COLOSSIANUN 3
3
1Kishpin dush kenuhwah keweej‐ahbechebahmag Christ, nunduhwanduhmook enewh uhyeëen ishpeming ayaugin, anduhzhe‐wuhwanuhbid Christ emuh ookecheneenjeeng Kesha‐Muhnedoo.
2Sahgetooyook ishpeming duhzhe uhyeëen, kahween dush ween uhkeeng duhzhe uhyeëen.
3Kegeneboom mahween, kahjegahda dush kebemahdezewinewah emuh Christ anduhzhe ahyaud, emuh Kesha‐Muhnedoong.
4Uhpe dush owh Christ, kenuhwind kebemahdezewinenaun ahyahwid, kapenahgoozid, me suh dush uhpe kenuhwah kaweeje‐nahgoozemag emuh pezhegandahgoozewining.
5Netooyook dush enewh kepukkawezewinewaun oomah uhkeeng ayaugin; pezhigwahdezewin, weenezewin, oonzaumanduhmoowin, pezhigwahdezewine nunduhwanduhmoowin, kuhya shoobezewin, mesuh anandahgwuk debishkoo muzzenene ahnuhmeätuhwind:
6Me suh oonoo uhyeëen wanje‐oodissegoowaud Kesha‐Muhnedoo oonishkahdezewin egewh kagaunzetungig wanejahnesemindjig:
7Ewh kuhya kenuhwah kuhyet kahezhebemoosag oo‐oo keëzhebemahdezeyag.
8Noongoom dush wabenuhmook kuhkenuh oonoo; nishkahdezewin, sheenganindewin, mujje‐kezhwawin, kuhya wahnuk guhnoonindewin wanjebahmahguk emuh kedoonewaung.
9Kagoo kuhkenuhwishkahjemootahdekagoon, kekanduhmag ahzhuh kekesekuhwag owh kata enene kuhya enewh oodezhechegawinun;
10Kuhya dush kepesekahwag owh ooshke enene, owh uhyaunjeïnd emuh kekandahsoowining debishkoo azhenahgoozenid enewh kahoozheëgoojin:
11Emuh kahween pekinoong enanemahsewug owh Greek kuhya owh Jew, owh kakenoowahje‐kishkezhegahzood kuhya owh kakenoowahje‐kishkezhegahzoosig, owh mahyuggezid, owh Scythian, owh ahwuhkaune enene kuhya owh dabandung tebenuhwa weyow; owh suh Christ mahmahwe kushkechega, kuhya ookekishkahwaun kuhkenuh.
12Pesekuhmook suh dush, azhekuhgeginenag Kesha‐Muhnedoo, quuhyuk azhewabezeyag kuhya suhyahgeëgooyag, shahwanjegawinun, keshawahdezewin, ahgahsanemoowin, bakahdezewin, minwahdanduhmoowin;
13Kuhnuhga cheähzhittah‐mujje‐doodahdesewag, ahbwayanindeyag, kishpin ahweyah ningood wuhsittuhwanemaud pakahnezenejin; nahsaub owh Christ kahezheäh-bwayanemenag me suh nahsaub kuhya kenuhwah kaëzhechegayag.
14Oogechuhyeëeng kuhkenuh oonoo pesekuhmook ewh sahgeëdewin, me suh wanje‐minjemoosing quuhyuk‐ezhewabezewin.
15Mahnoo dush oopezaunewawin Kesha‐Muhnedoo tahoogemahkundahgamahgud emuh kedaëwaung, me muh wanje‐nundoomegooyag emuh pazhik weyowemaung; mahmooyahwahganduhmook dush.
16Mahnoo tahkeche‐meshenud oodekedoowin Kesha‐Muhnedoo peenjenuh keyowewaung emuh kuhkenuh nebwahkahwining; chekekenooähmahdeyag kuhya cheäungwahmindeyag mamashquaud, emuh ahnuhmeähwine nuhguhmoowining, emuh kedaëwaung ahnuhmeähwining cheezhenuhguhmootahwag owh Tabaningad.
17Kuhya wagoodoogwan kaënuhnookeewagwan emuh ekedoowining gamuh emuh ezhechegawining, kuhkenuh ezhedooduhmook emuh oodezhenekahzoowining Tabaningad Jesus, mahmooyahwahmag Kesha‐Muhnedoo Wayoosemind ween oonje.
18Wewemahdoog, puggedenedezooyook chenuhittuhwagwah tebenuhwa kenahbamewaug, debishkoo azhenunduhwandahgoozeyag emuh Tabaningang.
19Oonahbamemahdoog, sahgeïk keweedegamahgunewaug, kagoo kuhya wuhsittahwanemahkagoon.
20Wanejahnesemegooyag, nuhittahwik kenegeëgoowaug ewh kuhkenuh menik anenagwah: minwahbuhmenahgwud muh oo‐oo ezhewebezewin emuh anahsuhmuhbid Kesha‐Muhnedoo.
21Oosemahdoog, kagoo nishkeähkagoon kenejahnesewaug, koonemah suh tahahnezheetuhmoog.
22Buhmeetahgunedoog, nuhittahwik egewh kedoogemahmewaug emuh weyausemaung kuhkenuh menik kaenenenagwah; kahween ween ooshkinzhegoo‐buhmetahgawin nahsaub azhebuhmeetahgawaud egewh manwanduhmeähjig enewh enenewun; emuh dush kedaëwaung menoo‐ezhewabezeyag, koosag Kesha‐Muhnedoo:
23Wagoodoogwan dush azhechegawagwan anegookoodaäyag ezhechegayook, debishkoo egewh anookeetahwahjig enewh Tabaninganejin, kahween dush ween enewh enenewun;
24Kekanduhmag dush wemeenenag Tabaningad ewh tebahahmahdewine tebandahsoowin: kebuhmeetahwahwah muh Tabaningad Christ.
25Owh dush maje‐ezhechegad tahdoodahwah debishkoo anandahgwudenig oomujjeëzhechegawin: kah kuhya ahweyah pekinoong tahenanemahse.
Currently Selected:
COLOSSIANUN 3: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
