نُومَه وِ کلیسا غَلاطیَه 4
4
کُرُو وَ وارِثیا
1منظورِم یِنَهآ: تا زِمُونی کِه وارث، صغیر اَ، هیچ فرقی وا غُلِم نارَه، هَر چَن او صِحُو همَه چی با. 2اما تا زِمُونی کِه بُوَهش تعیین کِردَه، سَرپِرَسیش ها وا قَیِمیا وَ وکیلوَصییا. 3هِه وِ چِنی اِیما هَم، هِه کِه صغیر بیییم، غُلِمِ قانونیا ایی دنیا بیییم. 4اما هِه کِه زِمُونِ تعیینبییَه تمُومِکمال رَسِس، خدا کُرِ خُوشِه کِل کِرد، کِه دِ یِه زَ وَ دِ قیدِبَنِ شریعت اُوما وِ دی، 5تا وِنُونی نِه که دِ قیدِبَنِ شریعت بییِن راهائی بِئَه، تا اِیما دِ مقامِ کُرُو حَقِ فرزندخواندگی نِصیوِمُو بوئَه. 6وَ دِ اوچِه کِه شِما اُولادیا هیسیت، خدا روحِ کُرِ خُوشِه کِل کِرد وِ مینِ دِلیامُو کِه دَنگ وِرمیارَه، «اَبا! بُوَه!» 7پس تو دَ غُلِم نیسی، بلکِم کُری؛ وَ اَر کُری، خدا تو نِه وارث کِردَه.
دِلدِهولی پولُس سی کلیسا غَلاطیا
8دِ نِهاتِر زِمُونی کِه خدا نِه نِمیشناختیت، غُلِمِ چیائی بیئیت کِه ذاتاً خدا نیسِن. 9اما ایسِه کِه خدا نِه میشناسیت، یا بیتِر اَ بُوئِم، خدا شِما نِه میشناسَه، چطور اَ کِه دُوارَه وِرمیگَردیت وا لا او قانونیا سُس وَ بیارزشِ ایی دنیا وَ میحایت هَنی غُلِمِ وِنُو بایت؟ 10روزیا وَ ماهیا وَ مُوسِمیا وَ سالیا نِه نِئَه میاریت! 11زَلَهم مِیرَه نَکَه بیخُودی سیتُو زَمَت کَشیوئِم.
12اِ بِرارُو، میلالکِم وِتُو بوئیت چی مِه، سی یَکه مِه هَم بیئِم چی شِما. شِما دِ حَقِم هیچ گَنی نَکِردیت. 13شِما دُونیت وِ سُنَه ناخُوشیای کِه دِ بدنِم بی، اول پِیغُومِ انجیل نِه سی شِما موعظَه کِردِم. 14وَ هرچَن وضعِ حالِ مِه اِمتحُونی بی سی شِما، مِه نِه کُچِک وُ بیقُرپِم نَکِردیت، بلکِم مِه نِه هِه چی یِه فرشتَه خدا قبول کِردیت، هِه مَرِس مسیح عیسی نِه قبول میکیت. 15پس او هورِمیتُو ها کجا؟ سی یَکه مِه دِ بارَه شِما شاهادَتی مِیئِم کِه، اَر مِوی، چَشیاتُو نِه دِرمِیاُوِردیت میدِئیت وِ مِه. 16پس یعنی ایسِه کِه حقیقت نِه وِتُو مُوئِم بیمَه وِ دُشمِهنِتُو؟
17وِنُو سیتُو غیرت دارَن، اما نَه وا نیتِ خو. وِنُو میحان شِما نِه جِگا بَکَن تا سی خُوشُو غیرت داشتوئیت. 18غیرت داشتِه خو اَ، وِ شرطی کِه همیشِهئی وَ وا نیتِ خو با، نَه تَنیا زِمُونی کِه مِه هام وِ تِهتُو. 19اِ رولَهیا، مِه هَنی ژُ دارِم تا زِمُونی کِه مسیح دِ شما شکل بِئیرَه، 20کاش ایسِه مِه وِ تِهتُو بیئِم وَ جوری هَنی واتُو قِصَه میکِردِم، سی یَکه سَر وِم شیوَنیتَه.
بَردَه وَ آزاد
21وِم بُوئیت، شِما کِه میحایت دِ قیدِبَنِ شریعت بایت، یعنی وِ او چیئی کِه شریعت مُوئَه گوش نِمِیئیت؟ 22سی یَکِه دِ تورات نیسَنَه بییَه کِه ابراهیم دو کُر داشت، یَکی دِ کنیز وَ او یَکی دِ زنِ آزاد. 23اما کُری کِه دِ کنیز بی دِ طریقِ بشری اُوما وِ دی؛ دِ حالی کِه کُری که دِ زَنِ آزاد بی، بِنا وِ وَعدَه اُوما وِ دی.
24یَه نِه موئَه مَثَلوار گُت: ایی دو زَ، دو عَهد اَن. یَکی دِ کُوء سینا میا، بَچُونی سی غُلِمی میارَه وِ دی؛ وَه هاجر اَ. 25ایمدال ایی هاجر کُوء سینا اَ، دِ دیارِ عِرَب، وَ چی اورشلیمِ ایسِهنَه کِه خُوش وَ بَچُونِش غُلِم اَن. 26اما اورشلیمِ بالا آزاد اَ، کِه داآ اِیمانَه. 27سی یَکِه دِ کِتُوِ اِشعَیا نبی نیسَنَه بییَه:
«اِ مَزا، کِه نِمِیزائی، شایی کُو؛
دَنگ وِراریت وُ بَنیت وِ هِلهِلَه کِردِه، شِما کِه ژُ نَکَشیئیتُونَه!
سی یَکِه بَچُونِ او زَ تاربییَه بیشتِر موئَن
دِ بَچُونِ زَ مِیرَهدار.»
28اِیمدال شِما اِ بِرارُو، چی اسحق بَچُونِ وَعدَهآیت. 29اما هِه چِنُو کِه دِ او زِمُو، کُری کِه دِ طریقِ بشری اُومایی وِ دی، وَه نِه کِه دِ روحِ خدا اُومایی وِ دی چِزَن، ایسِه هَم هِه چِنینَه. 30اما تورات چی مُوئَه؟ «کنیز وَ کُرِشِه تار کُو، سی یَکِه کُرِ کنیز وا کُرِ آزاد هُماِرث نِموئَه.» 31پس اِ بِرارُو، اِیما بَچُونِ کنیز نیسیم، بلکِم دِ زنِ آزادیم.
Currently Selected:
نُومَه وِ کلیسا غَلاطیَه 4: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
