Sealm 41
41
Sealm 40
Dauid sang þysne feowertigoðan sealm be his earfoðum, and eft be þam fultume þe he hæfde fram Gode, and he sæde eac on þam sealme hu he hæfde afandod ægðer ge his frynd ge his fynd on his earfoðum and on his ungelimpe; and eac he witgode be Ezechie cincge þe æfter him beon sceolde, þæt him sceolde þæt ylce beon; and eac be ælcum Crisnum men he witgode þæt ylce, þara þe ærest on earfoðum byð and eft on eðnesse; and eac be Criste he witgode on þæm sealme and be Iudeum, hu hy hine swencton and hu hine God eft arette.
1Eadig bið se þe ongyt þæs þearfan and þæs wædlan,
and him þonne gefultumað gif hine to onhagað;
gif hine ne onhagað,
þonne ne licað him, þeah, his earfoðu.
Þone gefriþað Drihten on swylcum dæge
swylce him swylc yfel becymð.
2Drihtne hine gehylt and hine geliffæst
and gedeð hine gesæligne on eorðan,
and ne sylð hine na on his feonda handa and anweald.
3Drihten him bringð fultum to his bedde þe he an lið,
and eall his bedd he onwent of untrumnesse to trymðe.
4Ic cweðe, Drihten, to þe:
“Gemildsa me and gehæl mine sawle,
for ðon ic gesyngode wið þe.”
5Mine fynd me cwædon yfel and wilnodon,
and spræcon betwuh him and cwædon:
“Hwonne ær he beo dead,
oþþe hwænne his nama aspringe?”
6And þeah hy þæs lyste, þeah hy eodon into me
and fandodon min and seofodon min sar.
And þonne hy ut eodon from me,
þonne worhton hy heora gemot;
and wæran ealle anspræce þonne hy
me leahtrodon and læðdon.
7Ealle mine fynd, hy þonne gegaderodon ongean me
and þohton me yfeles and spræcon me yfeles,
and spræcon unriht wið me,
and cwædon on bysmor:
8“Nis him nan lað: he rest hine; eaðe he mæg arisan,
þeah he slape and liccete untrymnesse.”
9Ge furðon, þa spræcon þæt ylce mid him,
þe ic betst truwode,
and þa þe ær æton and druncon mid me.
10Þu, þonne, Drihten, nu gemiltsa me and arære me
to þam þæt ic him mæge forgyldan þæs lean.
11Þonne ongyte ic on þam þæt þu me lufast,
gif nan minra feonda ne fægnað mines ungelimpes.
12Þu me underfenge for minre unsceðfulnesse
and me gestrangodest beforan þinre ansyne on ecnesse.
13Gebletsod sy se Drihten, Israela God,
on weorulda weoruld; sy swa!
Currently Selected:
Sealm 41: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
