۱قورئنتلیلره 15
15
مسئحئن دئرئلمهسی
1قارداشلار، سئزه او ائنجئلی خاطیرلادیرام کی، موژده سئنی سئزه یتئردئم، سئز ده اونی قبول الهیئب اوندا مؤحکم دایانیرسیز 2و اونون واسئطهسی ائنن ده نئجات تاپیرسیز، اگر سئزه اعلان الهدئیئم کلامی برک توتاسیز. یوخسا بوش یره ائمان گتئرئبسئز.
3چونکی هر شیدن اوّل آلدیغیمی سئزه یتئردئم؛ یعنی مسئح موقدّس یازیلارا گؤره بئزئم گوناهلاریمیز اوچون اؤلدی، 4و باسدیریلدی، و اوچونجی گونده موقدّس یازیلاردا اولان کئمی دئرئلدی. 5و کئفایا، سورا دا اون ائکی شاگئردلره گؤروندی. 6سورا بئر دفعه بش یوزدن آرتیق قارداشلارا گؤروندی کی، اولاردان چوخی ائندی ده یاشاییرلار. آمّا بعضئلری گؤزلرئنی حیاتا یوموبلار. 7سوراسی یعقوبا گؤروندی، سورا دا بوتون حوارئلره. 8هامیدان سورا دا منه گؤروندی، منه کی بئر اوشاق کئمی ائدئم کی واختیندان قاباغ آنادان دوغولموشدی.
9چونکی من حوارئلرئن لاپ کئچئیییَم و حواری چاغیریلماغا لایئق دیئلم. بو سببدن کی، تارینین کئلئساسینا عذاب ورئردئم. 10آمّا تارینین فیضی ائنن هر نهیَم، اله اویام و اونون منه اولان فیضی بوش دیئلدی. عکسئنه، من اولارین هامیسیندان چوخ زحمت چکدئم، داها دوغروسی، من یوخ، بلکی تارینین فیضی کی، من ائنن دئر. 11بلهده، ائستر من اولسایدیم، ائستر اولار، بئز بله اعلان اله یئرئک، سئز ده بله ائمان گتئردئز.
اؤلولرئن دئرئلمهسی
12ائندی اگر مسئح حاقّیندا اعلان اولونور کی، او، اؤلولردن دئرئلدی، بس نجه سئزلردن بعضئلری دیئر کی، اؤلولردن دئرئلمه یوخدور؟ 13آمّا اگر اؤلولردن دئرئلمه یوخدور، پس مسئح ده دئرئلمهیئب. 14و اگر مسئح دئرئلمهیئب، اوندا بئزئم وعظئمئز بوشدور، سئزئن ائمانیز دا بوشدور. 15بوندان علاوه، بئز تاری حاقّیندا یالانچی شاهئد ده اولوروق، چونکی تارینین بارهسئنده شهادت وردئک کی، او، مسئحی اؤلولردن دئرئلتدی. حال بو کی، اگر اؤلولر دئرئلمئرلر، پس تاری اونی دا دئرئلتمهیئب. 16چونکی اگر اؤلولر دئرئلمئرلر، پس مسئح ده دئرئلمهیئب. 17و اگر مسئح دئرئلمهیئب، دمهلی ائمانیز دَیَرسئزدئر؛ سئز حله ده اؤز گوناهلاریزین ائچئندهسئز. 18اوندا مسئحده گؤزلرئنی حیاتا یومانلار دا هلاک اولوبلار. 19اگر مسئحده اولان اومئدئمئز آنجاق بو حیات اوچوندور، بئز هامی آداملاردان داها چوخ یازیغیق.
20آمّا ائندی مسئح اؤلولردن دئرئلئب و گؤزلرئنی حیاتا یومانلارین نؤوبری اولوب. 21چونکی نجه اؤلوم بئر ائنسان واسئطهسی ائنن گلدی، اؤلولردن دئرئلمه ده بئر ائنسان واسئطهسی ائنن گلدی. 22نجه کی، آدَمده هامی اؤلور، مسئحده ده هامی دئرئلر. 23آمّا هر کس اؤز نؤوبهسی ائنن؛ اوّل مسئح، سورا دا اونون گلئشئنده مسئحئنکی اولانلار. 24اوندان سورا دا آخیر زامان اولور، او واخت مسئح پادشاهلیغی آتا تارییا تسلئم الهیئر و هر ریاست، ائقتئدار و قودرتی آرادان آپاریر. 25چونکی او، گرک او زاماناجاق کی، تاری اونون بوتون دوشمنلرئنی اونون آیاغی آلتینا قویا، سلطنت الهسئن. 26آخیرینجی دوشمن ده کی گرگ یوخ اولونا، اؤلومدور. 27چونکی هر شیی اونون آیاقلاری آلتیندا تابع الهدی. آمّا او واخت کی، دیئلئر: «هر شی اونا تابع قویولوب» آیدیندیر کی، هر شیی مسئحه تابع قویان تاری، بوندان موستثنادیر. 28هر شی اونا تابع قویولاندان سورا، اوغولون اؤزی ده، هر شیی اونا تابع قویانا تابع اولاجاق کی، تاری هر شیده هر شی اولسون.
