نُومَه وِ کلیسا غَلاطیَه 5
5
مسیح اِیما نِه آزاد کِرد
1سی آزادی بی کِه مسیح اِیما نِه آزاد کِرد؛ پس سِمِر بِسیت وَ هَنی نِفتیت دِ گیرِ سیمکَه بَردِئی.
2سِ! مِه، پولُس، وِتُو مُوئِم کِه اَر ختنَه بایت، مسیح هیچ نفعی سیتُو نارَه. 3وَ مِه دُوارَه وِ هَر کَه کِه ختنَه بوئَه شاهادَتی مِیئِم کِه بایِس گِردِ شریعتِ نِه نِئَهدارَه. 4شِما دِ مسیح جِگا بیییتَه، شِما کِه میحایت وا شریعت صالح وِ حِسُو بیایت، شما دِ فیض دیر اُفتاییتَه. 5سی یَکه اِیما توسطِ روحِ خدا، وا ایمُو، چَش وِ رَه او صالحبییِه هیسیم کِه اُمیدِمُو ها وِش. 6سی یَکه دِ مسیح عیسی نَه ختنَهبییِه چیئی اَ وَ نَه ختنَهنِویِه، بلکِم مهم ایمُونی اَ کِه وِ محبت کار میکَه.
7شِما خو مینِئایت وادو! کی نِهاتُو نِه گِرِت تا مطیعِ حقیقت نوئیت؟ 8یَکِه شِما وِ چِنی قانِع بیئیتَه دِ لا وَه کِه شِما نِه دعوت مِئیرَه نی. 9«تیکِلُوجِهای خمیرتُرش، گِردِ خمیرِ نِه وِرمیارَه.» 10مِه دِ خداوند وِ شِما اِطمینُو دارِم کِه شِما هیچ عقیدَه هَنیای قبول نِمیکیت؛ وَ کسی کِه سَر وِتُو میشیونَه، هَر کَه کِه با، سِزاشِه مِئینَه. 11اما بِرارُو، اَر مِه هَنی ختنَه نِه موعظَه میکِم، اَ سی هَنی عَذُو مِئینِم؟ پس اَر چِنی میکِردِم دَ کَس دِ پِیغُومِ صلیب وِش بَرنِمیحَرد. 12کاش وِنُو کِه سَر وِتُو میشیونَن، خُوشُو نِه اَختَه میکِردِن!
13سی یَکِه بِرارُو، شِما دعوت بییتَه وِ آزادی، اما حَواسِتُو با! آزادیتُو مِجالی نوئَه سی جسم، بلکِم وِ محبت، یَکتِری نِه خدمت بَکیت. 14سی یَکه گِردِ شریعت خلاصَه موئَه دِ یِه حُکم :«هُمساتِه هِه چی خُوت دوس داشتو.» 15اما اَر یَکتِری نِه گَزَه بِئیریت وَ قیت بِئیت، حَواسِتُو با کِه وِ دَسِ یَکتِری نابود نوئیت.
زِنِهئی وا روحِ خدا
16اما مِه مُوئِم، وِ روحِ خدا رفتار بَکیت، اوسِه حاسَهیا جسمِ نِه وِجا نِمیاریت. 17سی یَکه حاسَهیا جسم بَرخِلافِ روحِ خدا اَ، وَ حاسَهیا روحِ خدا بَرخِلافِ جسم اَ؛ سی یَکِه یِنُو هان وِ تیشکِ یَکتِری، وِ جوری کِه دَ نَتُونیت هَر چی کِه میحایت، بَکیت. 18اما اَر وا روحِ خدا هدایت موئیت، شِما دِ قیدِبَنِ شریعت نیسیت.
19ایمدال کاریا جسم دیاری اَ: بیعفتی، ناپاکی، هَرزِئی، 20بُتپِرَسی، جادوگری، دُشمِنی، مِرافَه، حَسیدی،کاریا دِ ری غیظ، هُمالی کِردِه، جِگائی، دَسَهبَنی، 21حَسیدی، مَسی، عیاشی، وَ چیائی چی یِنُو. وِتُو هُشتار مِیئِم، چِنُو کِه نِهاتِر وِتُو هُشتار دَم، کَسُونی کِه چِنی کاریائی میکَن پاتشائی خدا نِه نِمُورَن وِ میرات.
22اما ثمرَه روحِ خدا، محبت، شایی، صُولوُسِلامتی، صُور، مِرَبُونی، خوئی، بَفاداری، 23مِلومی وَ خودداری اَ؛ هیچ شریعتی وِ تیشکِ یِنُو نی. 24ایمدال وِنُو کِه هینِ مسیح عیسی اَن، جسمِ نِه واردِ هَوَسیا وَ حاسَهیاش کَشینَه وِ صلیب. 25اَر وِ روحِ خدا زِنِهئی میکیم، وِ روحِ خدا هَم رفتار بَکیم. 26قُمپُز نوئیم، تا یَکتِری نِه نیاریم وِ غیظ، وَ وِ یَکتِری حَسیدی نَکیم.
Currently Selected:
نُومَه وِ کلیسا غَلاطیَه 5: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
