۱پادشاهلار 2
2
داوودون سولیمانا وصئیّتی
1داوودون اؤلوم گونو یاخینلاشاندا، اوغلو سولیمانا وصئیّت ادئب ددی: 2«بو یاخینلاردا من ده هامی کئمی دونیادان گدهجیم. بونا گؤره مؤحکم و ائگئد اول. 3تارین ربّئن طلب اتدئکلرئنی یرئنه یتئر: اونون یولو ائله گت. اونون قایدالارینا، امرلرئنه، حؤکملرئنه و شهادتلرئنه، موسانین شرئعت کئتابیندا یازیلدیغی کئمی، عمل ات کی، اتدئیئن هر ائشده و گتدئیئن هر یرده اوغور قازاناسان. 4او واخت رب منه وردئیی بو سؤزو یرئنه یتئرهجک: ”اگر اؤولادلارین اؤز یوللارینا دئقّت اتسهلر، بوتون اورَکلری و جانلاری ائله منئم حوضورومدا حقئقتله یِرئسهلر، ائسرایئل تختئنده سنئن نسلئندن بئر کئشی اَسکئک اولمایاجاق.“
5سن صِرویا اوغلو یوآبین منه نه اتدئیئنی ده بئلئرسن: ائسرایئل قوشونونون ائکی باشچیسی نِر اوغلو آبنِرله یِتِر اوغلو عَماسانی اؤلدوروب، صولح زامانی حرب قانی تؤکدو و بِلئندهکی کمرله آیاغینداکی چاریقلاری قانا بولاشدیردی. 6سن اؤز حئکمتئنه گؤره رفتار ات، قویما اونون آغارمیش باشی اؤلولر دئیارینا سالامات ائچئنده اِنسئن.
7لاکئن گئلعادلی بَرزئللهیئن اوغوللارینا محبّت ات، قوی سوفرَنده یمک یئیَنلر آراسیندا اولسونلار. چونکی من قارداشین اَبشالومون قاباغیندان قاچدیغیم واخت، اونلار منه کؤمک اتدئلر.
8باخ، بَخورئمدن اولان بِنیامئنلی گِرا اوغلو شئمعی سنئن یانیندادیر. او ائدی کی، مَخهنایئمه گتدئیئم گون منه برک لعنت اتدی. لاکئن سونرا منی پئشواز اتمک اوچون اوردون چایینا گلنده، من اونا ربّئن حاقّی اوچون آند ائچئب ددئم: ”سنی قیلینجلا اؤلدورمیهجیم.“ 9ائندی اونو جزاسیز قویما، چونکی سن حئکمتلی آدامسان و اونا نه ادهجیئنی بئلئرسن و اونون آغارمیش باشینی قان ائچئنده اؤلولر دئیارینا اِندئرَرسن.»
داوودون اؤلومو
10داوود اؤلوب آتالاری ائله یاتدی و داوودون شهرئنده باسدیریلدی. 11داوودون ائسرایئل اوستونه پادشاهلیق اتمهسی قیرخ ائل سوردو: یدّی ائل خِبروندا و اوتوز اوچ ائل ده اورشلئمده پادشاهلیق اتدی. 12سولیمان، آتاسی داوودون تختئنده اوتوردو و اونون پادشاهلیغی مؤحکم بئر شکئلده برقرار اولدو.
اَدونئیانین اؤلدورولمهسی
13خَگّئت اوغلو اَدونئیا سولیمانین آناسی بَتشِبَعئن یانینا گتدی. بَتشِبَع اوندان سوروشدو: «آیا خیئرله گلئرسن؟» اَدونئیا جاواب وردی: «بلی.» 14سونرا ددی: «سنه دئیهجک سؤزوم وار.» بَتشِبَع ددی: «دِه.» 15اَدونئیا ددی: «سن بئلئرسن کی، پادشاهلیق منئم ائدی و بوتون ائسرایئل منئم پادشاه اولاجاغیمی گؤزلهیئردی، آمّا هر شی دَیئشدی، پادشاهلیق قارداشیمین اَلئنه کچدی، چونکی ربّئن طرفئندن اونون ائدی. 16ائندی سندن بئر خاهئشئم وار، منه ”یوخ“ دِمه». بَتشِبَع اونا ددی: «دِه.» 17او ددی: «خاهئش ادئرم، سولیمان پادشاهلا دانیش، او سنه ”یوخ“ دِمَز، اونا ده کی، شونِملی اَبئشَگی منه آرواد اولماق اوچون ورسئن.» 18بَتشِبَع ددی: «یاخشی، من سنئن حاقّیندا پادشاهلا دانیشارام.»
