لوقا روایت 11
11
دوعا حاقّیندا تعلئم
1بئر گون عئسا بئر یرده دوعا الهیئردی. دوعاسینی قورتاردیغی زامان، شاگئردلرئندن بئری اونا ددی: «آغا! دوعا اِله مهیی بئزه اؤیرت، نجه کی، یحیا دا شاگئردلرئنه اؤیرتدی.» 2عئسا اولارا ددی: «دوعا الهین واخت دیئن:
آتا،
سنئن آدین موقدّس اولسون.
سنئن پادشاهلیغین گلسئن.
3گوندهلئک چؤرهیئمئزی، هر گون بئزه ور.
4گوناهلاریمیزی باغیشلا،
چونکی بئز ده، بئزه بورجلی اولان هر آدامی باغیشلاییریق.
و بئزی ائمتاحانا چَکمه.»
5عئسا اولارا ددی: «سئزلردن هانسی بئرئزئن بئر دوستی وار کی گجه یاریسی اونون یانینا گلسئن و دسئن: ”دوستوم، منه اوچ چؤرک بورج ور. 6چونکی دوستلاریمدان بئری یولدان یتئشئب، اونون قاباغینا قویماغا بئر شیئم یوخدور.“ 7او دا ائچهرئدن جاواب ورسئن و دسئن: ”منه زحمت ورمه، ائندی قاپی باغلیدیر و اوشاقلاریم دا من ائنن یاتیبلار. قالخیب سنه بئر شی وره بئلمهرم.“ 8سئزه دیئرم کی، اگر او، دوستلوق خاطئرئنه ده قالخیب بئر شی ورمهسه، اونون اوزلی اولدوغونا گؤره قالخیب هر نه لازئم اولسا، ورهجک.
9من سئزه دیئرم: ائستهیئن، سئزه ورئلهجک. آختارین، تاپاجاقسیز. قاپینی دؤیون، سئزه آچیلاجاق. 10چونکی هر ائستهین آلیر، آختاران تاپیر و قاپینی دؤیَنه، آچیلیر. 11سئزدن هانسی آتا وار کی، اگر اوغلی اوندان بالیق ائستهسه، اونا بالیق عوضئنه ائلان وِره؟ 12یا دا یومورتا ائستهسه، اونا عقرب وِره؟ 13ائندی اگر سئز کی شرورسوز، بئلئرسئز کی نجه اؤولادلاریزا یاخشی هدئیّهلری وره سئز، نه قدر آرتیق، گؤیده کی آتاز اوندان ائستهیَنلره موقدّس روحی وِرهجک.»
عئسا و بِعِلزبول
14عئسا لال بئر ائبلئس روحی، بئر آدامدان چیخاردیردی. ائبلئس روح چیخاندان سورا، او لال دانیشماغا باشلادی و خالق حیران قالدیلار. 15آمّا اولاردان بعضئلری ددئلر: «عئسا، ائبلئس روحلاری بِعِلزبولون کؤمهیی ائنن کی، ائبلئس روحلارین ریئسی دئر قووور.» 16بعضئلری ده عئسانی ائمتاحان اِلَه مک اوچون اوندان هی ائستهیئردئلر کی، اولارا گؤیدن بئر علامت گؤرسدسئن. 17آمّا عئسا کی اولارین فئکئرلرئنی بئلئردی، اولارا ددی: «هر پادشاهلیغی کی، اؤزی اؤز ضئدئنه بؤلونسه، وئران قالار و اؤزی اؤز ضئدئنه بؤلونَن، اِو ده ییخیلار. 18اگر شیطان دا، اؤزی اؤز ضئدئنه بؤلونسه، پادشاهلیغی نه جور داوام گتئرر؟چونکی سئز دیئرسئز کی، من بِعِلزِبولون کؤمهیی ائنن، ائبلئس روحلاری قووورام. 19و اگر من بِعِلزِبولون کؤمهیی ائنن ائبلئس روحلاری قووورام، سئزئن شاگئردلرئز کئمئن کؤمهیی ائنن اولاری قووورلار؟ پس اولار سئزه قاضی اولاجاقلار. 20آمّا اگر من ائبلئس روحلاری، تارینین قووتی ائنن قووورام، دمک تارینین پادشاهلیغی، سئزه گلمئش. 21هر واخت قووّتلی بئر آدام، تَپهدن دیرناغاجاق سئلاحلانیب، اؤز اِوئنی گؤزله سه، اونون اموالی آماندا قالار. 22آمّا هر واخت کی اوندان لاپ قووّتلی بئری، هوجوم گتئرئب اونا قالئب گَلسه، بوتون سئلاحلارینی کی اونا بِل باغلامیشدی آلیب، قَنئمتی ده پایلار. 23هر کئم کی من ائنن دِیئل، منئم ضئدّئمهدئر و هر کئم کی من ائنن ییغمیر، داغیدیر.
