۲قورئنتلیلره 1
1
1پولوسدان کی تارینین ائرادهسی ائنن مسئح عئسانین حوارئسی دئر و قارداشیمیز تئموتاعوسدان،
تارینین کئلئساسینا کی قورئنت شهرئنده دئر و بوتون اَخایئه منطقهسئده اولان موقدّسلره:
2آتامیز تاریدان و رب عئسا مسئحدن سئزه فیض و سالاماتلیق اولسون.
بوتون تسلّی لرئن تاریسی
3موتبارک اولسون تاری و ربّئمئز عئسا مسئحئن آتاسی کی، رحمتلرئن آتاسی و بوتون تسلّیلرئن تاریسیدیر. 4اله او تاری کی، بئزه بوتون موصئبتلرئمئزده تسلّی ورئر، اله کی بئز ده هر جور موصئبت آلتیندا اولانلارا، تارینین بئزه وردئیی تسلّی ائنن تسلّی وره بئلک. 5چونکی نجه مسئحئن عذابلاریندا بئر چوخ اؤلچوده پاییمیز وار، اِله اوجور ده مسئحئن واسئطهسی ائنن بئر چوخ اؤلچوده تسلّی تاپیریق. 6اگر بئز موصئبت آلتینداییق، بو سئزئن تسلّی و نئجاتیز اوچوندور و یا اگر تسلّی تاپیریق، سئزئن تسلّئز اوچوندور، و بو اوندا تأثئرلی اولور کی بئزئم چکدئیئمئز همن عذابلاردا صبر ائنن دؤزورسوز. 7سئزئن بارهده اولان اومئدئمئز ثابئتدئر، چونکی بئلئرئک کی، بئزئم عذابلاریمیزدا شرئک اولدوغوز کئمی، بئزئم تسلّئمئزده ده شرئک اولاجاقسیز.
8چونکی ای قارداشلار، ائستهمئرئک کی، آسئیا منطقه سئنده باشیمیزا گلن موصئبتدن بئخبر اولاسیز؛ بونا گؤره کی باشیمیزا گلنلر، حدّئمئزدن آرتیق و طاقتئمئزدن چوخ آغیر ائدی، اله کی حیاتدان بله اومئد کَسدئک. 9ائچئمئزده اؤلوم حؤکمونی حئسّ اِله دئک، آمّا بو اونون اوچون اولدی کی، اؤزوموزه یوخ، بلکی اؤلولری دئرئلدن تارییا توکّول الهیک. 10او، بئزی بله بؤیوک اؤلومدن قورتاردی و قورتارار. بئز اونا اومئد باغلامیشیق کی، بئزی گئنه ده قورتاراجاق. 11سئز ده دوعالاریز ائنان بئزه کؤمک الهیئرسئز، اله کی بئر چوخلارینین دوعاسی سایهسئنده بئزه عطا اولونان لوطفدن اؤتری بئر چوخ کس بئزئم اوچون تارییا شوکور الهسئن.
پولوس برنامهلرئنی دَیئشئر
12چونکی فخرئمئزئن سببی، یعنی وئجدانیمیزین شهادتی بودور کی، بئز بو دونیادا خوصوصَن ده سئزئن حاقّیزدا جئسمانی حئکمت ائنن یوخ، بلکی تارینین فیضئنده، موقدّسلئک و تارییا مقبول اولان صمئمئیّت ائنن رفتار الهدئک. 13چونکی اوخودوغوز و آنلادیغیزدان باشقا سئزه هچ بئر شی یازمیریق و منئم اومئدئم وار کی، آخیرا کئمی آنلایاجاقسیز؛ 14نجه کی، بئزی بئرآز دا اولسا، آنلادیز کی، ربّئمئز عئسانین گونونده بئز سئزئن فخرئزئک، سئز ده بئزئم فخرئمئزسئز.
15بو ائطمئنان ائنان، ائسته دئم اوّل سئزئن یانیزا گلم، اله کی سئز بئر برکته، ائکی دفه نایئل اولاسیز. 16من ائسته یئردئم کی مقدونئیّه منطقهسئنه گدنده یولوم اوستونده سئزی گؤرم و مقدونئیّهدن گئنه سئزئن یانیزا گلم، اله کی سئز منی یهودئیه وئلایتئنه یولا سالاسیز. 17مگر من بو نئیّتده اولماق ائنان یونگول رفتار الهدئم؟ و یا منئم هدفئم جئسمانی بئر هدفدئر، اله کی بئر آندا هم «بلی، بلی» دئیم هم ده «یوخ، یوخ»؟
18آمّا وفالی تاری شاهئد دئر کی، بئزئم سؤزوموز سئزه هم «بلی»، هم «یوخ» دیئل. 19اونا گؤره کی، سئزئن آرازدا بئزئم، یعنی منئم، سئلوانوسون، و تئموتاعوسون اعلان اله دئیی تارینین اوغلی عئسا مسئح، هم «بلی» هم «یوخ» دیئلدی، بلکی عئسا مسئحده همئشه «بلی» دئر. 20چونکی تارینین بوتون وعدهلری مسئحده «بلی» دئر؛ اونا گؤره ده مسئحئن وسئلهسی ائنن بئز ده «آمئن» دیئرئک، اله کی بئزئم واسئطهمئز ائنن تاری جلال تاپسین. 21تاریدیر کی، بئزی سئز ائنن برابر مسئحده ثابئت دوردورور و مسح الهیئر 22و بئزی مؤهورلهیئب و موقدّس روحی بیعانه کئمی بئزئم اورهکلرئمئزه قویوب.
23تارینی جانیما شاهئد توتورام کی، سئزه رحم الهدئیئم اوچوندور کی ائندئیه کئمی قورئنته گلمهمئشم. 24بو او دمک دیئل کی، گویا بئز سئزئن ائمانیز اوستونده حاکئمئک. یوخ! بلکی بئز سئز ائنن، سئزئن شادلیغیز اوچون اللشئرئک. چونکی ائمانیزدا ثابئت دورورسوز.
Currently Selected:
۲قورئنتلیلره 1: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
