James 2
2
1ညီအစ်ကိုမောင်နှမတို့၊ ဘုန်းအသရေတော်နှင့်ပြည့်စုံတော်မူသော ယေရှုခရစ်တော်ကိုယုံကြည်သူ ဖြစ်လျှင် တစ်ခြားသောသူတို့အား မျက်နှာလိုက်၍ မဆက်ဆံပါနှင့်။ 2သင်တို့၏ဝတ်ပြုစည်းဝေးကျောင်းထဲသို့ ရွှေလက်စွပ်များနှင့်ဝတ်ကောင်းစားလှဝတ်ဆင်ထားသူ လူတစ်ဦးဝင်လာပြီး ဟောင်းနွမ်းသောအဝတ်အစားများ ဝတ်ဆင်ထားသော ဆင်းရဲသားတစ်ဦး ဝင်လာသောအခါ 3သင်တို့သည် ဝတ်ကောင်းစားလှဝတ်ဆင်ထားသူအား အလေးပေးကာ “ဤအကောင်းဆုံးနေရာတွင် ထိုင်ပါ” ဟု ဆိုပြီး ဆင်းရဲသားအား “သင်သည် ထိုနေရာတွင်ရပ်နေလိုက်ပါ” သို့မဟုတ် “ခြေရင်းကြမ်းပြင်ပေါ်တွင် ထိုင်ပါ” ဟု ပြောဆိုကြလျှင် 4သင်တို့သည် အချင်းချင်းလူတန်းစားခွဲခြားသည့် မကောင်းသောအကြံအစည်တို့ဖြင့် တရားစီရင်သောသူများ ဖြစ်ကြသည်မဟုတ်လော။ 5ချစ်သောညီအစ်ကိုမောင်နှမတို့၊ နားထောင်ကြလော့။ ဘုရားရှင်သည် ဤလောက၌ ဆင်းရဲသောသူတို့ကို ယုံကြည်ခြင်း၌ကြွယ်ဝသောသူများဖြစ်ကြစေရန် မိမိအားချစ်သောသူတို့ကိုမူ ကတိထားတော်မူသောနိုင်ငံတော်ကိုအမွေဆက်ခံသူများဖြစ်ကြစေရန် ရွှေးကောက်တော်မူသည်မဟုတ်လော။ 6သို့သော် သင်တို့သည် ဆင်းရဲသားများကို မထိမဲ့မြင်ပြုတတ်ကြသည်။ သို့သော် သင်တို့အား ဖိနှိပ်ချုပ်ချယ်၍ တရားရုံးသို့ ဆွဲခေါ်သွားသောသူတို့သည် ချမ်းသာသောသူများမဟုတ်လော။ 7ထိုချမ်းသာသူတို့သည် သင်တို့ခံယူရရှိသည့် ကောင်းမြတ်သောနာမတော်အား ကဲ့ရဲ့စော်ကားကြသည်မဟုတ်လော။ 8သင်တို့သည် "မိမိကိုယ်မိမိချစ်ခင်သလို အိမ်နီးချင်းများကိုလည်း ချင်ခင်ပါ" ဟု ကျမ်းစာထဲမှာ ဖော်ပြထားသည့်အတိုင်း လိုက်နာသင့်ပါသည်။ 9သို့သော် သင်သည် မျက်နှာလိုက်၍ပေါင်းသင်းဆက်ဆံခြင်းသည် အပြစ်ကျူးလွန်သူဖြစ်ပြီး ပညတ်တော်ကို ချိုးဖောက်သူအဖြစ် ပြစ်ဒဏ်ချမှတ်ခံရလိမ့်မည်။ 10ပညတ်တော်များထဲမှတစ်ခုကို မလိုက်နာလျှင်လည်း တစ်ခြားသောပညတ်တော်များအားလုံးကို မလိုက်နာသည်နှင့်အတူတူပင်ဖြစ်သည်။ 11အကြောင်းမူကား “အိမ်ထောင်ရေးဖောက်ပြန်မှုကို မကျူးလွန်နှင့်” ဟု ပညတ်တော်မူသော အရှင်သည် “လူ၏အသက်ကိုမသတ်ရ”ဟူ၍လည်း ပညတ်တော်မူသည့်အခါ အိမ်ထောင်ရေးဖောက်ပြန်မှုအား မကျူးလွန်သော်လည်း လူသတ်မှုကိုကျူးလွန်လျှင် ဘုရားရှင်၏ပညတ်တော်အား ချိုးဖောက်ခြင်းပင်ဖြစ်သည်။ 12ထိုကြောင့် သင်တို့အားလွတ်မြောက်စေသော ပညတ်တော်များအတိုင်း စီရင်ခြင်းခံရမည့်သူများကဲ့သို့ ပြောဆိုပြုမူကြလော့။ 13သနားကရုဏာကင်းမဲ့သောသူသည် သနားကရုဏာကင်းမဲ့စွာ တရားစီရင်ခြင်းခံရလိမ့်မည်။ သနားကရုဏာရှိသောသူသည် တရားစီရင်ခြင်းအား ကြောက်လန့်နေရန်မလိုပေ။ 