24خبئث روح بئر آدامدان چیخاندان سورا، سوسوز چؤللَرده دولانیر و راحاتلیق آختاریر. تاپمادیغی زامان دیئر: ”چیخدیغیم اِوئمه قاییدارام.“ 25او گلدئیی واخت، اِوی سوپورولموش و تَر، تمئز گؤرور 26او زامان گِدئر و اؤزوندَن لاپ شرور اولان یِدّی روح گؤتوروب گتئرئر و اورایا گئرئب یِرله شئرلر. او آدامین آخیری، اوّلکئندن ده لاپ پئس اولور.»
27عئسا بو سؤزلری دئین واخت، بئر آرواد جاماعات ائچئندن سَسئنی اوجالدیب اونا ددی: «خوش سنی دوغوب، اَمئزدئرن آروادین، حالینا!» 28آمّا عئسا اونون جاوابیندا ددی: «بونون یرئنه خوش او آداملارین حالینا کی، تارینین کلامینی اِشئدئب اونا عمل الهیئرلر.»
یونوس علامتی
29اوندا کی عئسانین اطرافینا ییغیلان جاماعات چوخالیردی، عئسا بله ددی: «بو نسئل نه قدر شرور نسئلدئر. اولار بئر علامت ائسته یئرلر، آمّا اولارا یونوس پیغمبرئن علامتئندن باشقا، هچ بئر علامت ورئلمهیهجک. 30چونکی اله اوجور کی یونوس، نینوا شهرئنئن خالقینا بئر علامت اولدی، ائنسان اوغلی دا بو نسئل اوچون، اله اولاجاق. 31قئیامت گونونده، جنوب ملکهسی، بو نسلئن آداملاری ائنن قالخیب، اولاری محکوم اِلئیهجک. چونکی او، سولیمان پادشاهین حئکمتلی سؤزلرئنی اِشئتمک اوچون، یِرئن او باشیندان گلدی. ائندی سولیماندان، لاپ بؤیوکی بوردادیر. 32قئیامت گونونده نینوا خالقی، بو نسلئن آداملاری ائنن قالخیب اولاری محکوم اِلئیهجک. چونکی اولار یونوس پیغمبرئن سؤزلری ائنن تؤوبه الهدئلر و ائندی یونوس پیغمبردن لاپ بؤیوکی بوردادیر.
بدنئن ائشیغی
33هچ کئم چیراغی یاندیراندان سورا، اونی گئزلی یِره، یا دا قابین آلتینا قویماز. چیراق قابینا قویار کی، ائچهری گئرنلر ائشیغی گؤرسونلر. 34گؤزون سنئن بدنئنئن چیراغیدیر ؛ گؤزون سالئم اولسا، سنئن بوتون بدنئن ائشیق ائنان دولی اولار. آمّا گؤزون پئس اولسا، بدَنئن قارانلیق ائنان دولی اولار. 35پس آییق اولون اولمایا کی سندهکی ائشیق، قارانلیق اولا. 36بس اگر سنئن بوتون بدنئن ائشیق ائنان دولی اولسا، اِله کی، بئر ذرّه ده اوندا قارانلیق اولماسا، او زامان سنئن بوتون بدنئن ائشیقلی اولاجاق، بئر چیراق کئمی کی اؤز ائشیقی ائنان سنی ائشیقلاندیریر.»
