت کسی دَرموردِ اوچیئی که ایخَریت وِ اینوشیت، یا دَرموردِ عِید وِ ماهِ نو وِ روزِ شَبات، قضاوَتِتون کِنِه. 17اینگَل سایهای وَ چییَلی یَه که ایایِه، امّا اصلِ اونگَل این مسیح یَه. 18حَواسِتون بو کسی ایشا نَه محروم نَکِنِه، بِی اصرار وَ یِه که بایِس بَیَنَه خوار نِگَه کِه وِ فرشتهیَلَه پرستش کِه. یِه ایطو کسی یِنَه ایخوا که خِشَه بِی رؤیایَلِش سَرگرم کِنِه بییِکِه دلیلی داشتَه بو بِی خیالَلِ بیخودیش غُد ایابو، 19وِ ایطو کسی دَ وَ سَر نَچَسبیِه؛ وَ او سری که تمومِ بَیَن وَ وِّ جون ایگِرِه وُ وَ وسیلۀ مَفصَلَل وِ رگ وُ پِی وَ یَک وصل ایابو وِ طوری که خدا ایخوا رشت ایکِنِه.
20اَر ایشا بِی مسیح نِسوَت وَ اصولِ ای دنیا مُردیتِه، سیچِه اِنگار هَنی مِنِه این ای دنیا زِندِه یِیت، وِ ایرِیت زِرِ بارِ حُکمَلی مِی اینگَل که ایگُ - 21«دَس مَزَن! مِزَه نَکُ، دَس مَنِه!» 22(یِه مربوط وَ چییَلی یَه که بِی استفایَه کِردَن وَ بِین ایرَن)- وَ طبقِ اَوامر وِ تعلیمَلِ بشری. 23هرچَن اینگَل وَختی مِنِه ای دینِ خودساختَه وِ ریاضتِ بَیَن وُ وَ سختی دایَن وَ بَیَن گَپ ایزَنِن، ظاهری حَکیمانَه وَ خِشون ایگِرِن، امّا وَراسی اینگَل نیتَرِن وَرِ خواسهیَلِ جسمَه بِگِرِن.
Currently Selected:
نامَه وَ کِلیسِی کولُسی 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