29یوخسا اؤلولر اوچون تعمئد آلانلار نه الئیهجکلر؟ اگر اؤلولر اصلا دئرئلمئرلر، اوندا اولار اؤلولر اوچون نئیه تعمئد آلیرلار؟ 30بئز نئیه هر ساعات خطرلره دوشوروک؟ 31قارداشلار، او فخرئمه کی ربّئمئز مسئح عئسادا سئزه واریم آند اولسون کی من هر گون اؤلورم. 32اگر ائنسانی نئیّتلر ائنن اِفسوس شهرئنئن وحشی حیوانلاری ائنن ساواشدیم، بونون منه نه خیئری وار؟ اگر اؤلولر دئرئلمئرلر،
«گلئن یئیک و ائچک،
چونکی صاباح اؤلهجهیئک.»
33آلدانمایین؛ «پئس یولداش یاخشی اخلاقی پوزار.» 34آییلین و گوناه اله مهیئن؛ چونکی سئزلردن بعضئلری تارینی هچ تانیمیر. بونی دیئرم کی اوتاناسیز.
اؤلومدن سورا دئرئلن بدن
35آمّا بئری دئیر: «اؤلولر نجه دئرئلئرلر؟ و نه جور بدن ائنن گلئرلر؟» 36ای عاغیلسیز! سنئن سپدئیئن اؤلمهسه، دئرئلمز. 37و سپنده، حاصئل اولاجاق بدنی سپمئرسن، آنجاق لوت توخومی، ائستر بوغدا اولسون، ائستر آیری بئر شی. 38آمّا تاری او توخوما ائستهدئیی کئمی بدن ورئر؛ هر بئر توخوما اؤزونه مخصوص اولان بئر بدن ورئر. 39بوتون جئسملر ده بئر جور دیئللر. ائنسانلارین جئسمی عالاحئدا، حیوانلارین جئسمی عالاحئدا، قوشلارین جئسمی عالاحئدا، بالیقلارین جئسمی عالاحئدا. 40سماوی بدنلر و دونیهوی بدنلر ده وار. آمّا سماوئلرئن شؤوکتی عالاحئدا، دونیهوئلرئنکی ده عالاحئدا. 41گونون شؤوکتی عالاحئدا، آیین شؤوکتی عالاحئدا، اولدوزلارین شؤوکتی عالاحئدادیر؛ چونکی اولدوز دا اولدوزدان شؤوکتئنه گؤره فرقی وار.
42اؤلولرئن دئرئلمهسی ده بلهدئر؛ فانئلئکده اکئلئر، قیریفانئلئکده دئرئلئر. 43ذئلّتده اکئلئر، عئزّتده دئرئلئر. ضعئفلئکده اکئلئر، قودرتده دئرئلئر. 44طبئعی بئر بدن اکئلئر، روحانی بئر بدن دئرئلئر. اگر طبئعی بئر بدن وار، روحانی بئر بدن ده وار. 45بله ده یازیلیب کی؛ «ائلک ائنسان اولان آدم یاشایان بئر جان اولدی.» آخیرینجی آدم حیات ورن روح اولدی. 46آمّا روحانی اوّلئنجی دیئل، بلکی طبئعی اوّلئنجیدئر، سورا روحانی. 47ائلک ائنسان یردندئر، تورپاقداندیر. آمّا ائکئنجی ائنسان گؤیدندئر. 48تورپاقدان اولان نجهدئر، تورپاقدان اولانلار دا اِلهدئرلر. گؤیدن اولان نجه دئر، گؤیدن اولانلار دا اِلهدئرلر. 49و بئز تورپاقدان حاصئل اولموش شکئلی نجه گزدئرئرئک، گؤیدن اولانین دا شکئلئنی اِله گزدئرهجهیئک.
50ائندی قارداشلار، سئزه بونی دیئم کی، جئسم و قان تارینین پادشاهلیغینی مئراث آلا بئلمز؛ فانی اولان دا قیریفانی اولانی مئراث آلا بئلمز. 51باخین، سئزه بئر سئرّ دیئرم، هامیمیز گؤزلرئمئزی حیاتا یوممایاجاغیق، آمّا هامیمیز دیئشئلهجهیئک؛ 52بئر آن ائچئنده، بئر گؤز قیرپمادان، آخیر شیپور چالیناندا. چونکی شیپور چالیناجاق و اؤلولر قیریفانی شکئلده دئرئلهجکلر و بئز دیئشئلهجهیئک. 53چونکی بو چورویَن گرک چورولمهینی گیسئن و بو فانی گرک قیریفانئلئیی گیسئن. 54چونکی چورویَن بدن چورولمهین بدنی گئیَن واختدا و بو فانی بدن قیریفانی بدنی گئیَن زاماندا او یازی یرئنه یتئشهجک کی، «اؤلوم ظفرده اودولدی.»
55«ای اؤلوم، هانی سنئن ظفرئن؟
ای اؤلوم، هانی سنئن سانجماغین؟»
56اؤلومون سانجماغی گوناه و گوناهین قودرتی شرئعتدئر. 57آمّا تارییا شوکور اولسون کی، ربّئمئز عئسا مسئحئن واسئطهسی ائنن بئزه ظفر ورئر.
58اونا گؤره عزئز قارداشلاریم، مؤحکم و ثابئت دورون و هر زامان ربّئن ائشئنده جوشون و بئلئن کی، ربّئن یولوندا چکدئیئز زحمت بوش یره دیئل.
Currently Selected:
۱قورئنتلیلره 15: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