19بَتشِبَع سولیمان پادشاهین یانینا گتدی کی، اَدونئیا بارهده اونونلا دانیشسین. پادشاه اونون پئشوازینا آیاغا قالخدی و اونا تعظئم اتدی، سونرا تختئنه اوتوردو. پادشاه آناسی اوچون ده بئر تخت قویدوردو. او دا پادشاهین ساغیندا اوتوردو. 20سونرا ددی: «منئم سندن کئچئک بئر خاهئشئم وار، منه ”یوخ“ دِمه.» پادشاه اونا ددی: «سوروش آنام، من سنه ”یوخ“ دِمهرم.» 21بَتشِبَع ددی: «قوی شونِملی اَبئشَگ قارداشین اَدونئیایا آرواد اولماق اوچون ورئلسئن.» 22سولیمان پادشاه آناسینا جاواب ورئب ددی: «نئیه شونِملی اَبئشَگی اَدونئیا اوچون ائستهیئرسن؟ پادشاهلیغی دا اونون اوچون ائسته، او منئم بؤیوک قارداشیمدیر، اونا، کاهئن اِبیاتارا، صِرویا اوغلو یوآبا!» 23سولیمان پادشاه ربّئن حاقّی اوچون آند ائچئب ددی: «اگر اَدونئیا بو سؤزو اؤز حیاتی باهاسینا دِمهمئشسه، تاری منه بله و بوندان بَتَرئنی اتسئن. 24ائندی او وار اولان ربّه کی، منی مؤحکملَندئرئب آتام داوودون تختئنده اوتورتموش و ددئیی کئمی منه بئر اِو قورموش، آند اولسون کی، اَدونئیا قطعن بو گون اؤلدورولهجک!» 25سولیمان پادشاه یِهویاداع اوغلو بِنایایا امر اتدی. بِنایا دا گدئب اَدونئیانی ووردو و او اؤلدو.
اِبیاتارین قووولماسی و یوآبین اؤلومو
26پادشاه، کاهئن اِبیاتارا ددی: «عَناتوتا، اؤز زَمئلرئنه گت! سن اؤلومه لایئقسن، آمّا بو گون سنی اؤلدورمیهجیم، چونکی سن آتام داوودون قاباغیندا پروردئگار ربّئن ساندیغینی داشیدین و آتامین چکدئیی هر عذابی سن ده چکدئن.» 27بلهجه سولیمان اِبیاتاری ربّئن کاهئنلئیئندن قوودو. بونونلا دا ربّئن شئلودا عِلی اِوئنئن ضئدّئنه ددئیی سؤز یرئنه یتئشدی.
