۱قورئنتلیلره 12
12
روحانی عطالار
1قارداشلار، ائستهمئرم کی، روحانی عطالار حاقّیندا دا بئخبر اولاسیز. 2بئلئرسئز کی، بوتپرست اولاندا، آزدیریلیب، دئلسئز بوتلرئن طرفئنه آپاریلدیز. 3بونا گؤره سئزه بئلدئرئرم کی، تارینین موقدّس روحی واسئطهسی ائنن دانیشان هچ کئم دمز کی، «عئسا ملعوندور.» هچ کئم ده دئیه بئلمز کی، «عئسا ربدئر»، مگر تارینین موقدّس روحونون واسئطهسی ائنن.
4عطالار جوربهجور، آمّا روح همندئر. 5خئدمتلر جوربهجور، آمّا رب همندئر. 6عمللر ده موختلئف، آمّا تاری همندئر، هامیدا هر شیی یرئنه یتئرن ده اودور.
7آمّا هر کسه روحون ظوهوری خیئر اوچون ورئلئر. 8موقدّس روحون واسئطهسی ائنن بئرئنه حئکمت کلامی، و آیری بئرئنه اِله همن روحون واسئطهسی ائنن معرئفت کلامی ورئلئر. 9بئرئنه همن روحون واسئطهسی ائنن ائمان ورئلئر، آیری بئرئنه ده همن روحون واسئطهسی ائنن شفا عطالاری ورئلئر. 10بئرئنه مؤجوزهلر یاراتماسی، بئرئنه نبئلئک، بئرئنه روحلاری تشخئص ورئب آییرد الهمک، بئرئنه موختلئف دئللر، بئرئنه ده دئللرئن ترجومهسی. 11آمّا بوتون بولاری بئر و همن روح یرئنه یتئرئر و نجه کی، ائستهیئر، هر کسه فردن بؤلوشدوروب ورئر.
بئر بدن آمّا مؤختلئف عوضولر
12نجه کی، بدن بئر اولدوغی حالدا، چوخلی عوضولره مالئکدئر، بدنئن ده بوتون عوضولری، چوخ اولدوقلاری حالدا، گئنه بئر بدندئرلر. مسئحئن حاقّیندا دا اِلهدئر. 13چونکی بئز هامیمیز؛ ائستر یهودی اولاق، ائستر یونانلی، ائستر قول اولاق، ائستر آزاد، بئر روحدا تعمئد آلمیشیق، اله کی بئر بدن اولاق؛ هامیمیز دا بئر روحدان ائچدئرئلمئشئک. 14چونکی بدن بئر عوضودن یوخ، چوخ عوضودن عئبارتدئر. 15اگر آیاق دسه: «چونکی اَل دیئلم، بدندن ده دیئلم،» مگر بو اونی بدندن آییرار؟ 16اگر قولاق دا دسه: «چونکی گؤز دیئلم، بدندن ده دیئلم،» مگر بو اونی بدندن آییرار؟ 17اگر بوتون بدن گؤز اولسایدی، نجه اشئده بئلردی؟ اگر بوتون بدن قولاق اولسایدی، نجه ائیی بئلهردی؟ 18آمّا تاری عوضولرئن هر بئرئسئنی، اؤزی ائستهدئیی کئمی بدنده یرلشدئرئب. 19و اگر هامیسی بئر عوضو اولسایدی، بدن نه اولاردی؟ 20آمّا ائندی عوضولر چوخ، آمّا بدن بئردئر. 21گؤز اَله دئیه بئلمز کی، «سن منه لازیم دیئلسن.» و یا باش دا آیاقلارا دئیه بئلمز کی، «سئز منه لازیم دیئلسئز.» 22عکسئنه، بدنئن داها ضعئف گؤرونن عوضولری چوخ دا لازیمدیرلار. 23بدنئن داها آز دَیَرلی سایدیغیمیز عوضولرئنه داها چوخ دَیَر ورئرئک و بله ده خوش گؤرونمهین عوضولرئمئز داها چوخ خوش گؤرونور؛ 24خوش گؤرونن عوضولرئمئز بونا مؤحتاج دیئللر. آمّا تاری آز دَیَرلی عوضوه داها چوخ دَیَر گؤرسهدئب و بدنی اِله ترتئب ورئب کی، 25بدنده آیریلیق اولماسین، آمّا عوضولر بئربئرئنئن قیدئنه قالسینلار. 26و اگر بئر عوضو عذاب چکئر، هامی عوضولر اونونان عذاب چکرلر؛ و اگر بئر عوضو عئزّت قازانیر، هامی عوضولر اونونان شادلیق اله یرلر.
27سئز ده ائندی مسئحئن بدنئسئز، هر بئرئز ده اونون عوضولرئسئز. 28و تاری کئلئسادا بئرئنجی حوارئلری، ائکئنجی نبئلری، اوچونجی موعلّئملری، سورا مؤجوزه ائشلرئنی، سورا شفا عطاسینی، سورا کؤمک، ائداره اله مه یی و موختلئف دئللره دانیشماغی تعیئن الهیئب. 29مگر هامی حواریدئر؟ مگر هامی نبئدئر؟ مگر هامی موعلّئمدئر؟ مگر هامی مؤجوزه یاراداندیر؟ 30مگر هامیدا شفا عطالاری وار؟ مگر هامی دئللرده دانیشیر؟ مگر هامی ترجومه الهیئر؟
31آمّا سئز داها بؤیوک عطالاری قیرت ائنن ائستهیئن. من ده سئزه داها بؤیوک یولی گؤرسدئم.
Currently Selected:
۱قورئنتلیلره 12: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
