Popular Bible Verses from Hebrews 11

Share

ယုံကြည်ခြင်းဆိုသည်မှာ မျှော်လင့်သည့်အရာများကို ရမည်ဟု စိတ်ချခြင်း၊ မမြင်ရသောအရာများကို အမှန်တကယ်ရှိသည်ဟု သေချာခြင်းပင်ဖြစ်သည်။ ဤယုံကြည်ခြင်းကြောင့် ရှေးလူကြီးတို့သည် ဘုရားရှင်၏ချီးမွမ်းတော်မူခြင်းကို ခံရကြသည်။

ယုံကြည်ခြင်းမရှိသူသည် ဘုရားရှင်၏စိတ်တော်နှင့်မတွေ့နိုင်။ အဘယ့်ကြောင့်ဆိုသော် ဘုရားရှင်ထံတော်သို့ ချဉ်းကပ်သူသည် ဘုရားရှင်ရှိတော်မူကြောင်းကိုလည်းကောင်း၊ ကိုယ်တော်သည် မိမိကိုရှာသောသူအား ဆုလာဘ်ပေးတော်မူကြောင်းကိုလည်းကောင်း ယုံကြည်ရမည်ဖြစ်သောကြောင့်ပင်ဖြစ်သည်။

မမြင်နိုင်သောအရာထဲမှ မြင်ရသောအရာဖြစ်ပေါ်လာစေရန် ဘုရားရှင်သည်အမိန့်တော်အားဖြင့် စကြဝဠာကိုဖန်ဆင်းတော်မူကြောင်းကို ငါ့တို့သိကြရသည်မှာ ယုံကြည်ခြင်းကြောင့်ဖြစ်သည်။

အာဗြဟံသည် အမွေအဖြစ်ဆက်ခံရမည့်အရပ်သို့ ထွက်သွားရန် ဘုရားရှင်ခေါ်တော်မူသောအခါ သူသည် မည်သည့်အရပ်သို့ သွားရမည်ကိုပင်မသိဘဲ ယုံကြည်ခြင်းအားဖြင့်နာခံ၍ ထွက်သွားလေသည်။ ဘုရားရှင်ကတိထားတော်မူသော ပြည်၌ ယုံကြည်ခြင်းအားဖြင့် သူသည် တိုင်းတပါးသားအဖြစ် နေထိုင်ခဲ့သည်။ သူသည် မိမိနည်းတူ ကတိတော်ကိုအမွေဆက်ခံရသူများဖြစ်သော ဣဇက်၊ယာကုပ်တို့နှင့်အတူ တဲများတွင် နေထိုင်လေသည်။

မမြင်ရသေးသောအမှုအရာများနှင့်ပတ်သက်၍ ဘုရားရှင်သတိပေးတော်မူသောအခါ နောဧသည် ယုံကြည်သဖြင့် ကြောက်ရွံ့ရိုသေကာ မိမိ၏မိသားစုကို ကယ်ဆယ်ရန် သင်္ဘောကိုတည်ဆောက်ခဲ့သည်။ နောဧသည် ထိုယုံကြည်ခြင်းအားဖြင့် လောက၏အပြစ်အား စီရင်၍ ယုံကြည်ခြင်းအားဖြင့် ဘုရားရှင်ထံမှဖြောင့်မတ်ခြင်းကို အမွေဆက်ခံခဲ့သည်။

ဧနောက်သည် သေခြင်းနှင့်မကြုံတွေ့ရဘဲ ဘဝပြောင်းခြင်းခံရသည်မှာ သူ၏ယုံကြည်ခြင်းကြောင့်ဖြစ်သည်။ ဘုရားရှင်သည် သူ့အား ဘဝပြောင်းစေတော်မူသဖြင့် မည်သူမျှ သူ့အား ရှာ၍ မတွေ့နိုင်ကြတော့ချေ။ သူသည် ဘဝပြောင်းမခံရမီအခါက ဧနောက်သည် ဘုရားရှင်၏ စိတ်တော်နှင့်တွေ့သူဖြစ်သည်ဟူ၍ အသိအမှတ်ပြုခံထားရသူဖြစ်သည်။

အာဗေလသည် ကာဣနထက် ပို၍မြတ်သည့် ပူဇော်သကာကို ဘုရားရှင်အား ပူဇော်သည်မှာ ယုံကြည်ခြင်းကြောင့်ဖြစ်သည်။ သူ၏ယုံကြည်ခြင်းကိုထောက်၍ ဘုရားရှင်သည် သူ့အား ဖြောင့်မတ်သူအဖြစ် အသိအမှတ်ပြုတော်မူသည်။ အဘယ့်ကြောင့်ဆိုသော် သူ၏ပူဇော်သကာများကို နှစ်သက်တော်မူသောကြောင့်ဖြစ်သည်။ အာဗေလသည် သေလွန်သော်လည်း သူ၏ယုံကြည်ခြင်းအားဖြင့် ယခုတိုင်အောင် ဟောပြောနေသေးသည်။

