نامَه وَ کِلیسِی کولُسی 1
1
1وَ طرفِ پولُس که وَ خواسِ خدا، رسولِ مسیح عیسی یَه، وُ وَ طرفِ کَکامون، تیموتائوس،
2وَ ایموندارَل وِ کَکایَلِ وفادار مِنِه مسیح که مِنِه شهرِ کولُسی یَن:
فیض وِ صلحوُسلامتی وَ طرفِ خدا، بُو ایما، وَ ایشا بو.
شکر کِردن وِ دعا
3ایما همیشَه موقِی که سیتون دعا ایکِنیم، خدا، بُو خداوندمون عیسی مسیح نَه شکر ایکِنیم، 4سییِکِه ایما دَرموردِ ایمونِ ایشا وَ مسیح عیسی وِ محبتی که وَ تَمومِ ایموندارَلِ وَ مسیح داریت، اِشنُفتیم، 5که اینگَل وَ او اِمیدی سرچشمَه ایگِرِه که مِنِه آسمون سیتون نَهایَه وابییِه. که یِنَه وَ نَهاتَر مِنِه کلامِ حقیقت، یعنی انجیل اِشنُفتیتِه، 6انجیلی که وَ ایشا رَسییِه، هَموطو که مِنِه تَمومِ دنیا ثمر ایارِه وِ زیاد ایابو، هَموطو مابینِ ایشا هَم، وَ روزی که وِه نَه اِشنُفتیت وِ فیضِ خدا نَه وَراسی فَمِسیت، کار کِردِه. 7هَموطو که ایشا وِه نَه وَ اِپافراس هُمخذمتِ عزیزِ ایما یای گِرُتیت. وِّ که خادمِ وفادارِ مسیح، وَ طرفِ ایشایَه، 8وُ وِّ ایما نَه هَم وَ محبتِ ایشا که مِنِه روحِ خدا یَه، باخَوَر کِه.
9سی هَمیو، ایما هَم وَ روزی که یِنَه اِشنُفتیم، وَ دعا کِردَن سی ایشا دَس نَکَشیئیمِه، وُ وَ خدا ایخِیم تا بِی شناختِ ارادۀ وُّ، پُر وابِیت وَ هر حکمت و فهمِ روحانی، 10تا طوری رفتار کِنیت که شایستۀ خداوند بو، وُ وِّ نَه وَ هر بابت خوشحال کِنیت: مِنِه هر کارِ خوب ثمر بیاریت وِ مِنِه شناختِ خدا رشت کِنیت؛ 11بِی تَمومِ قویَتی که وَ طبقِ قدرتِ پُرجلالِ وِّنِه، قویَت بِگِریت تا بِی شایی صبر و طاقتِ کامل داشتَه بِیت، 12بُو آسَمونی نَه شکر کِنیت که ایشا نَه قابلِ دونِسِه که مِنِه میراثِ ایموندارَلِ وَ مسیح که مِنِه قلمروِ نورِن، شریک وابِیت. 13سییِکِه ایما نَه وَ قلمرو تاریکی آزاد کِردِه وِ نَهایِه مِنِه پادشاییِ کِرِ عزیزِش، 14که مِنِه وِّ ایما آزادی داریم که بخششِ گِنایَلِمونِه.
شخصیت وِ کارِ مسیح
15وِّ شکلِ خِدِی نادیدَه یَه، اَوَلزا جلوتَر وِ بالاتَر وَ تمومیِ آفرینش. 16سییِکِه هَمَه چی وَ واسطۀ وِّ آفرییَه وابی، مِنِه آسمون وِ ری زمین، چییَلی که ایابو بِوینیشون وِ چییَلی که نیابو بِوینیشون، چه تاجِتَختَل یا سَلطَنَتَل یا ریاسَتَل یا قدرَتَل - همَه چی وَ واسطۀ وُّ وِ سی وِّ آفرییَه وابی. 17وِّ نِهِی همَه یَه، وِ مِنِه وُّ همَه چی بِی یَک نِگَه داشتَه ایابون. 18وُ وِّ سَرِ بَیَن، یعنی کلیسا یَه. وِّ شروعِه، اَوَلزا وَ مُردِهیَل، تا مِنِه هَمَه چی وِّ سَر بو. 19در واقع تمومیِ پُریِ خدا خشنود بی که مِنِه وِّ منزل کِنِه، 20وُ وَ واسطۀ وُّ همَه چی نَه بِی خُوش صلح بییِه، چه ری زمین وِ چه مِنِه آسمون، بِی خینِش وَ ری صلیب صلح دایِه.
21وِ ایشا، که نِهِی یِه بِی خدا بیگانَه، وِ مِنِه فکرِتون باش دشمن بیئیت، وِ یِه مِنِه کارَلِ گَندِتون دیار بی، 22ایسو وِّ ایشا نَه بِی مرگش مِنِه بَیَنِ جسمانیِ خُوش صلح دایِه، تا ایشا نَه مقدس وِ بیعیب وِ بی هیچ مَزِمَت، بیارِه وَ حضورِ خدا، 23اَر وَراسی ایشا مِنِه ایمون هَمیطو قرص وُ پاوَرجا وِیسیت، وُ وَ اِمیدِ انجیلی که اِشنُفتیت جُم نَخَریت، انجیلی که وَ تمومِ خلقتِ زِرِ آسمون اعلام وابییِه، وِ مو پولُس، خادمِش وابییِمِه.
خذمتِ پولُس وَ کلیسا
24ایسو وَ عذابَلی که سی ایشا ایکَشُم، شایی ایکِنُم، وُ وَ خاطرِ بَیَنِ وُّ یعنی کلیسا، اوچیئی که مِنِه عذابَلِ مسیح کَمِه، مِنِه جسمِ خوم پِر ایکِنُم، 25که طبقِ خذمتِ نظارت که وَ طرفِ خدا وَم دایَه وابی، خادمِ ای کلیسا وابییُم، تا کلامِ خدا نَه وَ تَمومی بشناسونُم، 26یعنی سِرّی که وَ تَمومِ دورِهیَل وِ نَسلَلِ نَهاتَر پَنون وابییَه بی، امّا ایسو سی ایموندارَلِ وَ مسیح آشکار وابییِه. 27که خدا خواس تا وَشون بِشناسونِه که ای سِر چه جلالِ عظیمی مابینِ غیریهودییَل دارِه، ای سِر یِنِه که مسیح مِنِه ایشا یَه وِ اِمیدِ جلالِه.
28ایما وِّ نَه اعلام ایکِنیم، وُ وَ همَه هشتار ایئیم وِ بِی حکمتِ کامل وَ همَه تعلیم ایئیم، تا همَه نَه مِنِه مسیح، بالغ بیاریم طِی خدا. 29سی یِنِه که مِ زحمت ایکَشُم وِ بِی قویَتِ وُّ که مِنِه مو بِی قویَت کار ایکِنِه، تلاش ایکِنُم.
Currently Selected:
نامَه وَ کِلیسِی کولُسی 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
