لوقا روایت 13
13
تؤوبه الهیئن
1اله او زامان اوردا اولانلاردان بعضئسی، گلئب عئسایا او جَلئللی لر حاقّیندا خبر وِردئلر کی، روملی والی پئلاط، اولاری اؤلدوروب و اولارین قانلارینی، کسدئردئکلری قوربانلارین قانی ائنن قاریشدیرمیشدی. 2عئسا اولارین جاوابیندا ددی: «گومان اِله یئرسئز کی بو جَلئللیلر، قالان جَلئللیلرئن هامیسیندان لاپ چوخ گوناهکار ائدئلر کی، بله زجر چکدئلر؟ 3سئزه دیئرم؛ یوخ. آمّا اگر تؤوبه اِله مئیهسئز، هامیز اولار کئمی هلاک اولاجاقسیز. 4یا دا گومان اِله یئرسئز کی او اونسَکّئز آدام کی، سئلوآم دا کی بورج اولارین اوستونه اوچوب اؤلدوردی، اورشلئم ده قالان یاشایانلارین هامیسیندان چوخ گوناهکار ائدئلر؟! 5سئزه دیئرم؛ یوخ. آمّا اگر تؤوبه اِله مئیهسئز، هامیز اولار کئمی هلاک اولاجاقسیز.»
6اوندان سورا عئسا اولارا بو مثلی ددی: «بئر کئشی اؤز اوزوم باغیندا، بئر انجئر آغاجی اَکدی. او گلدی کی آغاجین میوه سئنی ییغا، آمّا بئر شی تاپمادی. 7باغبانا ددی: ”باخ، ائندی اوچ ائلدئر کی، بو انجئر آغاجینین یانینا گلئب میوه آختاریرام، آمّا هچ نه تاپمیرام. بو آغاجی کَس. نئیه بوش یِره تورپاغی توتسون؟!“ 8باغبان اونا ددی: ”آغا، قوی او بو ائل ده قالسین. من اونون دؤره سئن بِللهیئب، پِیئن تؤکهرم. 9اگر گلن ائل میوه گتئرسه، لاپ یاخشی. اگر گتئرمهسه، اونی کَسَرسن.“»
بئر آروادین شفاسی
10عئسا موقّدس شنبه گونونده، یهودئلرئن عئبادتگاهلارینین بئرئنده تعلئم ورئردی. 11اوردا بئر آرواد وار ائدی کی، اون سکّئز ائلدن بری بئر روح اونی علئل الهمئشدی؛ بِلی بوکولموشدی و دوز دورا بئلمئردی. 12عئسا آروادی گؤرن واخت، اونی اؤز یانینا چاغیریب ددی: «آرواد، علئل لئکئندن آزاد اولدون.» 13و اَللرئنی اونون اوستونه قویدی. آرواد او آندا دئک دوردی و تارییا شوکور الهدی. 14آمّا عئبادتگاهین ریئسی، عئسا شنبه گونونده شفا وردئیی اوچون حئرصله نئب، خالقا ددی: «ائش گؤرمک اوچون آلتی گون وار. شنبه گونونده یوخ، او گونلرده گلئن شفا آلین.» 15او زامان رب عئسا اونا جاواب ورئب ددی: «ای ائکی اوزلی لر! مگر هچ کئم سئزلردن شنبه گونونده اؤز اؤکوزونی یا دا اِششهیئنی آخوردان آچیب، سووارماغا آپارمیر؟ 16بو آرواد کی، ائبراهئم پیغمبرئن نسلئندندئر و اون سکّئز ائلدن بری شیطان اونی باغلاییب، دوز دِیئل کی شنبه گونونده بو اسئرلئکدن آزاد اولا؟» 17عئسا بو سؤزلری دئینده، اونون ضئدّئنه قالخان آداملارین هامیسی اوتاندی و بوتون خالق عئسانین گؤردویی شؤوکتلی ائشلرئن هامیسینا سِوئندئلر.
