۱قورئنتلیلره 14
14
نبئلئک، بؤیوک بئر عطا
1محبّتئن دالیسیجا قاچین، آمّا روحانی عطالاری دا قیرت ائنن ائستهیئن، خوصوصَن نبئلئک عطاسینی. 2چونکی هر کئم آیری بئر دئلده دانیشیر، آداملار ائنان یوخ، بلکی تاری ائنن دانیشیر. بونا خاطئر کی اونی هچ کئم باشا دوشمور؛ او، تارینین روحوندا سئرّلردن دانیشیر. 3آمّا نبئلئک الهین، آداملارا بئنا، تشوئق و تسلّی ورمک اوچون دانیشیر. 4آیری دئلده دانیشان آدام اؤزونی بئنا الهیئر، آمّا نبئلئک الهین آدام کئلئسانی بئنا الهیئر. 5آرزی الهیئرم کی، سئز هامیز آیری دئللره دانیشاسیز، عَلَلخوصوص بو کی، نبئلئک اِلئیهسئز. چونکی نبی، آیری دئللره دانیشاندان بؤیوکدور، مگر بو کی ترجومه الهسئن، اله کی کئلئسا بئنا اولسون.
6ائندی قارداشلار، اگر من سئزئن یانیزا گلئب آیری دئللره دانیشماغا باشلاسام، سئزه نه فایدا یتئرهرم، اگر وحی، معرئفت، نبئلئک، یا دا تعلئم واسئطهسی ائنن دانیشماسام؟! 7سَس ورن جانسیز شیلر، ائستر توتَک اولسون ائستر چنگ، اگر فرقلی سسلر چیخارتماسالار، توتَک و یا چنگ ائنن نه چالیندیغینی کئم بئلر؟! 8اگر شیپور قیریموعیّن سَس چیخارتسا، دؤیوشه کئم حاضیرلاشار؟ 9اِله اوجور ده سئز اگر دئلئز ائنن باشا دوشولمهین سؤزلر دانیشاسیز، سئزئن نه ددئیئز نجه بئلئنر؟ اله بئل کی، هاوا ائنن دانیشیبسیز. 10شوبههسئز کی، دونیادا بئر چوخ موختلئف دئللر وار و اولاردان هچ بئری معناسیز دیئل. 11بله ده اگر دئلئن معناسینی بئلمهسم، من دانیشان اوچون اؤزگه اولورام، دانیشان دا منئم اوچون اؤزگه اولور. 12اوجور ده سئز، مادام کی، روحانی عطالارا قیرتئز وار، ائستهیئن کی، کئلئسانی بئنا الهمک اوچون عطالاردا وارلی اولون.
13بونا گؤره ده، آیری دئلده دانیشان آدام، ترجومه عطاسی اوچون دوعا الهسئن. 14چونکی اگر من آیری بئر دئلده دوعا الهیئرم، روحوم دوعا الهیئر، آمّا عاغلیم بهرهسئز قالیر. 15بس نه اِله مهلییم؟ هم روح ائنان دوعا الئیه جهیم، هم ده عاغیل ائنان. هم روح ائنان ائلاهی نغمه اوخویاجاغام، هم ده عاغیل ائنان. 16یوخسا اگر سن روح ائنان شوکور الهیئرسن، روحانی بئر عطاسی اولمایان آدام نجه سنئن شوکورلرئنه «آمئن» دئیه بئلر؟ چونکی سنئن ددئکلرئنی باشا دوشمور. 17البتّه سن یاخشی شوکور الهیئرسن، آمّا بوندان، باشقا بئر آدام بئنا اولمور. 18تارییا شوکور الهیئرم کی، من سئزئن هامیزدان چوخ آیری دئللره دانیشیرام. 19آمّا کئلئسادا آیری بئر دئلده اون مئن سؤز دانیشماقدان، داها چوخ بونا جان آتیرام کی، عاغلیم ائنان بش سؤز دانیشیم و اؤزگهلره تعلئم ورئم.
