Hebrews 13
13
1သင်တို့သည် ညီအစ်ကိုမောင်နှမကဲ့သို့ တစ်ဦးကိုတစ်ဦးချစ်မြဲချစ်ကြလော့။ 2သူစိမ်းတို့အား ဧည့်ဝတ်ပြုရန် မမေ့ကြနှင့်။ ထိုသို့ဧည့်ဝတ်ကိုပြုသောသူအချို့တို့သည် နတ်ဒေဝါများကိုပင် အမှတ်မထင် ဧည့်ခံခဲ့ကြပေသည်။ 3သင်တို့သည် အကျဉ်းကျခံရသူများနှင့်အတူ အကျဉ်းကျနေရသကဲ့သို့ မှတ်ယူလျက် သူတို့အား သတိရကြလော့။ မိမိတို့ကိုယ်တိုင်ပင် ဒုက္ခဝေဒနာခံရသကဲ့သို့ ဒုက္ခဝေဒနာခံရသူများကို သတိရကြလော့။ 4ထိမ်းမြားလက်ထပ်ခြင်းကို လူတိုင်းလေးစားကြရမည်။ အိမ်ထောင်ရေးတွင် တစ်ဦးကိုတစ်ဦး သစ္စာရှိရမည်။ ဘုရားရှင်သည် တရားနှင့်မညီသောမေထုန်ပြုသူများနှင့် အိမ်ထောင်ရေးဖောက်ပြန်မှုကျူးလွန်သူများကို တရားစီရင်တော်မူလိမ့်မည်။ 5သင်တို့သည် ငွေအတွက်အသက်မရှင်ဘဲ ရှိသည့်အရာဖြင့် ရောင့်ရဲလော့။ အဘယ်ကြောင့်ဆိုသော် ဘုရားရှင်က “ငါသည် သင့်ကို မည်သည့်အခါမျှ ထားခဲ့မည်မဟုတ် မည်သည့်အခါမျှ စွန့်ပစ်မည်မဟုတ်”ဟု မိန့်တော်မူခဲ့သောကြောင့်ဖြစ်သည်။ 6ထို့ကြောင့် “ထာဝရဘုရားသည် ကျွန်ုပ်အား ကူညီမစတော်မူသော အရှင်ဖြစ်တော်မူသဖြင့် ကျွန်ုပ်သည် ကြောက်ရွံ့လိမ့်မည်မဟုတ်။ လူသည် ကျွန်ုပ်အား မည်သို့ပြုနိုင်မည်နည်း” ဟု ကျွန်ုပ်တို့သည် ယုံကြည်စိတ်ချစွာနှင့် ပြောဆိုကြရသည်။ 7သင်တို့အား ဘုရားရှင်၏နှုတ်ကတော်ကို ဟောပြောခဲ့သော သင်တို့၏ခေါင်းဆောင်များကို သတိရကြလော့။ သူတို့၏အသက်ရှင်နေထိုင်မှုမှရရှိသော အကျိုးတရားကို ဆင်ခြင်၍ သူတို့၏ယုံကြည်ခြင်းကို အတုယူကြလော့။ 8ယေရှုခရစ်တော်သည် မနေ့၊ ယနေ့၊ နောင်ကာလအစဉ်အမြဲ မပြောင်းမလဲဘဲ ရှိနေတော်မူသည်။ 9သင်တို့သည် ထူးဆန်းသည့် အယူဝါဒအမျိုးမျိုးတို့ဆွဲဆောင်ရာသို့ လိုက်ပါမသွားကြနှင့်။ စိတ်နှလုံးအား ခိုင်ခံ့မြဲမြံစေရာတွင် အစားအစာနှင့်ဆိုင်သော ပညတ်များကို စောင့်ထိန်းခြင်းမဟုတ်ဘဲ ဘုရားရှင်၏ ကျေးဇူးတော်အားဖြင့် ခိုင်ခံ့မြဲမြံစေလျှင် အကျိုးရှိသည်။ အစားအစာနှင့်ပတ်သက်သောပညတ်များကို လိုက်နာသောသူတို့သည် မည်သည့်အကျိုးကိုမျှ ရရှိမည်မဟုတ်ပေ။ 10ကျွန်ုပ်တို့တွင် ပလ္လင်တစ်ခုရှိသည်။ ထိုပလ္လင်ပေါ်မှ ပူဇော်သကာများကို တဲတော်၌အမှုတော်ဆောင်သောပုရောဟိတ်များပင်လျှင် စားခွင့်မရှိကြပေ။ 11အကြီးဆုံးပုရောဟိတ်သည် တိရစ္ဆာန်များ၏ သွေးကို အပြစ်ဖြေရာပူဇော်သကာအဖြစ်ဖြင့် အလွန်သန့်ရှင်းရာဌာနတော်သို့ ယူဆောင်လာခဲ့သော်လည်း တိရစ္ဆာန်အသေကောင်တို့ကိုမူ စခန်းအပြင်၌ မီးရှို့ပစ်ရသည်။ 12ထို့ကြောင့် ကိုယ်တော်ယေရှုသည်လည်း မိမိ၏သွေးတော်အားဖြင့် လူတို့၏အပြစ်ဒုစရိုက်များကို စင်ကြယ်စေနိုင်ရန် မြို့တံခါး၏ အပြင်ဘက်၌ အသေခံတော်မူသည်။ 13သို့ဖြစ်၍ ကျွန်ုပ်တို့သည် ကိုယ်တော်ရှိရာ စခန်းအပြင်ဘက်သို့သွား၍ ကိုယ်တော်နှင့် အတူ ကဲ့ရဲ့ရှုတ်ချခြင်းကို ခံကြကုန်အံ့။ 14အဘယ်ကြောင့်ဆိုသော် ဤလောက၌ ကျွန်ုပ်တို့အတွက် တည်မြဲသောမြို့မရှိသောကြောင့်ဖြစ်သည်။ ကျွန်ုပ်တို့ကား နောင်အခါ၌ ဖြစ်ပေါ်မည့်မြို့ကိုသာ စောင့်မျှော်လျက်နေကြပေသည်။ 15ထို့ကြောင့် ကျွန်ုပ်တို့သည် ကိုယ်တော်ယေရှုပြုခဲ့သောအမှုတော်အားဖြင့် ဘုရားရှင်၏နာမတော်အား ဝန်ခံသောနှုတ်များဖြင့် ချီးမွမ်းခြင်းပူဇော်သကာကို အစဉ်မပြတ်ပူဇော်ကြပါစို့။ 16သင်တို့သည် အချင်းချင်းအား ကောင်းမှုပြုရန်နှင့် ကူညီမစရန်မမေ့ကြနှင့်။ ထိုသို့သောပူဇော်ခြင်းမျိုးကို ဘုရားရှင်နှစ်သက်တော်မူသည်။ 17သင်တို့ခေါင်းဆောင်များ၏စကားကို နားထောင်ကြလော့။ သူတို့ပြောသည့်အတိုင်း ပြုကြလော့။ သူတို့သည် မိမိတို့ပြုသည့်အမှုကို ဘုရားရှင်အား အစီရင်ခံရမည်ဖြစ်၍ သင်တို့၏စိတ်ဝိညာဉ်ကို အစဉ်အမြဲကြည့်ရှုစောင့်ရှောက်လျက်နေကြပေသည်။ သင်တို့သည် သူတို့စကားကို နာခံပါလျှင် သူတို့သည် ရွှင်လန်းဝမ်းမြောက်စွာ လုပ်ဆောင်ကြလိမ့်မည်။ သို့မဟုတ်လျှင် သူတို့ဝမ်းနည်းကြရသဖြင့် သင်တို့အတွက် မည်သည့်အကျိုးမျှရှိလိမ့်မည်မဟုတ်။ 18ကျွန်ုပ်တို့အတွက် ဆက်လက်ဆုတောင်းနေကြလော့။ ကျွန်ုပ်တို့သည် မိမိတို့၏စိတ်ကြည်လင်သည် ကို အသေအချာသိသည်။ အဘယ့်ကြောင့်ဆိုသော် ကျွန်ုပ်တို့သည် အရာရာတိုင်းအား ကောင်းမွန်စွာ ပြုမူနေထိုင်ရန်သာ ဆန္ဒရှိကြသောကြောင့်ဖြစ်သည်။ 19ငါသည် သင်တို့ထံသို့ လျင်မြန်စွာ ပြန်လာနိုင်စေရန်အတွက် ဆုတောင်းကြပါလော့ဟု သင်တို့အား အထူးမေတ္တာရပ်ခံပါသည်။ 20ထာဝရပဋိညာဉ်နှင့်ဆိုင်သော သွေးတော်အားဖြင့် သိုးထိန်းကြီးဖြစ်တော်မူသော ကျွန်ုပ်တို့အရှင်ကိုယ်တော်ယေရှုအား ဘုရားရှင်သည် သေခြင်းမှအသက်ပြန်ရှင်စေတော်မူပြီ။ 21သင်တို့သည် ငြိမ်သက်ခြင်းအရှင်ဘုရားရှင်၏အလိုတော်ကို ဆောင်ရွက်နိုင်ကြစေရန် ကိုယ်တော်သည် သင်တို့အား ကောင်းမြတ်သောအရာဟူသမျှတို့ဖြင့် ပြည့်စုံစေတော်မူပါစေသော။ ကိုယ်တော်သည် မိမိနှစ်သက်တော်မူဖွယ်ရာကို ယေရှုခရစ်တော်အားဖြင့် ကျွန်ုပ်တို့တွင်ပြုတော်မူပါစေသော။ ထိုအရှင်သည် ကမ္ဘာအဆက်ဆက် ဘုန်းအသရေထွန်းတောက်တော်မူပါစေသော။ အာမင်။ 22ညီအစ်ကိုမောင်နှမတို့၊ ယခုသင်တို့ထံသို့ ငါရေးလိုက်သောစာသည် အကျဉ်းချုံးအားဖြင့်သာ ရေးလိုက်သောစာဖြစ်၍ ဤအားပေးတိုက်တွန်းချက်ကို နာယူကြရန် သင်တို့အား ကျွန်ုပ်တိုက်တွန်းနှိုးဆော်ပါသည်။ 23ကျွန်ုပ်တို့၏ညီအစ်ကိုတိမောသေသည် အကျဉ်းထောင်မှလွတ်မြောက်၍ သူသည် ကျွန်ုပ်ထံသို့ အချိန်မှီရောက်ရှိလာပါက သင်တို့နှင့်တွေ့ဆုံရန် ကျွန်ုပ်လာသောအခါတွင် သူ့အားခေါ်ခဲ့ပါမည်။ 24သင်တို့၏ခေါင်းဆောင်အပေါင်းနှင့် အရှင်၏လူအပေါင်းတို့အား နှုတ်ဆက်ကြလော့။ အီတလီပြည်မှညီအစ်ကိုတို့ကလည်း သင်တို့အား နှုတ်ဆက်လိုက်ပါသည်။ 25ဘုရားရှင်၏ကျေးဇူးတော်အား သင်တို့အားလုံးခံစားရကြပါစေသော။
Currently Selected:
Hebrews 13: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
