Hebreo 11

U Pánniwala tu Diyos

1U pánnampalataya ay u págtiwala a mangyare u áasaan tam hide, sakay tehhod kitam a kasiguraduwan tu bagay hide a awan ketan. 2Dipo tu pánnampalataya de ay kinasayaan nu Diyos u tolay hide tu itod.

3Dipo tu pánnampalataya ay naintendiyan tam a nilalang u mundu tu pamamag-itan nu upos nu Diyos sakay u bagay hide a ketan ay gábwat tu awan hide ketan.

4Dipo tu pánnampalataya tu Diyos, ay nagalay ti Abel ti mas maganda a alay nan tu inhandog ni Cain. Kanya nebilang a matuwid ti Abel nikuna tanggapán nu Diyos u alay na. Maski ni nalay dán siya a natay ay magupos padi siya tu pamamag-itan nu pánnampalataya na tu Diyos.

5Dipo tu pánnampalataya tu Diyos ay awan natay ti Enoc nan inyangay siya ti langet. Awan dán siya netan dipo inalap dán siya nu Diyos. Kinagi tu Kasulatan a bago a inyangay nu Diyos ti Enoc ay makasaya dán tu Diyos u biyag na. 6Ni awan kitam sumampalataya tu Diyos, ay awan tam siya mapasaya, dipo ni deyaman u umadene nikuna ay dapat a maniwala a tehhod a Diyos a mángngatád ti piremyo tu tolay hide a magsikap a makilala u Diyos.

7Dipo tu pánnampalataya ay sinaneg ni Noe u babala nu Diyos tungkul tu bagay hide a mangyare a awan na palla netan. Kanya naggimet siya ti essa a dakál a abang tán maligtas siya sakay u pamilya na. Dipo hod ay nahatulan u tolay hide ti munduway, pero ti Noe ay nebilang a matuwid dipo tu pánnampalataya na tu Diyos.

8Dipo tu pánnampalataya tu Diyos ay sinunud ni Abraham u utus nu Diyos a umangay tu lugar a inpananto na nikuna. Simmunud ngane siya maski awan na tukoy ni hádya angayan naay. 9Dipo tu pánnampalataya na be ay nágyan ti Abraham bilang dayuhan tu lugar a inpananto nikuna nu Diyos. Nágyan siya tu tolda, sakay konna bi hod di Isaac sakay ti Jacob, a tagapagmana be tu pananto nu Diyos. 10Dipo áohayán ni Abraham u essa a banuwan a matibay u pundasiyon a mismo u Diyos u nagplano sakay nángtatag.

11Dipo tu pánnampalataya ay nagkahod ti kakayanan a magin ama ti Abraham, maski ni lakay dán siya sakay maske awan dán magenak ti Sara. Pero nanalig siya a tupadán nu Diyos u pananto na. 12Kanya ti Abraham a mebilang a ngahe-ngahe dán a patay ay naggábwatan nu essa a lahe a konna ti kakpal nu biton ti langet sakay tu baybay tu gibis nu diget.

13Natay hide a atanan a tehhod a pánnampalataya tu Diyos. Awan de natanggap u inpananto nu Diyos pero natannaw de itod tu adeyo. Inturing de u sadile de a dayuhan la ti munduwan iye. 14Hod tam he a matukuyan a u tolay hide a konna hod ti pággisipan ay maguhay palla hide ti sadile de a banuwan. 15Ni áisipán dilaay ay u banuwan a linakaden de, tehhod pa nakwa hide a pagkakataun a makasole. 16Pero u gusto de ay u mas maganda a banuwan, u banuwan a katoy ti langet. Kanya awan ingkasanike nu Diyos a dulawán de siya a Diyos de, dipo naghanda na hide ti essa a banuwan.

17Dipo tu pánnampalataya ni Abraham, ay inyalay na ti Isaac nikuna a subukán siya nu Diyos. Handa siya a máng-alay tu mággeessa na a anak, maski tukoy na a u pananto nikuna nu Diyos 18a u magin lahe na ay maggábwat ni Isaac. 19Dipo maniwala ti Abraham a ni matay ti Isaac ay kaya siya a biyagán a huway nu Diyos a kumán a konna ngani hod u nangyare. Kumán a nesole nikuna ti Isaac a gábwat tu patay hide.

20Dipo tu pánnampalataya ay kinagi ni Isaac di Jacob ay ti Esau a pagpalaán hide nu Diyos tu dumemát a panahun.

21Dipo tu pánnampalataya ay kinagi ni Jacob a pagpalaán nu Diyos u duwwa a anak ni Jose bagu siya a natay. Sakay timmawed tu ontok nu sahukod na sakay sinumamba tu Diyos.

22Dipo tu pánnampalataya, kinagi ni Jose nikuna a adene dán siya a matay, a makalakad u Israelita hide ti Egipto sakay imbilin na a tawidán de u tulang na hide.

23Dipo tu pánnampalataya ay awan nanteng a summuway u dáddakál ni Moises tu utus nu hare; nikuna ketan de a maganda u pámmamággi nu anak, kaya intagu di siya tu alay nu tállo a bulan.

24Dipo tu pánnampalataya, inumád ti Moises a padulaw a anak nu prinsesa a anak nu hare ti Egipto, nikuna dakál dán siya. 25Ginusto na pa a mákpaghirap tu tolay hide nu Diyos, nan magtamasa ti kasayaan a awan la magmalay a maggábwat tu kasalanan. 26Imbilang na a mas mahalaga u magtiis para tu Mesias kasera tu kayamanan hide ti Egipto. Dipo nakatuun u isip na tu gantimpala hide a pademát.

27U pánnampalataya be u nánggiya ni Moises a lakaden na i Egipto maski ni magingál u hare. Mabegsák u isip na dipo kumán na a ketan u Diyos. 28Dipo be ti itod a pánnampalataya, kanya na a sinapulan u pánggimet tu Aldew nu Káttaleb. Sakay iyutus u págpahid ti dige tu pintuwan hide nu bilay para awan bunuwán nu Anghel a Magpuksa u panganay hide a lállake a Israelita.

29Dipo tu pánnampalataya tu Diyos, ay nakaahabes u Israelita hide tu Madideg a Diget a kumán a maglakad tu mamade a luta. Pero nikuna a umahabes u taga-Egipto hide ay nágkalimás hide.

30Dipo tu pánnampalataya nu Israelita hide tu Diyos ay naduhay u pader ti Jerico, káttapos de a lebután tu pitto a aldew. 31Dipo tu pánnampalataya, u belyas a ti Rahab, ay awan nepahamak a kaguman nu umád hide a pasakup tu Diyos, dipo pinatulos na ti maganda u magsubuk hide.

32Magtulos-tulusák pa beman? Kulangannák ti panahun ni essa-essaán ko a ikagi u ginimet hide di Gideon, Barak, Samson, Jefte, David, Samuel, sakay tu prupeta hide. 33Dipo tu pánnampalataya de tu Diyos, ay tinalo de u kahariyan hide, nabiyag hide ti matuwid sakay natanggap de u inpananto hide nu Diyos sakay napaamo de u liyon hide. 34Awan hide napase tu maggehab a apoy, sakay nakaligtas tu ispada nu mangbuno hide nide. U agum nide ay mágkahina pero inatádden hide nu Diyos ti begsák para magin mabegsák tu labanan, kanya natalo u sundalo hide a dayuhan. 35Dipo tu pánnampalataya, ay nesole tu sangan a bábbey u mahal di hide ti biyag a nagkatay káttapos a biyagán a huway.

U agum be ay umád de a palayaán hide, nan tiniis de u págpahirap nide, dipo tukoy de a maske matay hide ay huway labe hide a biyagán; sakay ibiyagan itod ay adeyo a masmaganda. 36U agum be ay ininsulto sakay linatigu sakay tehhod be a nekulung a nakakadena. 37U agum be ay binábbatikal, tináppeng ti lagadi sakay binuno ti áttak. Nagsulot be u agum ti koblet ni tupa sakay koblet ni kambing. Sakay u agum be ay naklimu-limus, inape-ape, sakay pináppasakitan. 38Pakalat-kalat hide tu parang sakay tu buki-buked. Timmagu hide tu kuweba sakay tu ábbut nu luta. Awan karapat-dapat nide i munduway!

39Dipo tu pánnampalataya de tu Diyos, ay nángwahak hide ti essa a kasaysayan a awan mali-malimunan maski nikan. Pero u impananto nu Diyos ay awan de natanggap tu panahun de. 40Iye ay dipo tehhod a mas maganda a plano u Diyos para nikitam, dipo gusto na a makaguman de kitam ni tupadán na dán u impanananto na nide a hide ay magin ganap.

Currently Selected:

Hebreo 11: MBJC

Highlight

Compare

Copy