Hebrews 11
11
1ယုံကြည်ခြင်းဆိုသည်မှာ မျှော်လင့်သည့်အရာများကို ရမည်ဟု စိတ်ချခြင်း၊ မမြင်ရသောအရာများကို အမှန်တကယ်ရှိသည်ဟု သေချာခြင်းပင်ဖြစ်သည်။ 2ဤယုံကြည်ခြင်းကြောင့် ရှေးလူကြီးတို့သည် ဘုရားရှင်၏ချီးမွမ်းတော်မူခြင်းကို ခံရကြသည်။ 3မမြင်နိုင်သောအရာထဲမှ မြင်ရသောအရာဖြစ်ပေါ်လာစေရန် ဘုရားရှင်သည်အမိန့်တော်အားဖြင့် စကြဝဠာကိုဖန်ဆင်းတော်မူကြောင်းကို ငါ့တို့သိကြရသည်မှာ ယုံကြည်ခြင်းကြောင့်ဖြစ်သည်။ 4အာဗေလသည် ကာဣနထက် ပို၍မြတ်သည့် ပူဇော်သကာကို ဘုရားရှင်အား ပူဇော်သည်မှာ ယုံကြည်ခြင်းကြောင့်ဖြစ်သည်။ သူ၏ယုံကြည်ခြင်းကိုထောက်၍ ဘုရားရှင်သည် သူ့အား ဖြောင့်မတ်သူအဖြစ် အသိအမှတ်ပြုတော်မူသည်။ အဘယ့်ကြောင့်ဆိုသော် သူ၏ပူဇော်သကာများကို နှစ်သက်တော်မူသောကြောင့်ဖြစ်သည်။ အာဗေလသည် သေလွန်သော်လည်း သူ၏ယုံကြည်ခြင်းအားဖြင့် ယခုတိုင်အောင် ဟောပြောနေသေးသည်။ 5ဧနောက်သည် သေခြင်းနှင့်မကြုံတွေ့ရဘဲ ဘဝပြောင်းခြင်းခံရသည်မှာ သူ၏ယုံကြည်ခြင်းကြောင့်ဖြစ်သည်။ ဘုရားရှင်သည် သူ့အား ဘဝပြောင်းစေတော်မူသဖြင့် မည်သူမျှ သူ့အား ရှာ၍ မတွေ့နိုင်ကြတော့ချေ။ သူသည် ဘဝပြောင်းမခံရမီအခါက ဧနောက်သည် ဘုရားရှင်၏ စိတ်တော်နှင့်တွေ့သူဖြစ်သည်ဟူ၍ အသိအမှတ်ပြုခံထားရသူဖြစ်သည်။ 6ယုံကြည်ခြင်းမရှိသူသည် ဘုရားရှင်၏စိတ်တော်နှင့်မတွေ့နိုင်။ အဘယ့်ကြောင့်ဆိုသော် ဘုရားရှင်ထံတော်သို့ ချဉ်းကပ်သူသည် ဘုရားရှင်ရှိတော်မူကြောင်းကိုလည်းကောင်း၊ ကိုယ်တော်သည် မိမိကိုရှာသောသူအား ဆုလာဘ်ပေးတော်မူကြောင်းကိုလည်းကောင်း ယုံကြည်ရမည်ဖြစ်သောကြောင့်ပင်ဖြစ်သည်။ 7မမြင်ရသေးသောအမှုအရာများနှင့်ပတ်သက်၍ ဘုရားရှင်သတိပေးတော်မူသောအခါ နောဧသည် ယုံကြည်သဖြင့် ကြောက်ရွံ့ရိုသေကာ မိမိ၏မိသားစုကို ကယ်ဆယ်ရန် သင်္ဘောကိုတည်ဆောက်ခဲ့သည်။ နောဧသည် ထိုယုံကြည်ခြင်းအားဖြင့် လောက၏အပြစ်အား စီရင်၍ ယုံကြည်ခြင်းအားဖြင့် ဘုရားရှင်ထံမှဖြောင့်မတ်ခြင်းကို အမွေဆက်ခံခဲ့သည်။ 8အာဗြဟံသည် အမွေအဖြစ်ဆက်ခံရမည့်အရပ်သို့ ထွက်သွားရန် ဘုရားရှင်ခေါ်တော်မူသောအခါ သူသည် မည်သည့်အရပ်သို့ သွားရမည်ကိုပင်မသိဘဲ ယုံကြည်ခြင်းအားဖြင့်နာခံ၍ ထွက်သွားလေသည်။ 9ဘုရားရှင်ကတိထားတော်မူသော ပြည်၌ ယုံကြည်ခြင်းအားဖြင့် သူသည် တိုင်းတပါးသားအဖြစ် နေထိုင်ခဲ့သည်။ သူသည် မိမိနည်းတူ ကတိတော်ကိုအမွေဆက်ခံရသူများဖြစ်သော ဣဇက်၊ယာကုပ်တို့နှင့်အတူ တဲများတွင် နေထိုင်လေသည်။ 10အကြောင်းမူကား အာဗြဟံသည် ဘုရားရှင်စီမံတည်ဆောက်တော်မူသော ခိုင်ခန့်သည့် အုတ်မြစ်ရှိသောမြို့ကို မျှော်လင့်နေသောကြောင့်ပင်ဖြစ်သည်။ 11မြုံသောစာရာသည်လည်း သားသမီးမွေးဖွားနိုင်သောအရွယ်လွန်သော်လည်း ယုံကြည်ခြင်းအားဖြင့် ကိုယ်ဝန်ဆောင်နိုင်ခွင့်ကို ရရှိခဲ့သည်။ အဘယ်ကြောင့်ဆိုသော် ကတိတော်ထားတော်မူသည့်အရှင်သည် သစ္စာရှိတော်မူသည်ဟု မှတ်ယူသောကြောင့်ဖြစ်သည်။ 12အာဗြဟံသည် သေသူနှင့်မထူးခြားသော်လည်း သူ့ထံမှပေါက်ဖွားလာသော မျိုးဆက်များမှာ ကောင်းကင်ကြယ်များကဲ့သို့လည်းကောင်း၊ မရေမတွက်နိုင်သော ပင်လယ်ကမ်းခြေရှိ သဲပွင့်များကဲ့သို့ များပြားလှသည်။ 13ထိုသူအပေါင်းတို့သည် ယုံကြည်လျက် သေလွန်ကြကုန်သည်။ သူတို့သည် ဘုရားရှင်ကတိထားတော်မူသော အရာများကို မရရှိခဲ့ကြရသော်လည်း အဝေးမှမြင်၍ ကြိုဆိုကြခဲ့ကြသည်။ သူတို့သည် ကမ္ဘာမြေကြီးပေါ်တွင် ခေတ္တတည်းခိုသူများနှင့် သူစိမ်းဧည့်သည်များသာဖြစ်ကြောင်းကို ပွင့်လင်းစွာဝန်ခံကြပေသည်။ 14ထိုသို့ဝန်ခံသူတို့သည် မိမိတို့ကိုယ်ပိုင်ပြည်တစ်ခုကို ရှာဖွေနေကြကြောင်း ထင်ရှားစေကြသည်။ 15သူတို့သည် မိမိတို့ထွက်ခွာလာခဲ့သည့်ပြည်ကို သတိရကြသည်မှာမှန်လျှင် ထိုပြည်ကို ပြန်နိုင်ရန် အခွင့်ကိုရရှိကြပေသည်။ 16သို့ရာတွင် သူတို့သည် ထိုပြည်ထက်သာလွန်ကောင်းမြတ်သည့် ရွှေမြို့တော်ကို တမ်းတကြသည်ဖြစ်၍ ဘုရားရှင်သည် သူတို့၏ဘုရားဟူ၍ ခေါ်ဝေါ်ခြင်းခံရသည်ကို ရှက်တော်မမူသည့်အပြင် သူတို့နေထိုင်ရန်မြို့ကိုပင် ပြင်ဆင်တော်မူပြီးဖြစ်သည်။ 17အာဗြဟံသည် ဘုရားရှင်၏စမ်းသပ်စစ်ဆေးခြင်းကိုခံရသောအခါ ယုံကြည်ခြင်းအားဖြင့် တစ်ဦးတည်းသားဣဇက်ကို ပူဇော်ရန် ပြင်ဆင်လေသည်။ 18ထိုသားနှင့်ပတ်သက်၍ “သင်၏အမျိုးအနွယ်ကို ဣဇက်မှ ဆင်းသက်ပေါက်ပွားစေမည်” ဟု ဘုရားရှင်သည် မိန့်တော်မူခဲ့လေသည်။ 19ဘုရားရှင်သည် သေသူများကိုပင် ပြန်ရှင်စေနိုင်ကြောင်းကို အာဗြဟံသည် ဆင်ခြင်သုံးသပ်ခဲ့သည်။ ပုံဥပမာအဖြစ်ဆိုရလျှင် သူသည် ဣဇက်ကို သေခြင်းမှ ပြန်လည်ရရှိခဲ့လေသည်။ 