لوقا روایت 12
12
فرئسئلرئن خمئر مایاسیندان اوزاق اولون
1بو واخت مئنلَرجه آدام بئر یِره اِله ییغیلمیشدی کی، بئربئرئنی سیخیشدیریردیلار. عئسا اوّل اؤز شاگئردلرئنه ددی: «اؤزوزی فرئسئلرئن خمئر مایاسیندان کی، ائکی اوزلی لئک دئر، اوزاق ساخلایین. 2هچ اؤرتولی بئر شی یوخدور کی، آشکارا چیخماسین، یا دا هچ گئزلئن بئر شی یوخدور کی، بئلئنمهسئن. 3بونا گؤره قارانلیقدا دانیشدیغیز شی، ائشیقدا اِشئدئلهجک و ائچری اوتاقلاردا پیچیلدادیغیز هر شی، داملاردان اعلان اولوناجاق.
4دوستلاریم سئزه دیئرم، اولاردان کی، بدنی اؤلدورورلر و اوندان سورا، هچ بئر ائش اَللرئندن گلمئر قورخمایین. 5آمّا سئزه گؤرسدهجهیم کئمدن گرک قورخاسیز، اوندان قورخون کی، اؤلدورهندن سورا قودرتی وار جهنّمه آتا. بَلی، سئزه دیئرم کی، اوندان قورخون. 6مگر بِش سرچه ائکی قارا پولا ساتیلمیر؟ آمّا گئنه ده اولارین هچ بئرئسی تارینین یانیندا یاددان چیخماییب. 7حتّا سئزئن باشیزداکی توکلرئن ده هامیسی بله ساییلیب. قورخمایین؛ سئزئن ارزئشئز، بئر چوخلی سرچهدن آرتیقدیر.
8سئزه دیئرم کی، هر کئم ائنسانلارین حوضوروندا، مَنئمکی اولدوغونی دئله گتئرسه، ائنسان اوغلی دا تارینین ملکلری حوضوروندا، بو آدامین اونونکی اولدوغونی دئله گتئرهجک. 9آمّا هر کئم ائنسانلارین حوضوروندا منی ائنکار الهسه، تارینین ملکلری حوضوروندا ائنکار اولوناجاق. 10هر کئم ائنسان اوغلونون ضئدّئنه بئر سؤز دِسه، باغیشلاناجاق؛ آمّا هر کئم تارینین موقدّس روحونون ضئدّئنه کوفر دِسه، باغیشلانمایاجاق. 11او زامان کی، سئزی یهودئلرئن عئبادتگاهلارینا، حاکئملرئن و ریئسلرئن حوضورونا آپارالار، نئگاران اولمایین کی گرک نجه اؤزوزدن دئفاع الئیه سئز یا دا نه دئیهسئز. 12چونکی او آندا هر نه دمه لی سئز، تارینین موقدّس روحی سئزه اؤیردهجک.»
آغیلسیز وارلینین مثلی
13بئر نفر جاماعاتین آراسیندان عئسایا ددی: «اوستاد! قارداشیما ده کی، آتامیزین مئراثینی من ائنن بؤلسون.» 14آمّا عئسا اونا ددی: «کئشی، کئم منی سئزئن آرازدا حَکَم و یا مئراث بؤلَن الهیئب؟!» 15عئسا خالقا ددی: «آییق اولون! اؤزوزی هر جور طاماحکارلیقدان اوزاق ساخلایین، چونکی ائنسانین حیاتی، اونون وار-دؤولتئنئن چوخلوغونا باغلی دِیئل.» 16اوندان سورا عئسا اولارا بئر مثل چَکئب ددی: «وارلی بئر کئشئنئن اَکئنی بول محصول وِردی. 17کئشی اؤز اؤزونه دوشوندی: ”نه الهیئم؟ چونکی محصولومی اورایا ییغماغا یِرئم یوخدور.“ 18سورا ددی: ”بئلدئم نه اِله یم؛ آنبارلاریمی سؤکوب، لاپ بؤیوکلرئنی تئکهرَم و بوتون بوغدالاریمی و مالیمی اورایا ییغارام. 19اوندان سورا اؤز جانیما دئیهرم: جانیم! اوزون ائللَر اوچون چوخلی وار-دؤولت ییغیبسان. ائندی راحات اول. یه، ائچ، کِف اله!“ 20آمّا تاری اونا ددی: ”ای عاغیلسیز آدام! سنئن جانین اِله بو آخشام آلیناجاق؛ بس سنئن ییغدیغین بو شیلر کئمه قالاجاق؟!“ 21بِلهدئر او آدامین عاقئبتی کی، اؤزی اوچون مال-دؤولت ییغیر آمّا تارینین حوضوروندا وارلی دِیئل.»