خاردال توخومی و مایا
18اوندان سورا عئسا ددی: «تارینین پادشاهلیغی نهیه بَنزهیئر؟ اونی نهیه بَنزهدئم؟ 19او، بئر خاردال توخومونا بَنزهر کی، بئر کئشی گؤتوروب اونی اؤز باغیندا اَکدی. توخوم بؤیودی، بئر آغاج اولدی و گؤیون قوشلاری گلئب، اونون خوللاریندا یووا تئکدئلر.»
20عئسا گئنه ددی: «تارینین پادشاهلیغینی نهیه بَنزهدئم؟ 21تارینین پادشاهلیغی، خمئر مایاسینا بَنزهر کی، بئر آرواد اونی گؤتوروب، اوچ کئسه اون ائچئنه قاتدی، اِله کی، بوتون خمئر تورشودی.»
دار قاپی
22عئسا اورشلئم شهرئنه ساری گِدنده، شهرلری و کندلری گزئب، اولارا تعلئم وِرئردی. 23بئر نفر اوندان سوروشدی: «آغا، آیا آز آداملار نئجات تاپاجاقلار؟» عئسا اولارا ددی: 24«دار قاپیدان ائچری گئرمهیه اَللَشئن. چونکی سئزه دیئرم، چوخ آداملار ائچری گئرمَک ائستهیهجکلر، آمّا الئیه بئلمه یه جکلر. 25اوندا کی اِو صاحئبی قالخیب قاپینی باغلایا، سئز اِشئکده دایانیب قاپینی دؤیه جکسئز و دئیهجَکسئز: ”آغا، قاپینی بئزه آچ.“ اوندا او سئزه جاواب ورهجک: ”من سئزی تانیمیرام، بئلمئرم هاردان گلئبسئز؟ “ 26او زامان سئز بِله دئیه جکسئز: ”بئز سنئن حوضوروندا یِیئب ائچدئک و سن بئزئم کوچهلرده تعلئم وردئن.“ 27آمّا او دئیهجک: ”سئزه دیئرم کی، سئزی تانیمیرام، بئلمئرم هاردان گلئبسئز؟! مندن اوزاقلاشین، ای پئس ائش گؤرنلر.“ 28او زامان کی، ائبراهئم، ائسحاق، یعقوب، و بوتون پیغمبرلری تارینین پادشاهلیغیندا گؤره سئز، آمّا اؤزوزی اوردان قووولموش گؤره سئز، اوردا آغلاشما و دئش قیجیرتماسی اولاجاق. 29خالق شَرقدن و قَربدن، شئمالدان و جنوبدان گلئب تارینین پادشاهلیغیندا، سوفره باشیندا اوتوراجاقلار. 30باخ آخیرکی اولانلار، بئرئنجی اولاجاقلار، بئرئنجی اولانلار دا، آخیرکی اولاجاقلار.»
اورشلئمه یاس توتماق!
31اِله او زامان فرئسی فئرقهسئنئن بعضی عالئملری، گلئب عئسایا ددئلر: «بوردان چیخ، گِت. چونکی حاکئم هئرود سنی اؤلدورمک ائستهیئر.» 32عئسا دا اولارا ددی: «گِدئن او تولکی یه دیئن کی، ” من بو گون و صاباح، ائبلئس روحلاری قوووب، آداملارا شفا وِرهجهیم و اوچونجی گونده، اؤز ائشئمی قورتاراجاغام. 33آمّا بو گون، صاباح، و او بئری گون من گرک اؤز یولوما گِدَم. چونکی مومکون دِیئل کی، بئر پیغمبر اورشلئم شهرئندن باشقا، آیری بئر یِرده هلاک اولسون.“ 34ای اورشلئم، ای اورشلئم، ای پیغمبرلری اؤلدورن شهر، ای سنئن یانینا گؤندَرئلنلَری داشا باسان! من نچه دفه ائستهدئم، تویوق اؤز جوجهلرئنی قانادلارینین آلتینا ییغان کئمی، سنئن اؤولادلارینی بئر یِره ییغیم. آمّا سن ائستمهدئن! 35باخ، سئزئن اِوئز سئزه وئران بوراخیلیر. سئزه دیئرم کی، آرتیق منی گؤرمه یه جکسئز او زاماناجاق کی، دئیهسئز: ”ربّئن آدیندا گلن، موبارک اولسون“.
Currently Selected:
لوقا روایت 13: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