20ဣဇက်သည် ယုံကြည်ခြင်းအားဖြင့် အနာဂတ်ကာလကို ရည်မှန်း၍ ယာကုပ်နှင့်ဧသောအား ကောင်းချီးပေးခဲ့သည်။ 21ယာကုပ်သည် သေချိန်နီးသောအခါ ယုံကြည်ခြင်းအားဖြင့် ယောသပ်၏သားနှစ်ယောက်ကို ကောင်းချီးပေးလေသည်။ သူသည် မိမိ၏တောင်ဝှေးထိပ်ကိုမှီ၍ ဘုရားရှင်အား ရှိခိုးလေသည်။ 22ယောသပ်သည် သေချိန်နီးသောအခါ ယုံကြည်ခြင်းအားဖြင့် အီဂျစ်ပြည်မှ အစ္စရေးလူမျိုးတို့ လွတ်မြောက်လာမည့်အကြောင်းအား ပြောကြားကာ မိမိ၏အရိုများနှင့်ပတ်သတ်၍ မှာကြားလေသည်။ 23မောရှေသည် ချစ်စရာကောင်းသောသူငယ်ဖြစ်သဖြင့် မောရှေအားဖွားမြင်ပြီးနောက် သူ၏မိဘတို့သည် ယုံကြည်ခြင်းအားဖြင့် ရှင်ဘုရင်၏အမိန့်ကိုမကြောက်ဘဲ သူ့အား သုံးလတိုင်တိုင် ဝှက်ထားကြသည်။ 24မောရှေသည် ကြီးပြင်းလာသောအခါ ယုံကြည်ခြင်းအားဖြင့် မိမိကိုယ်ကို ဖာရောဘုရင့်သမီးတော်၏သားဟူ၍ အခေါ်မခံဘဲနေသည်။ 25သူသည် အပြစ်၌ ခဏတာသာယာပျော်မွေ့ရသည်ထက် ဘုရားရှင်၏လူမျိုးတို့နှင့်အတူ ဆင်းရဲဒုက္ခခံရသည်ကို ရွှေးချယ်ခဲ့သည်။ 26ခရစ်တော်အတွက်ခံရသောကဲ့ရဲ့ခြင်းသည် အီဂျစ်ပြည်၏ စည်းစိမ်ချမ်းသာရှိသမျှတို့ထက် ပို၍မြတ်သည်ဟု မှတ်ယူလေသည်။ အဘယ်ကြောင့်ဆိုသော် သူသည် အနာဂတ်ကာလတွင် ရရှိမည့်ဆုလာဘ်ကို မျှော်မှန်းလျက်နေသောကြောင့်ဖြစ်သည်။ 27မောရှေသည် ယုံကြည်ခြင်းအားဖြင့် ရှင်ဘုရင်၏အမျက်တော်သင့်မည်ကို မကြောက်ဘဲ အီဂျစ်ပြည်မှ ထွက်ခွာခဲ့သည်။ သူသည် မတွေ့မမြင်နိုင်သော ဘုရားရှင်အား တွေ့မြင်ရသကဲ့သို့ နောက်မဆုတ်ဘဲနေသည်။ 28သားဦးများကိုဖျက်စီးသောသူသည် အစ္စရေးလူမျိုးတို့၏သားဦးများကို မထိခိုက်စေရန် သူသည် ယုံကြည်ခြင်းအားဖြင့် ပသခါပွဲတော်ကိုကျင်းပ၍ သွေးဖြင့်ပက်ဖျန်းလေသည်။ 29အစ္စရေးလူမျိုးတို့သည် ယုံကြည်ခြင်းအားဖြင့် ကုန်းမြေပေါ်တွင် ဖြတ်သွားသကဲ့သို့ ပင်လယ်နီကို ဖြတ်ကျော်ကြသည်။ အီဂျစ်လူမျိုးတို့သည် ထိုသို့ဖြတ်ကျော်ရန် ကြိုးစားကြသောအခါတွင် ရေနစ်၍သေဆုံးကြကုန်သည်။ 30အစ္စရေးလူမျိုးတို့သည် ယုံကြည်ခြင်းအားဖြင့် ခုနှစ်ရက်တိုင်တိုင် ဂျေရိခေါမြို့ကို လှည့်ပတ်ချီတက်ကြပြီး နောက် မြို့ရိုးသည် ပြိုကျလေသည်။ 31ပြည့်တန်ဆာရာခပ်သည် ယုံကြည်ခြင်းအားဖြင့် အစ္စရေးသူလျှိုတို့အား ဖော်ရွှေစွာကြိုဆိုခဲ့သည့်အတွက် မယုံကြည်သူတို့နှင့်အတူ အသက်မဆုံးရှုံးခဲ့ရပေ။ 32ထို့ပြင် မည်သည့်အကြောင်းကို ထပ်၍ပြောရဦးမည်နည်း။ ဂိဒေါင်၊ ဗာရက်၊ ရှံဆုန်၊ ယေဖသ၊ ဒါဝိဒ်၊ ရှမွေလနှင့် ပရောဖက်များအကြောင်းကို ဖော်ပြရန် ကျွန်ုပ်တွင် အချိန်ရှိမည်မဟုတ်ပါ။ 33ထို့သူတို့သည် ယုံကြည်ခြင်းအားဖြင့် တိုင်းနိုင်ငံများကို အောင်နိုင်ခဲ့ကြခြင်း၊ တရားမျှတစွာ အုပ်ချုပ်ခြင်း၊ ခြင်္သေ့များ၏ နှုတ်ကိုပိတ်ခြင်း၊ 34ပြင်းထန်စွာတောက်လောင်နေသော မီးကိုငြိမ်းသတ်ခြင်း၊ ဓားဘေးမှလွတ်မြောက်ခဲ့ကြခြင်း၊ ခွန်အားနည်းသူဖြစ်သော်လည်း ခွန်အားကြီးလာကြခြင်း၊ စစ်ရေး၌စွမ်းရည်ရှိလျက် တိုင်းတစ်ပါးသားတို့၏တပ်များကို ဖြိုခွင်းကြခြင်း စသည်တို့ကို ပြုခဲ့ကြသည်။ 35အမျိုးသမီးတို့သည်လည်း ယုံကြည်ခြင်းအားဖြင့် သေရာမှအသက်ပြန်ရှင်လာသော မိမိတို့၏ဆွေမျိုးများတို့ကို ပြန်လည်၍ရရှိကြသည်။ အချို့သောသူတို့သည် လွတ်မြောက်ခွင့်ကိုလက်မခံဘဲ ပို၍မွန်မြတ်သည့်ဘဝသို့ ထမြောက်လိုသဖြင့် လွတ်မြောက်ခွင့်ကိုလက်မခံကြဘဲ နှိပ်စက်ညှဉ်းဆဲခြင်းကိုခံကြရသည်။ 36အချို့သောသူတို့သည် ကဲ့ရဲ့ရိုက်နှက်ခြင်းကိုခံကြရပြီး အချို့သူတို့သည်ကား သံကြိုးဖြင့်ချည်နှောင်ကာ အကျဉ်းချခြင်းကိုခံရကြသည်။ 37သူတို့သည် ခဲနှင့်ပေါက်သတ်ခြင်း၊ လွှနှင့်နှစ်ပိုင်းဖြတ်ခြင်း၊ ဓားနှင့်ခုတ်သတ်ခြင်းတို့ကိုခံကြရသည်။ သူတို့သည် ဆင်းရဲနွမ်းပါးလျက် အနှိပ်အစက်ကိုခံ၍ မတရားအနိုင် အထက်ပြုခြင်းကိုခံရကာ၊ သို့းသားရေ၊ ဆိတ်သားရေတို့ကိုဝတ်၍ သွားလာကြရသည်။ 38ဤလောကသည် ထိုသူတို့နှင့်မထိုက်တန်ပါ။ သူတို့သည် တောကန္တာရ၊ တောင်တန်းများ၊ လိုဏ်ဂူများနှင့်မြေတွင်းများတွင် လှည့်လည်သွာလားရကြသည်။ 39ဤသူအပေါင်းတို့သည် မိမိတို့၏ယုံကြည်ခြင်းကြောင့် ဂုဏ်ပြုချီးမွမ်းခြင်းကို ခံကြရသော်လည်း သူတို့သည် ဘုရားရှင်ကတိထားတော်မူသော အရာကို မရရှိခဲ့ကြပေ။ 40အဘယ်ကြောင့်ဆိုသော် ဘုရားရှင်သည် ကျွန်ုပ်တို့အတွက် ပိုမိုကောင်းမြတ်သည့်အရာကို ကြံစည်ထားသောကြောင့်ဖြစ်သည်။ ထိုအကြံအစည်တော်မှာ ထိုသူတို့သည် ကျွန်ုပ်တို့ပါရှိမှသာလျှင် ပြည့်ဝစုံလင်သူများဖြစ်ကြလိမ့်မည်ဖြစ်သည်။
Currently Selected:
Hebrews 11: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