14ညီအစ်ကို မောင်နှမတို့၊ တစ်စုံတစ်ယောက်သည် ယုံကြည်ခြင်းရှိသည်ဟုဆိုသော်လည်း လုပ်ဆောင်ခြင်းမရှိလျှင် မည်သည့်အကျိုးရှိမည်နည်း။ ထိုသို့သောယုံကြည်ခြင်းသည် သူ့အားကယ်တင်နိုင်ပါသလော။ 15ညီအစ်ကို မောင်နှမတစ်ဦးဦးတွင် အစားအသောက်၊ အဝတ်အစားများချို့တဲ့သောအခါ 16“သင်တို့မည်သည်ကိုမှ မစိုးရိမ်ပါနှင့်။ နွေးနွေးထွေးထွေးနေ၍ ဝလင်စွာစားကြလော့” ဟု ပြောသော်လည်း သူတို့လိုအပ်သော အစားအစာနှင့် အဝတ်အစားတို့ကိုမပေးဘဲနေလျှင် သူတို့အတွက်မည်သည့်အကျိုးရှိမည်နည်း။ 17ထိုနည်းအတိုင်းပင် ယုံကြည်ခြင်းသည်လည်း လုပ်ဆောင်ခြင်းမရှိဘဲ ၎င်းသက်သက်သာဖြစ်ပါက အသေဖြစ်သည်။ 18သို့ဖြစ်၍ တစ်စုံတစ်ဦးက “လူတချို့၌ ယုံကြည်ခြင်းရှိ၍ လူတချို့၌ လုပ်ဆောင်မှုရှိသည်” ဟု ပြောလာလျှင် ကျွန်ုပ်သည် “လုပ်ဆောင်ခြင်းမရှိလျှင် သင်၏ယုံကြည်ခြင်းကို မည်သို့ပြနိုင်မည်နည်း။ လုပ်ဆောင်ခြင်းအားဖြင့် ကျွန်ုပ်၏ယုံကြည်ခြင်းကိုသက်သေပြနိုင်သည်” ဟု ပြန်ပြောသည်။ 19သင်သည် ဘုရားရှင်တစ်ပါးတည်းသာရှိသည်ဟု ယုံကြည်ခြင်းသည်ကောင်းပေသည်။ ဤကဲ့သို့ပင် မကောင်းဆိုးဝါးများသည်လည်း ယုံကြည်ကြ၍ ကြောက်လန့်ကြသည်။ 20အို လူမိုက်၊ လုပ်ဆောင်ခြင်းမရှိသော ယုံကြည်ခြင်းသည် အသုံးမဝင်ကြောင်း သက်သေလိုအပ်သလော။ 21ကျွန်တော်တို့၏ဘိုးဘေးဖြစ်သူ အာဗြဟံသည် မိမိသားဣဇက်အား ပလ္လင်ပေါ်တွင်တင်၍ ပူဇော်သောအခါ ထိုသို့လုပ်ဆောင်မှုအားဖြင့် ဖြောင့်မတ်သည်ဟု အသိအမှတ်ပြုခံရသည်မဟုတ်လော။ 22သူ၏ ယုံကြည်ခြင်းသည် သူ၏လုပ်ဆောင်ခြင်းနှင့်အတူဆောင်ရွက်၍ ထိုလုပ်ဆောင်မှုအားဖြင့် ယုံကြည်ခြင်းသည် ပြီးပြည့်စုံခြင်းသို့ ရောက်ရှိသည်ကို သင်တို့တွေ့မြင်ရပါလိမ့်မည်။ 23ကျမ်းစာထဲတွင် “အာဗြဟံသည် ဘုရားရှင်ကို အမှန်တကယ်ယုံကြည်သောကြောင့် ဘုရားရှင်သည် အာဗြဟံကို ဖြောင့်မတ်သူအဖြစ် သတ်မှတ်တော်မူ၏” ဟု ဖော်ပြထားလေသည်။ ဘုရားရှင်သည်လည်း အာဗြဟံအား “ငါ့မိတ်ဆွေ”ဟု ခေါ်တော်မူလေသည်။ 24လူသည် ယုံကြည်ခြင်းအားဖြင့်သာမဟုတ်ဘဲ လုပ်ဆောင်ခြင်းအားဖြင့်သာ ဖြောင့်မတ်သည်ဟု သတ်မှတ်တော်မူသည်ကို သင်တို့သိမြင်ရပါလိမ့်မည်။ 25ထိုနည်းတူပင် ပြည့်တန်ဆာရာခပ်သည် သူလျိူများကို လက်ခံ၍ တစ်ခြားလမ်းမှ လွှတ်လိုက်သောအခါ ထိုလုပ်ဆောင်မှုကြောင့် ဖြောင့်မတ်သည်ဟု သတ်မှတ်ခံရသည်မဟုတ်လော။ 26ဝိညာဉ်နှင့်ကင်းကွာသောခန္ဓာကိုယ်သည် အသေဖြစ်သကဲ့သို့ လုပ်ဆောင်ခြင်းမရှိသော ယုံကြည်ခြင်းသည်လည်း အသေဖြစ်သည်။
Currently Selected:
James 2: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