20قارداشلار، آنلاماقدا اوشاق اولمایین. پئسلئکده اوشاق اولون آمّا آنلاماقدا بویلی-باشلی! 21شرئعتده بله یازیلیب:
«رب دیئر:
”اجنبئلرئن دئللری ائنن،
اؤزگه لرئن دوداقلاری ائنن
بو خالق ائنان دانیشاجاغام،
آمّا او زامان دا منه قولاق آسمایاجاقلار.»
22پس آیری دئللره دانیشماق ائمان گتئرنلر اوچون یوخ، بلکی ائمانسیزلار اوچون بئر علامتدئر. آمّا نبئلئک ائمانسیزلار اوچون یوخ، ائمانلیلار اوچوندور. 23اگر بوتون کئلئسا بئر یره ییغیلیب هامی آیری دئللره دانیشسالار، و روحانی عطایا مالئک اولمایان یا دا ائمانسیز آداملار اورایا گئرسهلر، دِمزلر کی، سئز دَلیسئز؟! 24آمّا اگر هامی نبئلئک اله سهلر، و اورایا ائمانسیز بئر آدام، یا دا روحانی عطایا مالئک اولمایان بئری گئرسه، هامینین طرفئندن ائلزام اولوب هامییا جاوابگو قالار؛ 25اورهیئنئن سئرّلری آشکار اولار و اوزی-اوسته دوشوب پرستئش اِله ر و اعلان اِله ر کی، تاری حقئقتن سئزئن آرازدادیر.
کئلئسادا هر شی موناسئب و ترتئبلی بئر شکئلده اولسون
26قارداشلار بس ائندی نه؟ بئر یره ییغیلدیغیز زامان هر بئرئزئن بئر مزموری، بئر تعلئمی، بئر وحیی، بئر آیری دئلی، بئر ترجومهسی وار، قویون هر شی بئنا الهمک اوچون اولسون. 27اگر هر کس آیری بئر دئلده دانیشیر، ائکی یا دا لاپ چوخ اوچ آدام نؤوبه ائنن دانیشسینلار، بئر نفر ده ترجومه الهسئن. 28آمّا اگر ترجومهچی یوخدور، قوی او آدام کئلئسادا ساکئت قالسین و آنجاق اؤز اوریئنده و تاری ائنن دانیشسین.
29قوی ائکی یا دا اوچ پیغمبر دانیشسین و او بئرئلری تفتئش الهسئنلر. 30آمّا اگر اوتورانلاردان بئرئنه بئر وحی گلئر، قوی ائلک دانیشان آدام ساکئت قالسین. 31چونکی سئز هامیز، نؤوبه ائنن نبئلئک الئیهبئلرسئز کی، هامی تعلئم آلسین و هامی تشوئق اولونسون. 32پیغمبرلرئن روحلاری دا پیغمبرلره موطئع دئرلر. 33چونکی تاری قاریشیقلیق تاریسی یوخ، بلکی آراملیق تاریسیدیر، نجه کی، موقدّسلرئن بوتون کئلئساسیندا بله دئر.
34آروادلار کئلئسالاردا سوکوت الهسئنلر. چونکی صؤحبت الهمک اولارا قدغندئر. اولار شرئعتئن بویوردوغی کئمی موطئع اولسونلار. 35اگر بئر شی اؤیرنمک ائستهیئرلر، قوی اِوده اؤز اَرلرئندن سوروشسونلار؛ چونکی آروادا کئلئسادا صؤحبت الهمک عاییبدیر.
36مگر سئزئن طرئقئزدن ائدی کی تارینین کلامی یاییلدی؟ و یا فقط سئزه چاتدی؟! 37اؤزونی پیغمبر و یا روحانی حساب الهین هر آدام آنلاسین کی، سئزه یازدیقلاریم ربّئن امرلریدئر. 38آمّا کئم بونی نظره آلماسا، اؤزی ده نظره آلینماسین.
39پس قارداشلاریم، نبئلئک اله مهیی قیرت ائنن ائستهیئن و آیری دئللره دانیشانلارا دا مانع اولمایین. 40آمّا قویون هر شی موناسئب و ترتئبلی بئر شکئلده اولسون.
Currently Selected:
۱قورئنتلیلره 14: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