မြုံသောစာရာသည်လည်း သားသမီးမွေးဖွားနိုင်သောအရွယ်လွန်သော်လည်း ယုံကြည်ခြင်းအားဖြင့် ကိုယ်ဝန်ဆောင်နိုင်ခွင့်ကို ရရှိခဲ့သည်။ အဘယ်ကြောင့်ဆိုသော် ကတိတော်ထားတော်မူသည့်အရှင်သည် သစ္စာရှိတော်မူသည်ဟု မှတ်ယူသောကြောင့်ဖြစ်သည်။

အကြောင်းမူကား အာဗြဟံသည် ဘုရားရှင်စီမံတည်ဆောက်တော်မူသော ခိုင်ခန့်သည့် အုတ်မြစ်ရှိသောမြို့ကို မျှော်လင့်နေသောကြောင့်ပင်ဖြစ်သည်။

မောရှေသည် ကြီးပြင်းလာသောအခါ ယုံကြည်ခြင်းအားဖြင့် မိမိကိုယ်ကို ဖာရောဘုရင့်သမီးတော်၏သားဟူ၍ အခေါ်မခံဘဲနေသည်။ သူသည် အပြစ်၌ ခဏတာသာယာပျော်မွေ့ရသည်ထက် ဘုရားရှင်၏လူမျိုးတို့နှင့်အတူ ဆင်းရဲဒုက္ခခံရသည်ကို ရွှေးချယ်ခဲ့သည်။ ခရစ်တော်အတွက်ခံရသောကဲ့ရဲ့ခြင်းသည် အီဂျစ်ပြည်၏ စည်းစိမ်ချမ်းသာရှိသမျှတို့ထက် ပို၍မြတ်သည်ဟု မှတ်ယူလေသည်။ အဘယ်ကြောင့်ဆိုသော် သူသည် အနာဂတ်ကာလတွင် ရရှိမည့်ဆုလာဘ်ကို မျှော်မှန်းလျက်နေသောကြောင့်ဖြစ်သည်။ မောရှေသည် ယုံကြည်ခြင်းအားဖြင့် ရှင်ဘုရင်၏အမျက်တော်သင့်မည်ကို မကြောက်ဘဲ အီဂျစ်ပြည်မှ ထွက်ခွာခဲ့သည်။ သူသည် မတွေ့မမြင်နိုင်သော ဘုရားရှင်အား တွေ့မြင်ရသကဲ့သို့ နောက်မဆုတ်ဘဲနေသည်။

အာဗြဟံသည် ဘုရားရှင်၏စမ်းသပ်စစ်ဆေးခြင်းကိုခံရသောအခါ ယုံကြည်ခြင်းအားဖြင့် တစ်ဦးတည်းသားဣဇက်ကို ပူဇော်ရန် ပြင်ဆင်လေသည်။

ပြည့်တန်ဆာရာခပ်သည် ယုံကြည်ခြင်းအားဖြင့် အစ္စရေးသူလျှိုတို့အား ဖော်ရွှေစွာကြိုဆိုခဲ့သည့်အတွက် မယုံကြည်သူတို့နှင့်အတူ အသက်မဆုံးရှုံးခဲ့ရပေ။

အစ္စရေးလူမျိုးတို့သည် ယုံကြည်ခြင်းအားဖြင့် ကုန်းမြေပေါ်တွင် ဖြတ်သွားသကဲ့သို့ ပင်လယ်နီကို ဖြတ်ကျော်ကြသည်။ အီဂျစ်လူမျိုးတို့သည် ထိုသို့ဖြတ်ကျော်ရန် ကြိုးစားကြသောအခါတွင် ရေနစ်၍သေဆုံးကြကုန်သည်။

အစ္စရေးလူမျိုးတို့သည် ယုံကြည်ခြင်းအားဖြင့် ခုနှစ်ရက်တိုင်တိုင် ဂျေရိခေါမြို့ကို လှည့်ပတ်ချီတက်ကြပြီး နောက် မြို့ရိုးသည် ပြိုကျလေသည်။

သားဦးများကိုဖျက်စီးသောသူသည် အစ္စရေးလူမျိုးတို့၏သားဦးများကို မထိခိုက်စေရန် သူသည် ယုံကြည်ခြင်းအားဖြင့် ပသခါပွဲတော်ကိုကျင်းပ၍ သွေးဖြင့်ပက်ဖျန်းလေသည်။

ယောသပ်သည် သေချိန်နီးသောအခါ ယုံကြည်ခြင်းအားဖြင့် အီဂျစ်ပြည်မှ အစ္စရေးလူမျိုးတို့ လွတ်မြောက်လာမည့်အကြောင်းအား ပြောကြားကာ မိမိ၏အရိုများနှင့်ပတ်သတ်၍ မှာကြားလေသည်။

ယာကုပ်သည် သေချိန်နီးသောအခါ ယုံကြည်ခြင်းအားဖြင့် ယောသပ်၏သားနှစ်ယောက်ကို ကောင်းချီးပေးလေသည်။ သူသည် မိမိ၏တောင်ဝှေးထိပ်ကိုမှီ၍ ဘုရားရှင်အား ရှိခိုးလေသည်။

ဣဇက်သည် ယုံကြည်ခြင်းအားဖြင့် အနာဂတ်ကာလကို ရည်မှန်း၍ ယာကုပ်နှင့်ဧသောအား ကောင်းချီးပေးခဲ့သည်။