نئگاران اولمایین
22عئسا اؤز شاگئردلرئنه ددی: «بونون اوچون سئزه دیئرم؛ اؤز حیاتیز اوچون نئگاران اولمایین کی، نه یئیهجکسئز و بدنئز اوچون ده نئگاران اولمایین کی، نه گئیهجکسئز. 23چونکی جان یِمکدن، بدن ده پالتاردان آرتیقدیر. 24قارغالارا باخین: نه اَکئرلر، نه بئچئرلَر، نه آنبارلاری وار، نه ده مخزنلری، آمّا گئنه تاری اولارین روزیسئنی ورئر. سئزئن ارزئشئز قوشلاردان نه قدر آرتیقدیر! 25سئزلردن کئم وار کی، نئگاران اولماق ائنان بئر ساعات عؤمرونه آرتیرا بئلسئن؟! 26پس اگر سئز بله کئچئک بئر ائشی گؤره بئلمئرسئز، نه اوچون قالان شیلرئن نئگارانیسیز؟! 27زانباقلارین نجه بؤیودوکلرئنه باخین؛ نه زحمت چکئرلر، نه ده ائپلئک اَیئرئرلر. آمّا گئنه سئزه دیئرم کی، حتّا سولیمان پادشاه دا، بوتون جلالیندا بولاردان بئری کئمی گیئنمه دی. 28آمّا اگر تاری، بو گون چؤلده اولان اوتی کی، صاباح اوجاغا آتیلیر بِله گیئندئرئر، نه قدر آرتیق سئزی گِیئندئرجک ای آز ایمانلیلار! 29بس، سئز نه یئیهجهیئزین و نه ائچهجهیئزئن قیدئنه قالمایین؛ بولار اوچون نئگاران اولمایین. 30چونکی بو دونیانین بوتون مئلّتلری بو شیلرئن دالیسیجا قاچیرلار؛ و سئزئن گؤیده کی آتاز بو شیلره مؤحتاج اولدوغوزی بئلئر. 31آنجاق سئز تارینین پادشاهلیغی دالیسیجا اولون کی، بو شیلر سئزه ورئلهجک.
32ای کئچئک سوری قورخمایین! چونکی گؤیده کی آتازین رئضاسی بودور کی، او پادشاهلیغی سئزه ورسئن. 33هر نهیئز کی وار، ساتین و یوخسوللارا وِرئن. اؤزوز اوچون کؤهنَلمهین پول کئسهلر و اَسکئلمهین خزئنهلر، گؤیلرده حاضیرلایین، اوردا کی نه اوغری اونی چاپار، نه ده بئد وورار. 34چونکی سئزئن خزئنهز هاردا اولسا، اورهیئز ده اله اوردا اولاجاق.
اویاق و حاضیر اولماق
35ائش اوچون بِلئزی باغلایین، چیراقلاریزی دا یانار ساخلایین. 36او آداملار کئمئن اولون کی، اَربابلارینین تویدان اِوه قاییتماسینی گؤزلهیئرلر. اوندان اؤتری کی، گلئب قاپینی دؤیسه، اِله او آندا قاپینی اونا آچسینلار. 37بختور او قوللار کی، اربابلاری گلنده اولاری اویاق گؤرور. دوغروسونی سئزه دیئرم؛ او، خئدمت الهمک اوچون بِلئنی باغلاییب، اولاری سوفره باشیندا اوتورداجاق و یانلارینا گلئب اولارا خئدمت الئیهجک. 38خوش او قوللارین حالینا کی اربابلاری گِجه یاریسی، یا دا سَحَره یاخین گلسه اولاری اویاق گؤره!
39آمّا بونی بئلئن کی، اگر اِو صاحئبی، اوغرونون هانسی ساعاتدا گلهجهیئنی بئلسهیدی، اِوئنی اوغورلاماغا قویمازدی. 40سئز ده گرک حاضیر اولاسیز، چونکی ائنسان اوغلی سئزئن گومان اِله مه دئیئز ساعاتدا گلهجک.»
