Hebreo 9

U Págsamba ti Lutaáy sakay ti Langet

1U dipalongo a kasunduwan ay tehhod a patakaran tu págsamba sakay tu págsambaan a katoy ti lutaáy. 2U tolda a netaknág ay te duwwa a parte; U purumero a parte ay u Lugar a Banal. Katoy hod u saláng, lamisaan, sakay u tinapay hide a alay tu Diyos. 3U kaduwwa a parte ay atoy tu dilupot nu kortina a dáddulawán a Lugar a Kabanalan. 4Atoy hod u altar a ginto a págtutudan ti insenso, sakay u kaban nu Kasunduwan a nabalutan ti ginto. Tu disalad nu Kaban ay tehhod a pággasákkan a ginto a u lasán na ay mana, u sahukod ni Aaron a nagduun, sakay u nágkatapyas a bito a sássulatan nu Kasunduwan. 5Tu dibbew nu Kaban ay tehhod a kerubin#9:5 Kerubin: Iye u anghel hide a tagapagbantay sakay hide labe u anghel a nagbantay ti Eden, mabasa iye tu Genesis 3:24. a mángpeta a katoy hod u Diyos. Táttakáppan nu pakpak de hide u Lugar nu Kagbi. Pero ti nadidáy ay awan mi palla mepaliwanag a atanan.

6Konna hod u ayus nu disalad nu tolda a págsambaan de. U saserdote hide ay sumáddáp aldew-aldew tu purumero a parte tán gimitán de u tungkulin de. 7Pero u makasáddáp la tu kaduwwa a bahagi ay u pinakapuno a saserdote sakay pumensan na la iye a gimitán ti sataon. Te tawed siya a dige a iyalay na tu Diyos, para tu kasalanan na hide sakay tu katolayan, tu nagimet de hide a kasalanan a awan de namalayan. 8Ti iye a ayus na ay malinaw a ipakapospos nu Banal a Ispirito a u dilan a patamo tu Lugar a Kabanalan ay awan palla bukas mentaras a mágtaknág palla u date a tolda a págsambaan. 9Itod hide ay mage anino la, u gusto na a ipakapospos ay u panahun nadid a kasalukuyan. U kaluub hide sakay u alay hide hod ay awan makapangpabanal tu sumamba hide. 10I gággimitán diyan itod hide ay tungkul la ti pagkain sakay inuman sakay tu sare-sare a kalase a páglinis. Kautusan hide a pangluwas a gumana la a hanggan a dumemat u bigu a paraan nu Diyos.

11Pero dummemát dán ti Cristo a pinakapuno a saserdote nu bigu a kasunduwan. Nagserbi siya tu págsambaan a awan ti kapareho ti kadakila, awan ginimet ni tolay, sakay awan ti munduway. 12Pumensan la a simmáddáp ti Cristo tu Lugar a Kabanalan, sakay awan dán kailangan a huwayán. Bakán a digi ni kambing sakay digi ni bul-o a baka u inyalay na nan u sadile na a dige, tánni mapatawad kitam tu kasalanan tam hanggan-hanggan. 13U dige nu kambing sakay nu toro sakay u abu nu dumalaga a baka ay iwasek-wasek tu tolay a madangát ti biyag. Káttapos ni itod ay mebilang dán hide a malinis ayun tu Kautusan. 14Pero mas dakál u magimet nu dige ni Cristo! Tu pamamag-itan nu awan ti katapusan a Ispirito ay inyalay na tu Diyos u sadile na bilang alay a awan ti kapintasan. U digi na u manglinis tu puso ay tu isip tam tán adággen tamon u gimet hide a awan ti kabuluhan sakay pagserbiyan tam u Diyos a biyag.

15Kaya ngane ti Cristo u tagapamagitan tu bigu a kasunduwan. Dipo tu kákkatay na, ay napatawad u katolayan tu kássuway de nikuna a sakup palla hide nu purumero a kasunduwan. Kanya dipo hod, ay matanggap nu dinulaw hide nu Diyos u impananto na a awan ti katapusan a págpapala.

16Mara ni kasunduwan ay kailangan a mapatunayan a patay dán u nanggimet. 17Dipo awan ti bisa u kasunduwan mentaras a biyag palla u nanggimet. Magkabisa la iye ni matay dán siya. 18Konna labe tu date a kasunduwan nu Diyos a nagkabisa la tu pamamag-itan nu dige nu hayup hide a inyalay de. 19Dipo káttapos a inpakapospos ni Moises u Kautusan tu katolayan, ay inalap na u dige nu baka hide sakay kambing sakay hinaluwan na ti dinom. Nangalap siya ti madideg a langis sakay pinget ni hisopo, sakay insawsaw na itod tu dige a te halo a dinom. Sakay winasek-wasikan na u libro nu Kautusan sakay u tolay hide. 20Káttapos ay kinagi na, “Iye u dige a nangpatibay tu Kasunduwan a inyatád nu Diyos sakay ipatupad na nikam.” 21Winasek-wasikan na be tu dige u tolda sakay u atanan a gamit tu págsamba. 22Ayun tu Kautusan, halus atanan a kagamitan tu págsamba tu tolda ay mebilang a malinis tu pamamag-itan nu dige. Sakay awan mapatawad u kasalanan ni awan ti mebuhos a dige bilang alay tu Diyos.

U Kapatawaden nu Kasalanan ay u Kákkatay ni Cristo

23Iye hide a kasangkapan tu págsambaan, ay mage-letrato la nu katoy ti langet. Kaya kailangan a linisan tu pamamag-itan nu pággalay. Pero kailangan a mas mágkaganda a alay u iyalay para tu kagamitan a págsamba ti langet. 24Dipo ti Cristo ay awan simmáddáp tu Lugar a Kabanalan a ginimet ni tolay, sakay mageletrato la nu tatahoden, nan tu lugar a kabanalan ti langet. Nadid ay katoy dán siya tu atubang nu Diyos a mamag-itan para nikitam.

25U pinakapuno a saserdote nu Judio hide ay sumáddáp tu Lugar a Kabanalan kada taon, a te tawed a dige ni hayup. Pero ti Cristo ay pumensan la a simmáddáp para iyalay na u sadile na, sakay awan nadán kailangan a huwayán. 26Dipo ni bakán a konna hod ay kailangan a pahuway-huway siya a matay sapul nikuna a lalangán i munduway. Pero pumensan la siya a immangay he, nadid a katapusan dán nu panahun tán buhaán na u kasalanan tu pamamag-itan nu pág-alay na tu sadile na. 27Netakda tu tolay a pumensan la a matay, káttapos ay u pághatul. 28Konna labi hod, ti Cristo ay pumensan la a natay tán buhaán na u kasalanan nu tolay hide. Dumemát siya a huway, bakán a para tubusán a huway u kasalanan nu tolay nan tán iligtas na u magáohay hide nikuna.

Currently Selected:

Hebreo 9: MBJC

Highlight

Compare

Copy