Hebreo 10
10
1U Kautusan ay mage-anino la, bakán a tatahoden a letrato nu mágkaganda a bagay a dumemát. Awan iye mangpabanal tu umadene hide tu Diyos a magalay kada taon. 2Dipo ni napatawad dán hide tu pamamag-itan nu alay de, ay awan dán nakwa hide ti alalahanán pa tu kasalanan de, sakay awan dán hide magalay a huway. 3Pero u pág-alay a gággimitán de a taon-taon ay lalo a mángpaisip nide tu kasalanan de hide. 4Dipo u dige nu lállake hide a baka sakay nu kambing hide ay awan makapang-ibut tu kasalanan hide nu tolay.
5Kanya ngane, nikuna a dimmemát ti Jesus he ti munduwáy, ay kinagi na tu Ama na,
“U alay hide a hayup ay awan mo gusto,
kanya inhanda mo u bággi ko para magin alay.
6Awan ka nasaya tu alay hide a tinutod sakay tu alay hide para tu kasalanan.
7Kanya kinagi ko niko, ‘Katoyák he, Diyos ko para tupadán u kaluuban mo’, a konna tu nakasulat tu Kasulatan tungkul nikán.”
8Kinagi ni Cristo a, “Awan mo gusto oni kinasayaan u alay hide sakay u hayup hide, u alay hide a tutudán, sakay u alay hide a para tu kasalanan, maski ni ayun iye tu Kautusan.” 9Káttapos ay kinagi na tu Ama, “Katoyák he para tupadán u kaluuban mo.” Kaya inibutan nu Diyos u dipalongo a pág-alay sakay inpalit na u alay ni Cristo. 10Dipo tu págsunud ni Jesu-Cristo tu kaluuban nu Diyos, ay lininis na kitam tu kasalanan tam hide tu pamamag-itan nu pág-alay na tu sadile na a bággi. Pumensan nala iye a ginimet, sakay awan dán iye mahuwa-huway.
11Balang saserdote ay aldew-aldew a magserbi sakay magalay ti konna labe hod a alay, pero awan labe itod hide makaibut ti kasalanan.
12Pero ti Cristo ay pumensan la a nag-alay para tu kasalanan tam, káttapos ay nággetnod dán siya tu kawanan nu Diyos. 13Sakay nadid ay naguhay dalla hod siya hanggan mapasuko nu Diyos nikuna u kadima na hide. 14Kanya tu pamamag-itan la nu pumensan na a pággalay, ay pinaginbanal na hanggan-hanggan u lininis na hide.
15Pinatunayan bi iye nu Banal a Ispirito nikitam. Purumero ay kinagi na,
16“Iye u magin kasunduwan ko nide
káddemát ni aldiwan itod hide,” kagi nu Panginoon:
“Idátton ko tu puso de u utus ko hide,
sakay isulat ko tu isip de.”
17Sakay kinagi na pa a, “Limunán ku dán u kasalanan de hide sakay u mágkadukás de hide a gimet.” 18Kanya dipo napatawad dán u kasalanan tam hide, awan dán kailangan a magalay para tu kasalanan.
Umadene Kitam tu Diyos
19Kanya ngane kákkapatkákka ko hide, malaya kitamon a makasáddáp tu Lugar a Kabanalan dipo tu kákkatay ni Jesus. 20Tu pamamagitan nu pággalay na tu sadili na a bággi ay binukasan na para nikitam u bigu a dilan patamo tu lugar a kabanalan a hod tu dilupot nu kortina. I dilanan iye a u dilan para makaangay kitam tu biyag a awan ti kahád. 21Sakay tehhod kitam a dakila a kataasan a saserdote a mamahala tu pinile hide nu Diyos, 22kanya umadene kitam tu Diyos a tehhod a katapatan sakay matibay a pánnampalataya nikuna, dipo nalinis dán nu dige ni Cristo u isip tam a kumán a na ugisan dán u bággi tam tu malinis a dinom. 23Magpakatatag kitam tu pag-asa tam, sakay diyan kitamon magduwwa-duwwa, dipo matapat u nagpananto nikitam. 24Sakay pagsikapan tam a pabegsákkán u balang essa tu págmahal tu agum, sakay tu pággimet ti maganda. 25Sakay diyan tam kalimunan u pákpagipun-ipun a konna tu agum a nakalimon dán. Nan pabegsákkán tam u isip nu balang essa, lalu dán nadid a ketan tamon a adene dán u káddemát nu Panginoon.
26Dipo ni tulos-tulos kitam palla a maggimet ti kasalanan, maski ni natukuyan tamon sakay natanggap u tatahoden ay awan dán ti mealay para tu kapatawaden nu kasalanan tam. 27Nan u maguhay dálla nikitam ay u makaánteng a pademát a pághatul, sakay u maggehab a apoy a mangtutod tu kadima hide nu Diyos! 28Ayun tu patunay nu duwwa oni tállo a tistigu, u sumuway tu Kautusan ni Moises ay awan ti habag a bunuwán. 29Sakodya ti kadágge tu palagay moy u parusa nu tolay a awan mángpahalaga tu Anak nu Diyos, sakay u awan mángpahalaga tu digi na a nangpatibay tu kasunduwan sakay nángpabanal nikuna, sakay u awan mánggalang tu makákkagbiyán a Banal a Ispirito? 30Dipo matengge tam u nagkagi ti konna he, “Hikán u gumante sakay hikán u magparusa.” Sakay kinagi na pa, “Hatulan nu Panginoon u tolay na hide.” 31Makaánteng u mahatulan nu Diyos a biyag!
32Isipán moy u nangyare nikam tu itod, nikuna a pákkatanggap moy tu Maganda a Baheta. Nagdanas kam ti makpal a kahirapan pero awan kam natalo. 33Ni minsan ay áinsultuwán dikam sakay páppahirapan tu atubang nu kakpalan. Sakay ni minsan be ay makramay kam tu agum moy a magdanas ti konna labi hod. 34Nákpagtiis kam tu pághirap nu nágkepireso hide. Sakay tinanggap moy a te kasayaan nikuna a inagew de u ari-ariyan moy, dipo tukoy moy a tehhod kam a mas maganda sakay awan mawan a ari-ariyan u nelaan nikam. 35Kanya diyan kam mawanan ti pánnalig tu Diyos, dipo tehhod a dakál a piremyo a nakalaan para nikam. 36Kailangan kam a magtiis tánni masunud moy u kaluuban nu Diyos sakay matanggap moy u inpananto na. 37Dipo kinagi tu Kasulatan a,
“sabadit dálla a panahun ay dumemát dán siya.
Awan dán siya magmamalay.
38U matapat ko a tagapagserbi ay mabiyag a tehhod a pánnampalataya,
pero ni adággen na u pánnampalataya na,
ay awan ko siya kasayaan.”
39Pero awan kitam kasale tu immadág hide sakay nepahamak, nan tu sumampalataya hide tu Diyos sakay tu nágkaligtas hide.
Currently Selected:
Hebreo 10: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