41پطروس ددی: «آغا! بو مثلی فقط بئزه دیئرسن، یوخسا هامییا؟» 42رب عئسا جاواب وردی: «کئمدئر او وفالی و عاغیلّی نؤکرباشی کی، اربابی اونی اؤز اِوئنئن نؤکرلری اوستونه ائختئیار صاحئبی قویور. اوندان اؤتری کی، اولارا اؤز واختی-واختیندا یِمک پایلارینی ورسئن. 43بختور او نؤکر کی، اربابی، گلدئیی زامان، اونی اؤز ائشی باشیندا گؤره. 44دوغروسونی سئزه دیئرم کی؛ اربابی بوتون وار-یوخونی اونا تاپشیراجاق. 45آمّا اگر او نؤکر اورهیئنده دِسه: ”اربابیم گلمکده یوبانیب.“ و باشلاییب کئشی و آرواد نؤکرلری دؤیسه، ییئب، ائچئب، کِفلَنسه، 46او نؤکرئن اربابی، اونون گؤزلمهدئیی بئر گونده و بئلمهدئیی بئر ساعاتدا گلهجک و اونی ائکی شقّه الهیئب، خائنلر ائنن بئر یِره آتاجاق.
47او نؤکر کی اؤز اربابینین ائستهیئنی بئله-بئله گئنه، اؤزونی حاضیر اِله مئیه یا دا اونون ائسته یئنه گؤره رفتار اله مئیه چوخ شالّاق یئیهجک. 48آمّا او کی اؤز اربابینین ائسته دئیئنی بئلمئر و او ائشی گؤرور کی کؤتهیه لایئقدئر، آز شالّاق یئیه جک. هر کئمه چوخ ورئله، او آدامدان چوخ دا ائسته نئله جک و هر کئمه ده چوخ امانت ورئلئب، او آدامدان لاپ چوخ ائسته نئله جک.
آیریلیقلار باره سئنده
49من یِر اوستونه اود یاغدیرماغا گلمئشم: و چوخ ائستردئم کی، اله ائندئیه کئمی آلیشیب یانایدی! 50منئم آلاجاغیم بئر تعمئد قوسلی وار و بو تعمئد یِرئنه یِتئشَنه کئمی، نه قدر سیخینتی چَکئرم! 51گومان اِله یئرسئز کی، من یِر اوستونه صولح گتئرمهیه گلمئشم؟! یوخ، سئزه دیئرم کی، من آیریلیق گتئرمهیه گلمئشم. 52چونکی بوندان سورا، بئر اِوده یاشایان بِش نفرئن آراسیندا آیریلیق دوشه جک، اوچی، ائکئسئنئن ضئدّئنه، ائکئسی ده، اوچونون ضئدّئنه اولاجاق. 53اولارین آراسینا آیریلیق دوشه جک. آتا اوغلونون، اوغول دا آتاسینین ضئدّئنه، آنا قیزینین، قیز دا آناسینین ضئدّئنه، قاینانا گلئنئن، گلئن ده قایناناسینین ضئدّئنه اولاجاق.»
زامانین تعبئری
54اوندان سورا عئسا جاماعاتا ددی: «قَربدن بئر بولودون قالخدیغینی گؤرنده، او آندا دیئرسئز؛ ”یاغیش یاغاجاق!“ اِله ده اولور. 55جنوب یِلی اَسَنده، دیئرسئز کی، ”یامان ائستی اولاجاق!“ اِله ده اولور. 56ای ائکیاوزلیلر! یِر اوزونون، گؤی اوزونون حالینی تعبئر الئیه بئلئرسئز، بس نئیه، بو زامانین حالینی تعبئر الئیه بئلمئرسئز؟!
57نه اوچون دوغری اولانی اؤزوز اوچون آییرد اله مئزسئز؟! 58او واخت کی، سندن شئکایت الهین آدام ائنان، حاکئمئن یانینا گدئرسن، یولدا اولاندا اَللَش کی، اونونان باریشاسان. اولمایا کی سنی حاکئمئن یانینا چکه. حاکئم ده محکمه افسرئنئن اَلئنه وره، افسر ده سنی زئندانا سالا. 59سنه دیئرم کی، آخیر قارا پولونی ورمهیهنه قدر، زئنداندان چیخمایاجاقسان!»
Currently Selected:
لوقا روایت 12: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
