James 1
1
1ဘုရားရှင်နှင့်ယေရှုခရစ်တော်၏ အစေခံဖြစ်သော ကျွန်ုပ်ယာကုပ်သည် ကမ္ဘာတစ်ခုလုံးတွင် ပြန့်နှံ့လျက်ရှိသော တစ်ဆယ့်နှစ်မျိုးသောလူမျိုးနွယ်များထံသို့ နှုတ်ခွန်းဆက်သလိုက်ပါသည်။ 2ညီအစ်ကိုမောင်နှမတို့၊ သင်တိုသည် အခက်အခဲ ဒုက္ခအမျိုမျိုးနှင့် ကြုံတွေ့ရလျှင် ဝမ်းမြောက်ပျော်ရွှင်စရာအဖြစ် မှတ်ယူကြလော့။ 3အဘယ်ကြောင့်ဆိုသော် သင်တို့၏ယုံကြည်ခြင်းကို စမ်းသပ်ခြင်းသည် သည်းခံခြင်းကိုဖြစ်ပေါ်စေကြောင်း သင်တို့သိကြသောကြောင့်ဖြစ်သည်။ 4သင်တို့သည် မည်သည့်ချို့တဲ့မှုမှမရှိဘဲ ရင့်ကျက်လျက်ပြီးပြည့်စုံနိုင်ရန်အတွက် အဆုံးတိုင်အောင် သည်းခံရမည်ဖြစ်သည်။ 5သင်တို့တွင် တစ်စုံတစ်ယောက်သည် ဉာဏ်ပညာကို လိုအပ်၍ ဘုရားရှင်ထံမှတောင်းခံလျှင် အပြစ်ယူတော်မမူဘဲ ဘုရားရှင်သည် ထိုသူအား ရက်ရက်ရောရောပေးတော်မူပါလိမ့်မည်။ 6သို့သော် သင်တို့ တောင်းလျှောက်သောအခါတိုင်း သံသယမရှိဘဲ ယုံကြည်မှုရှိရမည်။ သံသယစိတ်ရှိသောသူသည် လေတိုက်၍ လှုပ်ရှားတတ်သော ပင်လယ်လှိုင်းတံပိုးနှင့်တူသည်။ 7ဤသို့သံသယရှိသူသည် အရှင်ထံမှ တစ်စုံတစ်ရာကို ရရှိမည်ဟု မမျှော်လင့်သင့်ပေ။ 8ထိုသို့သောသူသည် စိတ်နှစ်ခွရှိ၍ မိမိလုပ်ဆောင်သမျှတွင် တည်ကြည်မှုမရှိသောသူဖြစ်သည်။ 9နိမ့်ကျသောအခြေအနေရှိသော ယုံကြည်သူတို့သည် သင်တို့ချီးမြှောက်ခြင်းခံရသည့်အခါ ဂုဏ်ယူဝမ်းမြောက်ကြပါစေ။ 10သို့သော် ချမ်းသာသောသူတို့သည် တောပန်းကဲ့သို့ ညှိုးနွမ်းခြောက်သွေ့သွားမည်ဖြစ်သည့်အတွက်ကြောင့် နှိမ့်ချခြင်းခံရသောအခါ ဂုဏ်ယူဝမ်းမြောက်တတ်ပါစေ။ 11ပူပြင်းသောနေရောင်အောက်တွင် တောပန်းများသည် ညှိုးနွမ်းခြောက်သွေ့သွားပါလိမ့်မည်။ ထိုနည်းတူပင် ချမ်းသာသောသူများသည်လည်း မိမိတို့၏စီးပွားကိုရှာဖွေလျက်နေစဥ်၌ပင် ပျောက်ကွယ်သွားကြပါလိမ့်မည်။ 12ဒုက္ခဆင်းရဲတို့ဖြင့် စမ်းသပ်ခြင်းကို အဆုံးတိုင်အောင် ကြံ့ကြံ့ခံသောသူသည် မင်္ဂလာရှိသည်။ အဘယ်ကြောင့်ဆိုသော် သူသည် ထိုစမ်းသပ်ခြင်းကို အောင်မြင်သောအခါ ဘုရားရှင်ကိုချစ်သောသူတို့အား ကိုယ်တော်ကတိတော်ထားခဲ့သော အသက်တည်းဟူသောဆုကို ရရှိမည်ဖြစ်သောကြောင့်ပင်ဖြစ်သည်။ 13ဖြားယောင်းသွေးဆောင်ခြင်းကိုခံရသည့်အခါ “ဘုရားရှင်က ကျွန်ုပ်အား သွေးဆောင်သည်” ဟု မဆိုစေနှင့်။ အဘယ်ကြောင့်ဆိုသော် မကောင်းမှုသည် ဘုရားရှင်ကို မသွေးဆောင်နိုင်။ ဘုရားရှင်သည်လည်း မည်သူ့ကိုမျှ မကောင်းမှုပြုရန် သွေးဆောင်ခြင်းမပြုလုပ်ပေ။ 14ဖြားယောင်းသွေးဆောင်ခြင်းဆိုသည်မှာ လူသည် မိမိ၏မကောင်းသောတပ်မက်မှု၏ ဆွဲဆောင်ရာနောက်သို့ လိုက်ပါသွားခြင်းပင်ဖြစ်သည်။ 15ထို့နောက် ထိုမကောင်းသောတပ်မက်မှုသည် သန္ဓေတည်၍ အပြစ်ဒုစရိုက်ကိုမွေးဖွားသည်။ အပြစ်ဒုစရိုက်သည် ကြီးထွားလာသောအခါ သေခြင်းကိုဖြစ်ပေါ်စေလေသည်။ 16ချစ်သောညီအစ်ကိုမောင်နှမတို့၊ အယူမလွဲကြပါနှင့်။ 17ကောင်းမြတ်သောဆုကျေးဇူးနှင့် ပြီးပြည့်စုံသောလက်ဆောင်များသည် ရွှေမြို့တော်အလင်းများကို ဖန်ဆင်းတော်မူသော အဖဘုရားထံမှ ဆင်းသက်လာခြင်းဖြစ်သည်။ အဖဘုရားထံတော်၌ ပြောင်းလဲခြင်း၊ သို့မဟုတ် ရွှေ့လျားတတ်သော အရိပ်ဟူ၍မရှိ။ 18ကိုယ်တော်သည် မိမိအလိုတော်နှင့်အညီ သမ္မာတရားစကားအားဖြင့် ကျွန်ုပ်တို့ကိုဖြစ်ပွားစေတော်မူသည်။ ဤအရာမှာ ဖန်ဆင်းတော်မူသောအရာတို့တွင် ကျွန်ုပ်တို့အား အသီးဦးသဖွယ်ဖြစ်စေရန်ဖြစ်သည်။ 19ချစ်သောညီအစ်ကိုမောင်နှမတို့၊ ဤအကြောင်းအရာတို့အား သိမှတ်ကြလော့။ လူတိုင်းသည် ကြားနာရာတွင် လျင်မြန်၍ ပြောဆိုမှုနှင့် အမျက်ထွက်ရာတွင် နှေးကွေးကြပါစေ။ 20အဘယ်ကြောင့်ဆိုသော် ဒေါသထွက်သူသည် ဘုရားရှင်၏ဖြောင့်မတ်သောတရားအမှုတို့ကို ဆောင်ရွက်၍ မရနိုင်သောကြောင့်ဖြစ်သည်။ 21ထို့ကြောင့် ညစ်ညူးစေသည့် အလေ့အထနှင့် ဆိုးယုတ်သည့်အကျင့်မှန်သမျှတို့ကို ဖယ်ရှားပါ။ သင်တို့၏စိတ်အတွင်း၌ ဘုရားရှင်ထည့်သွင်းထားသောနှုတ်ကပတ်တော်အား နှိမ့်ချစွာလက်ခံကြလော့။ ထိုနှုတ်ကပတ်တော်သည် သင်တို့အား ကယ်တင်နိုင်သည်။ 22ထိုနှုတ်ကပတ်တော်အား ကြားနာရုံမျှသာ ကြားနာခြင်းအားဖြင့် မိမိကိုယ်ကိုမလှည့်စားကြနှင့်။ နှုတ်ကပတ်တော်အား လိုက်နာကျင့်သုံးသောသူဖြစ်ကြလော့။ 23နှုတ်ကပတ်တော်အား ကြားနာရုံမျှသာကြားနာ၍ မလိုက်နာသောသူသည် မိမိမျက်နှာကို မှန်တွင်ကြည့်သူနှင့်တူသည်။ 24ထိုလူသည် မှန်ရှေ့မှထွက်ခွာသွားလျှင် သူ၏ပုံရိပ်အား ချက်ချင်းမေ့ပျောက်သွားသကဲ့သို့ နှုတ်ကပတ်တော်များကို မေ့လျော့သွားပါလိမ့်မည်။ 25သို့သော် လွတ်လပ်ခြင်းသို့ရောက်စေသည့် ပြီးပြည့်စုံသော ပညတ်ကျမ်းကို ဆက်လက်၍ သေချာစွာကြည့်ရှုစောင့်ထိန်းသောသူသည် ကြားနာရသည်ကို မေ့လျော့တတ်သူမဟုတ်ဘဲ လက်တွေ့လိုက်နာကျင့်သုံးသောသူဖြစ်လျှင် ထိုသို့ပြုသည့်အတွက် ဘုရားရှင်သည် ထိုသူအား ကောင်းချီးပေးလိမ့်မည်ဖြစ်သည်။ 26မိမိကိုယ်ကို ဘာသာတရားကိုင်းရှိုင်းသူဟု ထင်မှတ်ထားသောသူတို့သည် ယုတ်ညံ့သောစကားများကိုပြောဆိုပါလျှင် မိမိကိုယ်ကိုလှည့်စားသူဖြစ်၍ ဘာသာတရားကိုင်းရှိုင်းသော်လည်း အချည်းနှီးပင်ဖြစ်သည်။ 27ကျွန်ုပ်တို့၏အဖဘုရားရှင်ရှေ့တော်၌ စင်ကြယ်၍ ညစ်ညူးခြင်းမရှိသော ဘာသာတရားကိုင်းရှိုင်းခြင်းမူကား ဆင်းရဲဒုက္ခရောက်သော မိဘမဲ့ကလေးတို့လည်းကောင်း၊ မုဆိုးမတို့ကိုလည်းကောင်း ကြည့်ရှုစောင့်ရှောက်ခြင်းနှင့် ဤလောက၏ညစ်ညူးခြင်းတို့နှင့်ကင်းစင်စေရန် မိမိကိုယ်ကိုစောင့်ထိန်းခြင်းပင်ဖြစ်သည်။
Currently Selected:
James 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
