۱پادشاهلار 3
3
سولیمانین تاریدان حئکمت ائستمهسی
(۲سال. ۱:۳-۱۲)
1سولیمان مئصئر پادشاهی فئرعونلا موتّفئق اولوب قیزینی آرواد آلدی. فئرعونون قیزینی داوودون شهرئنه گتئردی و اؤز سارایینی، ربّئن معبدئنی و اورشلئمئن اطرافینداکی دوواری تئکئب قورتارانا قدر، اونو اورادا ساخلادی. 2لاکئن خالق حله ده پرستئشگاهلاردا قوربان تقدئم ادئردئلر، چونکی او گونلره قدر ربّئن آدینا تئکئلمئش بئر معبد یوخ ائدی. 3سولیمان ربّی سِوئردی و آتاسی داوودون قایدالارینا موطابئق یاشاییردی، آنجاق پرستئشگاهلاردا دا قوربان تقدئم ادئب، بوخور یاندیریردی.
4پادشاه قوربان تقدئمی اوچون گئبعونا گتدی، چونکی اورا پرستئشگاهلارین لاپ بؤیوکو ائدی. سولیمان او قوربانگاهدا مئن باش یاندیرما قوربانی تقدئم اتدی. 5گئبعوندا رب سولیمانا گجه یوخوسوندا گؤروندو. تاری ددی: «نه ائستهیئرسن، سنه ورئم؟» 6سولیمان ددی: «سن قولون آتام داوودا بؤیوک شفقت گؤرسدئبسن، چونکی او سنئن حوضوروندا صداقت، صالحلئک، و اورَک دوغرولوغو ائله یاشادی. بو گون ده تختئنده اوتوران بئر اوغول ورمکله اونا اؤز بؤیوک مهرئبانلیغینی ساخلاییبسان. 7ائندی، یارب تاریم، بو قولونو آتام داوودون یرئنه پادشاه ادئبسن حال بو کی، من کئچئک بئر اوشاغام، نه ادئب-اتمهجیئمی بئلمئرم. 8قولون سنئن سچدئیئن خالقین آراسیندادیر؛ اله بؤیوک بئر خالق کی، ساییسیز-حسابسیزدیر. 9بونا گؤره منه اله بئر درّاکهلی اورَک ور کی، یاخشی ائله پئسی آییرد ادئب سنئن خالقینا حؤکم اده بئلئم. چونکی سنئن بو بؤیوک خالقینا کئم حؤکم اده بئلر؟» 10سولیمانین بو ائستهیی ربّئن گؤزونه خوش گلدی. 11تاری اونا ددی: «چونکی بونو ائستهدئن و اؤزون اوچون اوزون عؤمور، وار-دؤولت، یا دا دوشمنلرئنئن جانینی ائستمهدئن، بونلارین یرئنه درّاکه ائستهدئن کی، عدالتی آییرد ادهسن، 12باخ، من ائستهیئنی یرئنه یتئرمئشم: باخ، سنه اله بئر حئکمتلی و درّاکهلی اورَک ورمئشم کی، سنئن کئمئسی نه سندن اوّل اولموش، نه ده سندن سونرا اولاجاق. 13سنه ائستمهدئیئنی ده ورمئشم؛ هم وار-دؤولتی، هم ده جاه-جلالی. بله کی بوتون عؤمرون بویو پادشاهلار آراسیندا سنئن کئمئسی اولمایاجاق. 14اگر سن آتان داوود کئمی قایدالاریما و امرلرئمه عمل ادئب یوللاریملا گدهسن، او زامان عؤمرونو اوزاداجاغام.»
15سولیمان اویاندی. گؤردو کی، بو، بئر یوخو ائدی. اورشلئمه گلدی و ربّئن عهد ساندیغینین قاباغیندا دوروب، یاندیرما و باریش قوربانلاری تقدئم اتدی و بوتون اعیانلاری اوچون ضئیافت وردی.
سولیمانین حئکمتله حؤکم ورمهسی
16بئر گون ائکی فاحئشه آرواد گلئب پادشاهین حوضوروندا دوردولار. 17آروادلاردان بئری ددی: «آی آغام! من و بو آرواد بئر اِوده یاشاییریق. بو آرواد اِوده اولارکن بئر اوشاق دوغدوم. 18دوغدوغوم گوندن اوچ گون سونرا بو آرواد دا بئر اوشاق دوغدو. اِوده فقط ائکئمئز ائدئک. بئزدن آیری هچ کس یوخ ائدی. 19گجهنئن عرضئنده بو آروادین اوغلو اؤلدو، چونکی آرواد یوخودا اونون اوستونه دوشدو. 20سنئن بو کنئزئن یوخودا ائکن، گجه یاریسی بو آرواد قالخیب اوغلومو یانیمدان گؤتوردو و اؤز قوینونا آلیب، اؤلو اوغلونو منئم قوینوما قویدو. 21سحر اوغلومو اَمئزدئرمک اوچون دوراندا گؤردوم کی، او اؤلوب. آمّا سحر دئقّتله باخاندا بئلدئم کی، بو منئم دوغدوغوم اوشاق دیئل.»
22سونرا او بئری آرواد ددی: «یوخ، صاغ اولان اوشاق منئم اوغلومدور و اؤلَن سنئنکیدئر.» لاکئن بئرئنجی آرواد ددی: «یوخ، اؤلَن اوشاق سنئن اوغلوندور، صاغ اولان منئمکیدئر.» پادشاهین حوضوروندا اونلار بلهجه موباحئثه ادئردئلر.
23او واخت پادشاه ددی: «بئری دیئر، صاغ اولان اوشاق منئم اوغلومدور، اؤلَن سنئنکیدئر؛ او بئری ده دیئر، یوخ! اؤلَن اوشاق سنئن اوغلوندور، صاغ اولان منئمکیدئر.» 24پادشاه ددی: «منه بئر قیلینج گتئرئن!» پادشاهین حوضورونا بئر قیلینج گتئردئلر. 25پادشاه ددی: «صاغ اولان اوشاغی ائکی یره بؤلون، یاریسینی بئرئنه، یاریسینی دا او بئرئنه ورئن!» 26اوغلو صاغ اولان آرواد، بالاسی اوچون اورهیی یاندیغینا گؤره، پادشاها بله ددی: «آمان، آغام، صاغ اولان اوشاغی اونا ورئن، اوشاغی اؤلدورمهیئن.» لاکئن او بئری ددی: «قوی نه اونون اولسون، نه منئم. بؤلون.» 27او واخت پادشاه ددی: «صاغ اولان اوشاغی بئرئنجی آروادا ورئن، اونو اؤلدورمهیئن، اوشاغین آناسی اودور.»
28بوتون ائسرایئللیلر پادشاهین وردئیی حؤکمو اشئدئب اونا چوخ حؤرمت اتدئلر، چونکی گؤردولر کی، عدالته عمل اتمک اوچون اوندا تارینین حئکمتی وار.
Currently Selected:
۱پادشاهلار 3: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
