Hebrews 12
12
1ထို့ကြောင့် ဤမျှများစွာသောသက်သေတို့သည် ကျွန်ုပ်တို့အားဝိုင်းရံလျက်ရှိသည်ဖြစ်၍ ကျွန်ုပ်တို့သည် အနှောင့်အယှက်ဖြစ်သောဝန်ရှိသမျှကိုလည်းကောင်း၊ မိမိတို့အားတွယ်ကပ်လျက်နေသော အပြစ်ဟူသမျှကိုလည်းကောင်း ဖယ်ရှားပြီးလျှင် ကျွန်ုပ်တို့ရှေ့၌ရှိသော ပန်းတိုင်သို့ရောက်ရန် ဇွဲလုံ့လဖြင့် ပြေးကြကုန်စို့။ 2ကျွန်ုပ်တို့၏ယုံကြည်ခြင်းကို အစပြုဖြစ်တည်စေတော်မူသော ကိုယ်တော်ယေရှုကို မျက်မှောက်ပြုကြကုန်စို့။ ကိုယ်တော်သည် မိမိရှေ့၌ရှိသော ဝမ်းမြောက်ခြင်းအတွက်ကြောင့် လက်ဝါးကပ်တိုင်တော်ကို ရှက်ကြောက်ဖွယ်အရာဟူ၍ မှတ်တော်မမူဘဲ အသေခံတော်မူပြီးလျှင် ဘုရားရှင်၏ပလ္လင်တော် လက်ယာဘက်တွင် ထိုင်နေတော်မူလေသည်။ 3အပြစ်သားတို့၏ ဆန့်ကျင်မှုကို ခံတော်မူသော ကိုယ်တော်၏အကြောင်းကို သင်တို့ဆင်ခြင်ကြလော့။ ထို့ကြောင့် သင်တို့သည် စိတ်ပျက်အားလျော့ခြင်းမရှိကြနှင့်။ 4သင်တို့သည် အပြစ်ဒုစရိုက်အား တိုက်ခိုက်တွန်းလှန်ကြရာတွင် ယခုအချိန်ထိ သွေးမြေကျသည်အထိ ရင်ဆိုင်မခုခံကြရသေးပေ။ 5ကျမ်းစာတော်တွင် ဘုရားရှင်က၊ “ငါ့သား၊ ထာဝရဘုရား၏ဆုံးမပဲ့ပြင်တော်မူသည်ကို ဂရုပြုလော့။ ကိုယ်တော်၏ အပြစ်ပေးဆုံးမခြင်းကို ခံရသောအခါ၌ စိတ်မပျက်လေနှင့်။ 6အဘယ်ကြောင့်ဆို့သော် ထာဝရဘုရားသည် မိမိချစ်တော်မူသောသူကို ဆုံးမတော်မူတတ်၍ သားအဖြစ်လက်ခံတော်မူသောသူကို ဒဏ်ပေးတော်မူတတ်သောကြောင့်ဖြစ်သည်” ဟု သားကို မိန့်တော်မူသကဲ့သို့ သင်တို့အား အားပေးတိုက်တွန်းထားသည်ကို သင်တို့မေ့လျော့သွားကြပြီလော။ 7ဘုရားရှင်သည် သင်တို့အား သားသမီးကဲ့သို့ ပြုမူဆက်ဆံတော်မူသဖြင့် သင်တို့သည် ဆုံးမတော်မူခြင်းကို သည်းခံကြမည်ဖြစ်သည်။ ဖခင်မဆုံးမသော သားသမီးဟူ၍ အဘယ်မှာရှိသနည်း။ 8လူတိုင်းခံရသော ဆုံးမပဲ့ပြင်ခြင်းအား သင်တို့မခံရလျှင် သင်တို့သည် သားရင်းများမဟုတ်ဘဲ တရားမဝင်သောသားများသာလျှင်ဖြစ်ကြသည်။ 9ကျွန်ုပ်တို့အားဆုံးမသော လူဖခင်ကို ကျွန်ုပ်တို့က ရိုသေလေးစားကြပေသည်။ သို့ဖြစ်၍ ကျွန်ုပ်တို့သည် ဝိညာဉ်ရေးဆိုင်ရာဖခင်၏အဆုံးအမကို ပို၍ပင်ခံယူကာ အသက်ရှင်နေထိုင်သင့်ကြသည်မဟုတ်လော။ 10လူဖခင်များသည် ကောင်းသည်ဟုထင်မြင်ကြသည့်အတိုင်း ကျွန်ုပ်တို့အား ခဏမျှ ဆုံးမတတ်ကြသည်။ သို့ရာတွင် ဘုရားရှင်မူကား ကျွန်ုပ်တို့၏ကောင်းကျိုးအတွက် မိမိကဲ့သို့ မြင့်မြတ်သန့်ရှင်းနိုင်ကြစေရန် ကျွန်ုပ်တို့အား ဆုံးမတော်မူပေသည်။ 11ဆုံးမခြင်းခံရသည်မှာ ပျော်ရွှင်စရာမဟုတ်။ ဝမ်းနည်းစရာဟူ၍ ထင်မှတ်ရသော်လည်း ထို့သို့ဆုံးမခြင်းအားဖြင့် လေ့ကျင့်ပေးခံရသူတို့သည်ကား နောင်အခါ၌ ဖြောင့်မတ်ခြင်းတည်းဟူသော ငြိမ်းချမ်းခြင်းအကျိုးကျေးဇူးကို ရရှိခံစားကြလိမ့်မည်ဖြစ်သည်။ 12ထို့ကြောင့် သင်တို့၏ နွမ်းနယ်သည့်လက်များနှင့် ချိနဲ့နေသည့်ဒူးများကို ခိုင်ခံ့စေကြလော့။ 13ဖြောင့်သောလမ်းများတွင် ဆက်လက်လျှောက်သွားကြလော့။ သို့မှသာလျှင် ခြေမသန်သောသူတို့သည် အဆစ်လွဲခြင်းမရှိဘဲ ကျန်းမာသန်စွမ်းလာလိမ့်မည်။ 14လူတိုင်းနှင့်ငြိမ်းချမ်းစွာနေနိုင်ရန်နှင့် မြင့်မြတ်သောဘဝနှင့်နေနိုင်ရန် ကြိုးစားလော့။ မြင့်မြတ်စွာနေထိုင်ခြင်းမရှိသောသူတို့သည် ဘုရားရှင်ကို ဖူးမြင်ရလိမ့်မည်မဟုတ်။ 15မည်သူမျှ ဘုရားရှင်၏ ကျေးဇူးတော်ကို မဆုံးရှုံးစေရန်လည်းကောင်း၊ သင်တို့အား ညစ်ညူးစေ၍ လူများစွာတို့အား အနှောင့်အယှက်ဖြစ်စေမည့် ခါးသီးသောအမြစ်ကို မပေါက်ပွားစေရန် သတိပြုကြလော့။ 16မည်သူမျှ ဧသောကဲ့သို့ တရားနှင့်မညီသော မေထုန်ပြုသူ၊ သားဦးအရာကို ထမင်းတစ်နပ်စာဖြင့်ရောင်းခဲ့သော ဘုရားတရားမဲ့သူမဖြစ်စေရန် သတိပြုကြလော့။ 17သင်တို့သိသည့်အတိုင်း သူသည် နောင်အခါမှ ဖခင်၏ကောင်းချီးကို အမွေဆက်ခံရန်အလိုရှိသောလည်း ငြင်းပယ်ခြင်းခံခဲ့ရသည်။ မျက်ရည်ကျလျက် တောင်းဆိုသော်လည်း မိမိပြုပြီးသည့်အမှုကို ပြောင်းလဲ၍မရနိုင်သောကြောင့်ဖြစ်သည်။ 18သင်တို့သည် ထိတွေ့စမ်းသပ်နိုင်သော သိနာတောင်သို့ ရောက်ရှိနေကြသည်မဟုတ်။ ထိုတောင်သည် မီးတောက်လောင်လျက် မဲမှောင်အုံ့မှိုင်းကာ မုန်တိုင်းကျလျက် 19တံပိုးမှုတ်သံနှင့် နှုတ်ကပတ်တော်သံ ထွက်ပေါ်လာသည့် တောင်ဖြစ်သည်။ ထိုအသံတော်ကိုကြားရသောသူတို့သည် မိမိတို့အား ထပ်မံ၍ မိန့်တော်မမူရန် တောင်းပန်ကြသည်။ 20အဘယ့်ကြောင့်ဆိုသော် “တိရစ္ဆာန်ပင်ဖြစ်စေကာမူ ထိုတောင်ကိုထိမိလျှင် ခဲနှင့်ပေါက်၍သတ်ရမည်” ဟူသော အမိန့်တော်ကို မခံနိုင်သောကြောင့်ဖြစ်သည်။ 21ထိုမြင်ကွင်းသည် အလွန်ကြောက်လန့်ဖွယ်ကောင်းသဖြင့် မောရှေက “ငါသည် ကြောက်လန့်တုန်လှုပ်လျက်နေ၏”ဟု ဆိုခဲ့သည်။ 22သို့သော် သင်တို့သည် ဇီအုန်တောင်သို့လည်းကောင်း၊ ထောင်ပေါင်းများစွာသော နတ်ဒေဝါများရှိရာ အသက်ရှင်တော်မူသော ဘုရားရှင်၏မြို့တော်တည်းဟူသော ရွှေမြို့တော်ရှိ ဂျေရုဆလင်မြို့သို့လည်းကောင်း ရောက်ရှိနေကြသည်။ 23သင်တို့သည် ရွှေမြို့တော်၌စာရင်းဝင်သော သားဦးများပျော်ရွှင် စွာစုဝေးရာသို့ ရောက်ရှိနေကြသည်။ သင်တို့သည် လူအပေါင်းတို့ကို တရားစီရင်တော်မူသော ဘုရားရှင်၏ထံတော်သို့လည်းကောင်း၊ ပြီးပြည့်စုံသည့် ဖြောင့်မတ်သောသူတို့၏ ဝိညာဉ်များထံသို့လည်းကောင်း ရောက်ရှိနေကြသည်။ 24ပဋိညာဉ်တော်သစ်၏ ကြားဝင်စေ့စပ်သော ကိုယ်တော်ယေရှုထံတော်သို့လည်းကောင်း၊ အာဗေလ၏ သွေးထက်ပို၍မြတ်သောအရာကို မိန့်ဆိုသည့်ပက်ဖျန်းသော သွေးတော်ထံသို့လည်းကောင်း ရောက်ရှိနေကြသည်။ 25သင်တို့အား မိန့်တော်မူသောအရှင်ကို ငြင်းဆန်သူများမဖြစ်စေရန် သတိပြုကြလော့။ အကယ်၍ ကမ္ဘာမြေကြီးပေါ်ရှိ သတိပေးသူများကို နားထောင်ရန်ငြင်းဆန်သူတို့သည် ပြစ်ဒဏ်မှ မလွတ်မြောက်နိုင်ကြလျှင် ကျွန်ုပ်တို့သည် ရွှေမြို့တော်မှ မိန့်တော်မူသော ဘုရားရှင်အား ငြင်းပယ်ကြမည်ဆိုပါက ပြစ်ဒဏ်မှ ပို၍ပင် လွတ်မြောက်နိုင်စရာအကြောင်းမရှိပေ။ 26ထိုစဉ်အခါက ဘုရားရှင်၏အသံတော်သည် ကမ္ဘာမြေကြီးကို တုန်လှုပ်စေတော်မူသော်လည်း ယခုအခါတွင်မူ “ငါသည် နောက်တစ်ကြိမ် ကမ္ဘာမြေကြီးကိုသာမက ရွှေမြို့တော်ကိုလည်း တုန်လှုပ်စေဦးမည်” ဟု ကတိပြုထားတော်မူလေသည်။ 27“နောက်တစ်ကြိမ်” ဟူသောစကားသည် ဖန်ဆင်းခံအရာအားလုံးသည် တုန်လှုပ်၍ ပယ်ဖျက်ခံရမည်ဖြစ်သဖြင့် မတုန်လှုပ်နိုင်သော အရာတို့သာလျှင် ကျန်ရှိတော့မည်ဖြစ်ကြောင်း ဆိုလိုခြင်းဖြစ်သည်။ 28ထို့ကြောင့် ကျွန်ုပ်တို့ရရှိကြသည့် နိုင်ငံတော်သည် မတုန်မလှုပ်နိုင်သည်ဖြစ်၍ ကျွန်ုပ်တို့သည် ကျေးဇူးတော်ကိုချီးမွမ်းကြစို့။ ကျွန်ုပ်တို့သည် ကြောက်ရွံ့ရိုသေလျက် ဘုရားရှင်အား နှစ်သက်တော်မူသောနည်းဖြင့် ဝတ်ပြုကိုးကွယ်ကြစို့။ 29အကြောင်းမူကား ကျွန်ုပ်တို့၏ဘုရားရှင်သည် လောင်ကျွမ်းစေတတ်သော မီးသဖွယ်ဖြစ်တော်မူသောကြောင့်ပင်ဖြစ်သည်။
Currently Selected:
Hebrews 12: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