وای حالیزا، ای فرئسئلر
37عئسا بولاری دئینده، فرئسی فئرقه سئندن بئر عالئم، اونی یمک یِمهیه اِوئنه دعوت الهدی. عئسا دا ائچهری گئرئب، سوفره باشیندا اوتوردی. 38او واخت کی او فرئسی گؤردی عئسا یهودئلرئن رسمئنه گؤره، یمکدن قاباق اَللَرئنی یومادی، مات قالدی. 39رب عئسا اونا ددی: «سئز فرئسئلر، پئیالا و بوشقابین چؤلونی تمئزلهیئرسئز، آمّا اؤز ائچئز طاماح و پئسلئک ائنن دولودی. 40ای آغیلسیزلار! مگر ظاهئری یارادان باطئنی ده یاراتمیر؟! 41قابلاریزین ائچئنده اولانلاردان صدقه وِرئن، او زامان سئزئن اوچون هر شی تمئز اولاجاق.
42آمّا وای سئزئن حالیزا، ای فرئسئلر! چونکی سئز تؤوراتین اوندا-بئر ورمک حؤکمئنی، حتّا نانَع، شویود و هر جور گؤیَرتی اوچون یِرئنه یتئرئرسئز آمّا عدالت و تارینین سِوگی سئنده اهمال الهیئرسئز. گرک بولاری الئیهسئز، اولاری دا یِرئنه یتئرمک ده اهمال الهمئیهسئز. 43وای سئزئن حالیزا، ای فرئسئلر! چونکی یهودئلرئن عئبادتگاهلاریندا، یوخاری باشدا اوتورماغی و بازارلاردا سالام آلماغی سِوئرسئز. 44وای سئزئن حالیزا، چونکی سئز ائتمئش قبئرلر کئمی سئز و خالق بئلمهمئش اولارین اوستوندن کِچئر.»
45شرئعت عالئملرئندن بئری، عئسانین جاوابیندا ددی: «اوستاد، سن بو سؤزلری دِمک ائنن بئزه ده توهئن الهیئرسن.» 46عئسا ددی: «وای سئزئن حالیزا، ای شرئعت عالئملری! چونکی سئز خالقین بوینونا اِله آغیر یوکلر قویورسوز کی، آپارماقی چوخ چتئندئر، اؤزوز ده بارماقلاریزین بئرئنی ده بله، او یوکلره وورمورسوز. 47وای سئزئن حالیزا! چونکی سئز پیغمبرلره مقبرهلَر تئکئرسئز، اله او پیغمبرلره کی اولاری اؤلدورَن سئزئن آتالاریزدیر. 48اِله بوجور، سئز آتالاریزین ائشلَرئنه شاهئدلئک الهیئب، اولارین ائشلرئن تصدئق اِله یئرسئز؛ چونکی اولار پیغمبرلری اؤلدوردولَر، سئز ده اولارا مقبرهلر تئکئرسئز. 49بونا گؤره تارینین حئکمتی ددی: ”من اولارا پیغمبرلر و رسوللار گؤندَرهجهیم، بولاردان بعضئلرئنی اؤلدورهجکلر، بعضئلرئنه ده جفا ورهجکلر.“ 50اله کی دونیانین بئناسی قویولاندان بری، بوتون پیغمبرلرئن تؤکولموش قانی، بو نسلئن بوینونا اولسون؛ 51هابئلئن قانیندان توتموش، زکریانین قانیناجاق، کی قوربانگاه ائنان معبدئن قودسی آراسیندا تؤکولدی. بلی سئزه دیئرم کی، بوتون بولارین حسابی، بو نسئلدن آلیناجاق. 52وای حالیزا، ای شرئعت عالئملری! چونکی سئز معرئفت قاپیسینین آچارینی، گؤتوروبسوز. اؤزوز گئرمهدئز، گئرمَک ائستهیَنلری ده قویمادیز.»
53اوندا کی عئسا اوردان اشئیه چیخدی، تؤورات موعلّئملری و فرئسئلر اونی چوخ سیخیشدیریب، اَللشئردئلر اونی تحرئک الهسئنلر کی او چوخ شیلرئن حاقّیندا دانیشسین. 54و گؤزلهیئردئلر کی عئسانین ددئکلرئندن، بئر سؤز قاپیب، اونی گئره سالسینلار.
Currently Selected:
لوقا روایت 11: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
