Hebrews 10
10
1ပညတ်တရားသည် စစ်မှန်သည့် အရာများ၏ တိကျမှန်ကန်သော ပုံတူ မဟုတ်ဘဲ ဖြစ်ပေါ်လာမည့် ကောင်းသောအရာများ၏အရိပ်မျှသာဖြစ်သည်။ ပညတ်တရားအရ နှစ်စဉ်နှစ်တိုင်း ပူဇော်သကာကို ပူဇော်ကြရသည်။ သို့ဖြစ်၍ ပညတ်တရားများသည် ဘုရားရှင်ထံတော်သို့ ချဉ်းကပ်သူတို့အား ပြည့်ဝမစုံလင်စေနိုင်ပေ။ 2အကယ်၍သာ ထိုကဲ့သို့ဖြစ်လာနိုင်မည်ဆိုပါက ကိုးကွယ်ဝတ်ပြုသူတို့သည် တစ်ခါတည်း စင်ကြယ်၍သွားကြမည်ဖြစ်ရာ မိမိတို့တွင် အပြစ်ရှိနေသေးသည်ဟူ၍ မထင်မှတ်ကြတော့ဘဲ ပူဇော်သကာများကို ပူဇော်ကြတော့မည် မဟုတ်တော့ပေ။ 3သို့သော် ထိုကဲ့သို့ပူဇော်ခြင်းသည် လူတို့အား နှစ်စဉ်နှစ်တိုင်း သူတို့၏အပြစ်များကို အမှတ်ရစေသည်။ 4အဘယ်ကြောင့်ဆိုသော် နွားထီးနှင့်ဆိတ်တို့၏သွေးသည် အပြစ်ကို မဖယ်ရှားနိုင်သောကြောင့်ဖြစ်သည်။ 5ထို့ကြောင့် ခရစ်တော်သည် ဤလောကသို့ ကြွလာတော်မူသောအခါ၌ ဘုရားရှင်အား "ကိုယ်တော်သည်ပူဇော်သကာများကို အလိုရှိတော်မမူပါ။ သို့ရာတွင် ကျွန်ုပ်အတွက် ကိုယ်ခန္ဓာကိုပြင်ဆင်ထားတော်မူပါပြီ။ 6ကိုယ်တော်သည် မီးရှို့ပူဇော်ရသည့် ပူဇော်သကာများနှင့် အပြစ်ဖြေရာပူဇော်သကာတို့ကို နှစ်သက်တော်မမူပါ။ 7သို့ဖြစ်၍ ပညတ်ကျမ်းတွင် ကျွန်ုပ်အကြောင်းအား ရေးသားဖော်ပြထားသည်နှင့်အညီ ‘အို ဘုရားရှင်၊ ကျွန်ုပ်သည် ကိုယ်တော်၏အလိုတော်ကို ဆောင်ရွက်ရန် ရောက်လာပါပြီ’ ဟု ကျွန်ုပ်ဝန်ခံပါ၏” ဟု လျှောက်ထားတော်မူလေသည်။ 8ကိုယ်တော်သည် မီးရှို့ပူဇော်ရသည့် ပူဇော်သကာများနှင့် အပြစ်ဖြေရာပူဇော်သကာအစရှိသော ပူဇော်သကာများအား ပညတ်တရားအတိုင်း ပူဇော်ရသော်လည်း ထိုအရာများကို ဘုရားရှင်အလိုရှိတော်မမူကြောင်း၊ အားရနှစ်သက်တော်မမူကြောင်းကို ဦးစွာပထမဖော်ပြတော်မူသည်။ 9ထို့နောက် “အို ဘုရားရှင်၊ ကျွန်ုပ်သည် ကိုယ်တော်၏အလိုတော်ကို ဆောင်ရွက်ရန်ရောက်ရှိလာပါပြီ” ဟု လျှောက်ထားသည်။ ထို့ကြောင့် ကိုယ်တော်သည် ဒုတိယပူဇော်ခြင်းကိုတည်စေရန် ပထမပူဇော်ခြင်းကို