28خبر یوآبا چاتدی. یوآب اَبشالوما قوشولمادیغی حالدا، اَدونئیانین طرفئنی توتموشدو. بونا گؤره ده او، ربّئن عئبادت چادیرینا قاچدی و قوربانگاهین بوینوزلاریندان یاپیشدی. 29سولیمان پادشاها ددئلر کی، یوآب ربّئن عئبادت چادیرینا قاچیب و ائندی قوربانگاهین یانیندادیر. سولیمان یِهویاداع اوغلو بِنایانی گؤندَرئب ددی: «گت، اونو اؤلدور.» 30بِنایا ربّئن عئبادت چادیرینا گلئب یوآبا ددی: «چیخ! پادشاه بله دیئب!» یوآب ددی: «یوخ، بورادا اؤلهجیم.» بِنایا پادشاها خبر گتئرئب ددی: «یوآب بله ددی و منه بو جاوابی وردی.» 31پادشاه اونا ددی: «اونون ددئیی کئمی ات؛ اونو اؤلدور و باسدیر کی، یوآبین سببسئز تؤکدویو قانین تقصئرئنی منئم و آتامین اِوی اوستوندن گؤتورهسن. 32رب اونون قانینی اؤز باشینا دؤندَرهجک، چونکی او اؤزوندن داها صالح و داها یاخشی اولان ائکی نفری قیلینجلا ووردو: آتام داوودون خبری اولمادان ائسرایئل قوشونونون باشچیسی نِر اوغلو آبنِرله یهودا قوشونونون باشچیسی یِتِر اوغلو عَماسانی اؤلدوردو. 33بلهجه اونلارین قانی همئشهلئک یوآبین و اونون نسلئنئن اوستونده قالاجاق، لاکئن رب داوودا، اونون نسلئنه، اِوئنه و تختئنه ابدهجک اَمئن-آمانلیق ورهجکدئر.» 34بلهجه یِهویاداع اوغلو بِنایا گتدی و یوآبی ووروب اؤلدوردو و اونو چؤلدهکی اِوئنده باسدیردیلار.
35پادشاه یوآبین یرئنه یِهویاداع اوغلو بِنایانی قوشون باشچیسی قویدو. اِبیاتارین یرئنه ده کاهئن صادوقو تعیئن اتدی.
شئمعئنئن اؤلومو
36پادشاه شئمعئنی چاغیرتدیریب اونا ددی: «اورشلئمده اؤزونه بئر اِو تئک و اورادا یاشا، اورادان هچ یره گتمه. 37اورادان چیخیب قئدرون درهسئنی کچدئیئن گون، بئل کی، قطعن اؤلهجکسن و قانین اؤز اوستونده قالاجاق.» 38شئمعی پادشاها ددی: «بو سؤز یاخشیدیر، آغام پادشاه نجه دیئب، قولون دا اِله ادهجک.» شئمعی اوزون مودّت اورشلئمده یاشادی.
39اوچونجو ائلئن آخیریندا شئمعئنئن ائکی قولو گَت پادشاهی مَعَکا اوغلو اَکئشئن یانینا قاچدیلار. شئمعئیه خبر گلدی کی، قوللاری گَتدهدئر. 40قالخیب اِششهیئنی پالانلادی و قوللارینی آختارماق اوچون گَته، اَکئشئن یانینا گتدی. شئمعی گدئب قوللارینی گَتدن گتئردی. 41شئمعئنئن اورشلئمدن گَته گدئب-گلمک خبری سولیمانا چاتدی. 42پادشاه شئمعئنی چاغیرتدیریب اونا ددی: «ربّئن حاقّینا مگر سنه آند ائچدئرمهدئم کی، ”چیخیب بئر یره گتدئیئن گون، بئل کی، قطعن اؤلهجکسن؟“ مگر بو بارهده سنه ائخطار ورمهدئم؟ مگر منه ”اشئتدئیئم بو سؤز یاخشیدیر“ دمهدئن؟ 43بس نئیه ربّه ائچدئیئن آندا و سنه وردئیئم امره عمل اتمهدئن؟» 44سونرا پادشاه شئمعئیه ددی: «سن آتام داوودون ضئدّئنه اورهیئنده ساخلادیغین و اتدئیئن پئسلئیئن هامیسینی بئلئرسن. پئسلئیئنی رب سنئن اؤز باشینا دؤندَرهجک. 45لاکئن سولیمان پادشاه موبارک اولاجاق و داوودون تختی ربّئن حوضوروندا ابدهجک برقرار قالاجاق.» 46بلهجه پادشاه یِهویاداع اوغلو بِنایایا امر اتدی، بِنایا دا گدئب شئمعئنی ووردو و او، اؤلدو. بلهجه، پادشاهلیق سولیمانین اَلی ائله مؤحکملَندی.
Currently Selected:
۱پادشاهلار 2: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
