نُومَه وِ کلیسا غَلاطیَه 3
3
صالح بییِه وا ایمُو
1اِ غَلاطیا نَفَهم، کی جادوتُو کِردَه؟ مرگِ عیسی مسیح چِنُو وِ روشِنی سیتُو گُتِس کِه مَرِس او هِه دِ وَرِ چَشیاتُو بی وِ صلیب. 2تَنیا یَه نِه میحام دِتُو دُونِسوئِم: یعنی روحِ خدا نِه وا کاریا شریعت گِرِتیت یا وا ایمُو وِ او چیئی کِه اِشنَفتیت؟ 3یعنی ایقَه نَفَهمیت؟ وا روح شروع کِردیت، ایسِه میحایت وا جسم کامل بایت؟ 4یعنی گِردِ ایی عَذُویا بیخُودی وِ سَرتُو رَت؟ اَر وِراسی بیخُود با؟ 5پس وَه کِه روح نِه مِیئَه وِتُو وَ دِ مینِتُو معجزَهیا میکَه یعنی یِنُو نِه دِ کاریا شریعت میکَه یا دِ ایمُو وِ اوچیئی کِه اِشنَفتیت؟ 6هِه چِنُوکِه ابراهیم «وِ خدا ایمُو اُوِرد وَ یَه سیش صالح بییِه وِ حِسُو اُوما.» 7پس مِئینیت یِنُو کِه ایمُو دارَن بَچُونِ ابراهیم اَن. 8وَ تورات دِ نِهاتِر دی کِه خدا غیرِیهودیُو نِه وِ ایمُو، صالح وِ حِسُو میارَه، پس دِ نِهاتِر ایی خَوَرِه دَه وِ ابراهیم کِه «گِردِ ملتیا وِ واسطَه تو برکت مِئیرَن.» 9پس وِنُو کِه تَکِشُو ها وِ ایمُو، وا ابراهیم، او پیا ایمُو، برکت مِئیرَن.
10سی یَکِه گِردِ وِنُو کِه تَکِشُو ها وِ کاریا شریعت، هان وِ زیرِ لعن، سی یَکه دِ کِتُوِ تورات اُومایَه کِه: «لعن وِ هَر کَه کِه وِ گِردِ او چیائی کِه دِ تورات نیسَنَه بییَه سِمِر نِسَه وَ وِنُو نِه وِجا نیارَه.» 11ایمدال، دیار اَ کِه هیشکَه دِ تِه خدا توسطِ شریعت، صالح وِ حِسُو نِمیا، سی یَکِه «آیِمِ صالح وِ ایمُو زِنِهئی میکَه.» 12اما شریعت دِ ایمُو نی، بلکِم «وَه کِه وِنُو نِه وِجا میارَه، دِ وِنُو زِنِهئی میکَه.» 13مسیح دِ جالِ اِیما لعن بی وَ وِ چِنی اِیما نِه دِ لعنِ شریعت دِ سَرِ نو خَری، چِنُو کِه دِ تورات اُومایَه کِه: «لعن وِ وَه کِه دِ دار دُرِش بَکَن.» 14او چِنی کِرد تا برکتِ ابراهیم دِ مسیح عیسی نِصیوِ غیرِیهودیُو با، وَ تا اِیما او وَعدَه روحِ نِه دِ رَه ایمُو بِئیریم.
شریعت وَ وَعدَه خدا
15اِ بِرارُو، بِئیلیت وا مَثَلی معمولی سیتُو بُوئِم. عَهدی کِه انسان مینِئَه، هِه کِه رسمی بی، هیشکَه نَتُونَه او نِه باطل بَکَه یا شرطی بُونَه ریش. 16ایمدال، وَعدَهیا وِ ابراهیم وَ وِ نسلِ او گُتِس وَ نِمُوئَه «وِ نسلیا،» چِنُو کِه مَرِس دِ بارَه خیلییا با، بلکِم مُوئَه: «وِ نسلِ تو» کِه منظور یِه نفر اَ، یعنی مسیح. 17میحا یَه نِه بُوئِم کِه: شریعت کِه چارصد وُ سی سال دِما وَه اُوما، عَهدی نِه کِه خدا دِ نِهاتِر بَستی، باطل نِمیکَه، تا وَعدَه نِه باطل بَکَه. 18سی یَکه اَر میرات دِ شریعت با، دَ دِ وَعدَه نی؛ اما خدا وَه نِه دِ وَعدَه دَه وِ ابراهیم.
19پس شریعت چینَه؟ شریعت وِ سُنَه خَبطیا اُوما، وَه هَم تَنیا تا زِمُونِ اُومایِهنِ او «نسل» کِه وَعدَهشِه وِش دِئین، شریعت توسطِ فرشتَهیا وَ وِ دَسِ یِه مینَهداری، برقِرار بی. 20ایمدال هیچ مینَهداری، تَنیا نِمایندَه یِه طِرَف نی، اما خدا یَکی اَ.
21پس یعنی شریعت بَرخِلافِ وَعدَهیا خدا اَ؟ حَتمی نَه! سی یَکه اَر شریعتی مِیدَن کِه میتُونِس زِنِهئی بِئَه، اوسِه وِراسی هَم صالحبییِه دِ رَه شریعت مِوی. 22اما کِتُو مقدس مُوئَه کِه همَه چی ها دِ قَپِ گُنَه، تا او وعدِهای کِه دِ ایمُو وِ عیسی مسیح اَ، دِئَه با وِ وِنُو کِه ایمُو میارَن.
23اما وِرَز یَکِه ایمُو بیا، وِ زیرِ سلطَه شریعت اسیر بیئیم وَ تا دیاری بییِهنِ ایمُو دِ بَن بیئیمُو. 24پس شریعت بی وِ تایَه اِیما تا اوسِه کِه مسیح بیایَه وَ دِ ایمُو صالح وِ حِسُو بیایم. 25اما ایسِه کِه ایمُو اُومایَه، دَ زیر دسِ او تایَه نیسیم.
26سی یَکه دِ مسیح عیسی، گِردِ شِما وِ واسطَه ایمُو، کُرُونِ خدائیت. 27سی یَکِه گِردِ شِما کِه دِ مسیح تعمید گِرِتیت، مسیح نِه کِردیتَه دِ وَر. 28نَه یهودی هی نَه یونانی، نَه غُلِم نَه آزاد، نَه پیا نَه زَ، سی یَکه گِردِ شِما دِ مسیح عیسی یَکی هیسیت. 29وَ اَر شِما هینِ مسیحایت، پس نسلِ ابراهیمایت وَ بِنا وِ وَعدَه، وارثیائیت.
Currently Selected:
نُومَه وِ کلیسا غَلاطیَه 3: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