ပယ်ဖျက်တော်မူလေသည်။ 10ကိုယ်တော်ယေရှုခရစ်တော်သည် ဘုရားရှင်၏ အလိုတော်ကိုလိုက်၍ မိမိကိုယ်ခန္ဓာကို တစ်ခါတည်းအပြီးအပိုင်ပူဇော်တော်မူသဖြင့် ကျွန်ုပ်တို့သည် စင်ကြယ်မှုကို ရရှိကြသည်။ 11ပုရောဟိတ်တိုင်းသည် နေ့စဉ်နေ့တိုင်း ရပ်၍ မိမိ၏ဝတ္တရားကိုဆောင်ရွက်ကာ မည်သည့်အခါမျှ အပြစ်ဖြေနိုင်စွမ်းမရှိသည့် ပူဇော်သကာကို အကြိမ်ကြိမ်ပူဇော်ရသည်။ 12သို့သော် ခရစ်တော်မူကား အပြစ်များကိုဖြေရန် ထာဝရအတွက် ပူဇော်သကာတစ်ခုတည်းကို ပူဇော်တော်မူသည်။ ထို့နောက် ဘုရားရှင်၏လက်ယာတော်ဘက်တွင် ထိုင်တော်မူပြီးလျှင်၊ 13ဘုရားရှင်သည် မိမိ၏ခြေဖဝါးအောက်သို့ ရန်သူများရောက်ရှိလာစေတော်မူသည့်တိုင်အောင် စောင့်ဆိုင်းလျက်နေတော်မူလေသည်။ 14အကြောင်းမူကား ကိုယ်တော်သည် မိမိကိုယ်ကို တစ်ကြိမ်တည်းသော ပူဇော်ခြင်းအားဖြင့် အပြစ်မှသန့်စင်လာသူတို့အား ထာဝရပြီးပြည့်စုံစေတော်မူသည်။ 15ဉာဏ်အလင်းတော်ကလည်း ကျွန်ုပ်တို့အား သက်သေခံသည်မှာ 16“ဘုရားရှင်က ‘နောင်အခါ သူတို့နှင့်ငါသည် ပဋိညာဉ်ဖွဲ့မည်။ ငါသည် သူတို့၏စိတ်နှလုံးထဲသို့ ငါ၏ပညတ်တရားကို ထည့်သွင်းမည်။ သူတို့၏နှလုံးသားပေါ်တွင် ရေးသားထားမည်’ ဟု မိန့်တော်မူသည်” ဟူ၍ ဖြစ်သည်။ 17ထို့နောက် “သူတို့၏အပြစ်ဒုစရိုက်များနှင့် ဆိုးသွမ်းမူများကို ငါသတိရတော့မည်မဟုတ်” ဟု မိန့်တော်မူပေသည်။ 18ထိုသို့ အပြစ်များအား ခွင့်လွှတ်တော်မူပြီးသောအခါ အပြစ်ဖြေခြင်းအတွက် ပူဇော်သကာများကို ပူဇော်ရန် လိုအပ်တော့မည်မဟုတ်ပေ။ 19သို့ဖြစ်၍ ငါ၏ညီအစ်ကိုမောင်နှမတို့ ကျွန်ုပ်တို့သည် ကိုယ်တော်ယေရှု၏ အသွေးတော်အားဖြင့် အလွန်သန့်ရှင်းရာဌာနတော်ထဲသို့ ယုံကြည်စိတ်ချစွာဖြင့် ဝင်ခွင့်ရကြသည်။ 20ကိုယ်တော်သည် မိမိ၏ကိုယ်ခန္ဓာတည်းဟူသော ကန့်လန့်ကာမှတစ်ဆင့် ကျွန်ုပ်တို့အတွက် အသက်ရှင်သည့်လမ်းအသစ်ကို ဖွင့်ပေးတော်မူသည်။ 21ထိုပြင် ကျွန်ုပ်တို့တွင် ဘုရားရှင်၏အိမ်တော်ကို အုပ်စိုးသည့် အကြီးဆုံးပုရောဟိတ်ကြီးရှိသည်။ 