۱قورئنتلیلره 11
11
1مندن نومونه آلین، نجه کی، من ده مسئحدن آلیرام.
آروادلارین دوعا و نبئلئک اله مه سی
2منی هر شیده خاطیرلادیغیز اوچون و سئزه تاپشیردیغیم تعلئملری برک توتدوغوز اوچون سئزی تعرئفلهیئرم.
3ائستهیئرم بونی دا باشا دوشهسئز کی، هر کئشئنئن باشی مسئحدئر، هر آروادین باشی کئشئدئر. مسئحئن باشی دا تاریدیر. 4هر کئشی کی، باشی اؤرتولی دوعا یا دا نبئلئک الهیئر، اؤز باشینی حؤرمتسئز الهیئر. 5هر آرواد دا کی، باشی اؤرتولمهمئش دوعا یا دا نبئلئک الهیئر، اؤز باشینی حؤرمتسئز الهیئر؛ چونکی اونون بو ائشی بونا بنزه یئر کی اؤز ساچلارینی قیرخمیش اولوب. 6چونکی اگر بئر آرواد باشینی اؤرتمهسه، قوی ساچلارینی قیرخسین؛ آمّا اگر آرواد اوچون عاییبدیر کی، ساچلاری قیرخیلسین و یا باشینا اولگوج چکدئرسئن، قوی اوندا باشینی اؤرتسون. 7کئشی باشینی اؤرتمهملئدئر، چونکی تارینین شکئل و عئزّتئدئر. آمّا آرواد کئشئنئن عئزّتئدئر. 8چونکی کئشی آرواددان یوخ، آرواد کئشئدن یاراندی. 9دوغرودان دا کئشی آرواد اوچون یوخ، آرواد کئشی اوچون یاراندی. 10بونا گؤره، و ملکلرئن خاطئرئنه، گرک آروادین باشی اوستونده قودرت نئشانی اولا. 11گرچی، ربده نه آرواد کئشئدن موستقئلدئر، نه ده کئشی آرواددان. 12چونکی نجه آرواد کئشئدن یارانیر، کئشی ده آروادین واسئطهسی ائنن یارانیر. آمّا هر شیی یارادان تاری دیر. 13سئز اؤزوز قرار ورئن؛ آیا آروادا یاراشیر کی، باشی آچیق تارییا دوعا اله سئن؟! 14مگر طبئعتئن اؤزی سئزه اؤیرتمئر کی، اگر کئشی ساچلارینی اوزاتسا، بو اونون اوچون بیآبیرلیقدیر؟! 15آمّا اگر آرواد ساچلارینی اوزاتسا، بو اونون اوچون عئزّتدئر؟! چونکی ساچلاری اونا اؤرتو اوچون ورئلئب. 16آمّا اگر بئر کس ائستهسه کی، بو بارهده بحث الهسئن، نه بئزئم، نه ده تارینین کئلئسالارینین بله بئر عادتی وار.
ربئن سوفره سی
17آمّا بو تعلئملری وِرنده سئزی تعرئفلهمئرم، چونکی ییغیناجاغیز خیئر اوچون یوخ، شر اوچوندور. 18چونکی، اوّلن، اشئدئرم کی، کئلئسادا بئر یره گلدئیئز زامان، آرازدا دستهبازلیق اولور. بونا من، بئر حدّه جاق دا اولسا، ائنانیرام. 19چونکی آرازدا ائختئلافلار اولمالیدیر، اله کی آرازدا قبول اولونموش آداملار، آشکار اولسونلار. 20اوندا کی بئر یره ییغیلیرسیز، قصدئز ربّئن سوفرهسئنده شئرکت الهمک دیئل. 21چونکی یمکده هر کس قابقجا اؤز شامینی ییئر؛ بئری آج قالیر، او بئرئسی کفلهنئر. 22بو نهدئر؟ مگر یمک-ائچمک اوچون اِوئز یوخدور؟! یوخسا تارینین کئلئساسینی تحقئر الهیئب، هچ بئر شیی اولمایانلاری اوتاندیریرسیز؟ سئزه نه دیئم؟ تعرئف اله یئم؟ بو خوصوصدا سئزی تعرئف اله مئیهجهیم.
23چونکی من ربدن آلدیغیمی، سئزه ده چاتدیردیم. بو کی، رب عئسا تسلئم اولوندوغی گجه چؤرک گؤتوردی 24و شوکور الهیندن سورا اونی بؤلوب ددی: «بو سئزئن اوچون منئم بدنئمدئر. منی خاطیرلاماق اوچون بونی یرئنه یتئرئن.» 25اِله اوجور ده شامدان سورا پئیالانی گؤتوروب ددی: «بو پئیالا تارینین تَزه عهدی دئر کی منئم قانیم ائنان مؤهورله نئر. نه زامان بونی ائچئرسئز، منی خاطیرلاماق اوچون ائچئن.» 26چونکی بو چؤرهیی یدئیئز و بو پئیالادان ائچدئیئز هر زامان، ربّئن اؤلومونی او زاماناجاق کی رب گله اعلان الهیئرسئز.
27اونا گؤره ده، کئم لایئق اولمایان طرزده ربّئن بو چؤرهیئندن ییئب یا دا پئیالاسیندان ائچسه، ربّئن بدنئنه و قانینا تقصئرلی اولور. 28آمّا هر کس گرک اؤزوی-اؤزونی ائمتاحان الهسئن و بلهده بو چؤرکدن یِسئن و بو پئیالادن ائچسئن. 29چونکی هر کس ربّئن بدنئنی آییرد اله مدن یِیئب ائچسه، ییئب ائچمک ائنن اؤزونون ضئدّئنه محکومئیّت گتئرئر. 30بونا گؤره ده، سئزلردن چوخی ضعئف و ناخوشدور، بئر نچهسی ده گؤزلرئنی حیاتا یوموب. 31آمّا اگر بئز اؤز-اؤزوموزه حؤکم اله سَیدئک، بئزه حؤکم اولمازدی. 32آمّا بئزه حؤکم اولونان زامان، ربّئن طرفئندن تربئیه اولونوروق کی، دونیا ائنن بئرلئکده محکوم اولمایاق.
33بونون اوچون، قارداشلاریم، یمهیه ییغیلاندا بئربئرئزی گؤزلهیئن. 34اگر آج اولان وار دیر، قوی اِوئنده یسئن کی، ییغیشماغیز موحاکئمه اولونماغیزا باعئث اولماسین. قالان مطلبلری اؤزوم گلنده نئظاما سالارام.
Currently Selected:
۱قورئنتلیلره 11: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