22သို့ဖြစ်၍ ကျွန်ုပ်တို့သည် မိမိတို့၏စိတ်ကို ဆိုးညစ်သောအသိစိတ်မှ ရှင်းလင်းစေရန် ကိုယ်တော်၏အသွေးတော်ဖြင့် ပတ်ဖျန်းခြင်း၊ ကျွန်ုပ်တို့၏ကိုယ်ခန္ဓာကိုလည်း ရေစင်ဖြင့်ဆေးကြော၍ ရိုးသားသောစိတ်၊ ခိုင်မာသောယုံကြည်ခြင်းတို့ဖြင့် ဘုရားရှင်ထံတော်သို့ ချဉ်းကပ်ကြပါစို့။ 23ကတိတော်ပေးတော်မူသောအရှင်သည် သစ္စာနှင့်ပြည့်စုံတော်မူသောကြောင့် ကျွန်ုပ်တို့သည် မိမိတို့ဝန်ခံသောမျှော်လင့်ခြင်းကို စွဲမြဲစွာဆုပ်ကိုင်ထားကြပါစို့။ 24ထို့ပြင် ကျွန်ုပ်တို့သည် မေတ္တာထားရန်နှင့် ကောင်းသောအမှုအရာများကိုပြုရန် အချင်းချင်းမည်သို့ တိုက်တွန်းနှိုးဆော်ရမည်ကို ဆင်ခြင်ကြပါစို့။ 25အချင်းချင်းတွေဆုံဝတ်ပြုသည့်အလေ့အထကို လူအချို့လွှဲရှောင်သကဲ့သို့ ကျွန်ုပ်တို့သည် မလွှဲရှောင်ဘဲ အချင်းချင်းအားပေး တိုက်တွန်းကြလော့။ ကိုယ်တော်ပြန်လည်ကြွရောက်လာမည့်နေ့ရက် နီးကပ်လာသည်ကိုထောက်၍ ကျွန်ုပ်တို့သည် ပို၍တစ်ယောက်ကိုတစ်ယောက် အားပေးတိုက်တွန်းကြကုန်လော့။ 26ကျွန်ုပ်တို့သည် သမ္မာတရားကို သိရှိကြပြီးမှ တမင်တကာ ဆက်လက်အပြစ်ကျူးလွန်နေကြမည်ဆိုပါလျှင် ကျွန်ုပ်တို့၏အပြစ်များအတွက် အပြစ်ဖြေရာပူဇော်သကာရှိတော့မည်မဟုတ်ပေ။ 27ကျွန်ုပ်တို့သည် တရားစီရင်တော်မူခြင်းကိုလည်းကောင်း၊ ဘုရားရှင်အား ဆန့်ကျင်သောသူတို့အား လောင်ကျွမ်းစေမည့် အမျက်တော်မီးကိုလည်းကောင်း ကြောက်ရွံ့တုန်လှုပ်လျက် စောင့်မျှော်နေကြရန်သာရှိတော့သည်။ 28မောရှေ၏ပညတ်တရားကို ငြင်းပယ်သောသူမှန်သမျှသည် အသိသက်သေနှစ်ဦး၊ သုံးဦး၏ထွက်ဆိုချက်အရ သက်ညှာခြင်းမရှိဘဲ သေဒဏ်ပေးခြင်းကိုခံကြရသည်။ 29ဘုရားရှင်၏သားတော်ကို ရှုတ်ချ၍ မိမိအားအပြစ်မှစင်ကြယ်စေသည့် ပဋိညာဉ်တရားဆိုင်ရာသွေးတော်ကို မစင်ကြယ်သည့်အရာဟု မှတ်ယူလျက် ကျေးဇူးတော်ကိုပေးသည့်ဝိညာဉ်ကို မထီမဲ့မြင်ပြုသောသူမူကား မည်မျှကြီးလေးသော အပြစ်ဒဏ်ခံထိုက်သည်ဟု သင်တို့ထင်သနည်း။ 30အကြောင်းမူကား “လက်တုံ့ပြန်ခြင်းသည် ငါနှင့်ဆိုင်သည်။ ငါကိုယ်တိုင် တုံ့ပြန်မည်” ဟူ၍ လည်းကောင်း “ထာဝရဘုရားသည် မိမိ၏လူမျိုးတို့အား တရားစီရင်တော်မူမည်” ဟူ၍ လည်းကောင်း မိန့်တော်မူသောအရှင်သည် မည်သူဖြစ်သည်ကို ကျွန်ုပ်တို့သိကြသည်။ 31အသက်ရှင်တော်မူသော ဘုရားရှင်၏လက်တော်သို့ ကျရောက်ရခြင်းသည် ကြောက်မက်ဖွယ်ကောင်းလှသည်။ 32ယခင်နေ့ရက်များကို သတိရကြလော့။ ထိုစဉ်အခါက သင်တို့သည် အလင်းသို့ရောက်ပြီးနောက် ဆင်းရဲဒုက္ခကို ပြင်းထန်စွာခံစားကြရသော်လည်း ခံနိုင်ရည်ရှိခဲ့ကြသည်။ 33သင်တို့သည် တစ်ခါတစ်ရံ လူတို့ရှေ့တွင် ကဲ့ရဲ့ပြစ်တင်ခြင်းနှင့် နှိပ်စက်ခြင်းတို့ကို ခံကြရသည်။ တစ်ခါတစ်ရံတွင် ထိုသို့ဆက်ဆံခြင်းကို ခံရသူများနှင့်အတူ ရပ်တည်ခဲ့ကြသည်။ 34သင်တို့သည် အကျဉ်းခံနေရသူတို့အပေါ် စာနာစိတ်ရှိကြသည်။ မိမိတို့၏ဥစ္စာပစ္စည်းများကို အတင်းအဓမ္မသိမ်းယူသည်ကိုလည်း ဝမ်းမြောက်စွာလက်ခံကြသည်။ အဘယ့်ကြောင့်ဆိုသော် သင်တို့သည် ထိုအရာများထက် ပို၍ကောင်းမြတ်တည်မြဲသည့်အရာရှိကြောင်းကို သိကြသောကြောင့်ပင်ဖြစ်ပေသည်။ 35ထို့ကြောင့် သင်တို့၏ယုံကြည်စိတ်ချမှုကို စွန့်ပစ်ခြင်းမပြုကြနှင့်။ ထိုယုံကြည်ခြင်းသည် ကြီးမြတ်သောဆုလာဘ်ကို ရရှိစေလိမ့်မည်ဖြစ်သည်။ 36ဘုရားရှင်၏အလိုတော်ကို လိုက်လျှောက်နိုင်ရန်နှင့် ကတိတော်ထားသော အရာကိုရရှိနိုင်ရန် သင်တို့သည် သည်းခံစိတ်ရှိရမည်။ 37အကြောင်းမူကား “ကြွလာတော်မူမည့်အရှင်သည် နှောင့်နှေးခြင်းမရှိဘဲ အချိန်အနည်းငယ်အတွင်း၌ ကြွလာတော်မူလိမ့်မည်။ 38ငါ၏ဖြောင့်မတ်သောသူသည် ယုံကြည်ခြင်းအားဖြင့် အသက်ရှင်လိမ့်မည်။ သို့ရာတွင် နောက်ပြန်လှည့်တတ်သူများအား ငါသည် နှစ်သက်လိမ့်မည်မဟုတ်” ဟု ကျမ်းစာတော်တွင်ဖော်ပြပါရှိသည်။ 39သို့သော် ကျွန်ုပ်တို့သည် နောက်ပြန်လှည့်သဖြင့် ပျက်စီးရသူများမဟုတ်ဘဲ ယုံကြည်သဖြင့် ကယ်တင်ခြင်းကိုခံရသူများဖြစ်ကြသည်။
Currently Selected:
Hebrews 10: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
