ROMA 8
8
Urip alem belua'
1Avin ha' nutih kerei inih nusi' nah té' ukum la'an men kelunan aleng té' té' alem Kristus Yesus. 2#Rom 3:27; 7:23-24 Avin Belua' aleng alem Kristus Yesus hu'uh ma'uk urip dahin makau itam men kaput sala dahin patei atih. 3#Yoh 1:14; HST 13:38; 15:10; Fil 2:7; Ib 2:17; 4:15 Ket aleng em deng en tebara menuna' na, avin ha' lema kenan barik batung kelunan, atih nah uh en Allah na, iha' tih Iha' uh menei Anak Na' atih, nei alem batung awi batung kelunan aleng sala, ja Iha' jadi' laluh sala atih. Alem nunan Iha' mutet ukum té' sala alem batung kelunan atih. 4#Gal 5:16,25 Iha' na nutih ja lim tebara menuna' atih deng nei la'ung alem kenep tam aleng em ngioh barik usun tana anih, iha' tih men itam aleng ngioh urip men Belua' atih.
5Avin kelunan aleng murip ngioh barik usun tana pelemana' ket ha' usun tana anih tua daha', bi kelunan aleng murip men Belua' atih pelemana' ket aleng men Belua' kah daha'. 6#Rom 6:21 Kenep aleng men barik usun tana, atih nah patei, bi kenep aleng men Belua', atih nah urip dahin dena'. 7#Mat 12:34; Yoh 8:43; 12:39; Yak 4:4 Avin kenep men usun tana, pa'en pebunu dahin Allah, avin nusi' ha' nyepida té' tebara Allah, peletu ha' em deng nyepida lahuh. 8Kelunan aleng alem barik usun tana anih Allah pah em melu té' daha'.
9 #
1 Kor 3:16; 12:3 Ikam anih, nusi' nah ikam alem barik usun tana anih la'an, bi ikam uh alem Belua', iha' atih, iha' Beluan Allah té' murip alem kenep kam. Awi ji kelunan em hipun Beluan Kristus, nusi' nah iha' anun Kristus. 10#Gal 2:20; Fil 1:21; 1 Pet 4:6 Bi iha' Kristus té' alem kam, batung kam atih uh matei avin sala, bi belua' atih murip avin teneng. 11Bi iha' Beluan Allah aleng meju Yesus men hang kelunan matei atih té' melo' alem kam, iha' aleng meju Kristus Yesus men hang kelunan matei atih seng pekurip batung kam aleng seng matei atih lahuh, kenan Beluan Na' aleng melo' halem kam.
12 #
Rom 6:7,18 Avin ha' nunan u kelo' harik, itam anih té' utang, bi utang atih nusi' ha' utang té' barik usun tana nyihu itam murip ngioh barik usun tana. 13#Gal 6:8; Ef 4:22-24 Avin awi ikam murip ngioh barik usun tana, adang ikam seng matei, bi awi iha' kenan Belua' ikam lematei hadui batung kam atih, ikam seng murip.
14Lim kelunan aleng en Beluan Allah ayak, daha' atih nah aleng anak-anak Allah. 15#Gal 4:5-7 #2 Tim 1:7 Avin nusi' nah ikam jadi' dipen la'an ngavan kam takut, bi ikam uh ala Belua' atih aleng na ikam anak-amung Na', kenan Belua' atih nah ikam deng kuma' “Aba, u Amei.” 16#2 Kor 1:22 Belua' atih nah aleng piah-piah bara dahin beluan tam marung itam anak Allah. 17#Gal 4:7; K Tula 21:7 Iha' itam uh jadi' anak nutih, itam seng té' nyengayan ket lahuh, iha' atih itam nyengayan ket en Allah ih, piah nyengayan dahin Kristus, iha' tih iha' itam jam katé' dahin Na', ja itam pah en Na' na maren piah dahin Na' lahuh.
Katé' aleng jaki nujo' aren aleng pa'en
18 #
Rom 5:2; 2 Kor 4:17 Avin akui pelemana' alem kenep kui, katé' aleng kerei inih anih nusi' ta' deng petyah na' dahin aren aleng seng tula té' itam. 19#Kol 3:4 Iha' kah lim-lim ket aleng uh en Allah ngelengunan atih kelalau nekyang daha', pidah anak-anak Allah nei tula pa. 20#Ar Kel 3:17-19; 5:29; Pek Ur 1:2 Avin ket lim-lim uh tei nyepida tua té' ket aleng tung-tung atih, nusi' ha' kenan kenep daha' dep, bi kenan kenep Na' aleng uh matei daha' atih kah, bi té' loh kah kinah ta'. 21#2 Pet 3:13; 1 Yoh 3:2 Avin lim ket atih aleng uh ga' kaput seng tasa', lim na' seng takau ja tei halem urip lesah aleng maren dahin daha' anak Allah. 22Avin itam jam lim ket aleng uh en Allah ngelengunan piah ngenalui dahin piah jam perah awi perah nganak ateng kerei inih. 23#2 Kor 5:2-4; Gal 5:5 Nusi' ha' daha' atih tua, bi itam aleng uh ala bua una' Belua' atih pah lahuh, itam anih pah lahuh ngenalui alem kenep tam alem itam pidah jadi' anak-amung Na', iha' atih batung tam takau. 24#2 Kor 5:7 Avin kenan kinah itam uh ala urip. Bi ket en tam nekyang aleng uh nei tula, nusi' tam nekyang na' la'an. Avin seng nuno' ta' nekyang ket aleng uh nei tula? 25Bi awi itam nekyang ket aleng em tula, itam pidah na' dahin aru kenep.
26Nunan pah lahuh Belua' nei masi lema tam. Avin nusi' tam jam seng nuno' tuk tam sebayang, bi Belua' atih nah aleng akei ha' unan Allah men itam dahin ngela'it ateng ha' em tula dahun Na'. 27#NDI 139:1; 1 Kor 4:5 Tuhan aleng ngering alem kenep kelunan dahin jam nun aleng kenep Belua' atih lahuh, avin Belua' atih akei ha' unan Allah men lim anak Tuhan, ngioh kenep Allah. 28#Ef 1:11; 3:11 Itam jam men daha' aleng nyalam té' Allah, Allah pah nyadui alem lim nun-nun ja na aleng sayu men kelunan aleng en Na' uvui ngioh kenep Na'. 29#Kol 1:18; Ib 1:6 Avin kelunan aleng uh kitan Na' pekuna', daha' atih kah aleng en Na' petneng pekuna', ja Iha' pela'ung daha' balui awi selapin Anak Na', ja Anak Na' atih jadi' anak una' men hang kuri-kuri kahum daha' aleng peharin. 30Daha' aleng uh en Na' petneng pekuna' lahuh, daha' atih nah aleng en Na' uvui, dahin daha' aleng en Na' uvui atih lahuh, en Na' itung teneng, dahin daha' aleng en Na' itung teneng atih pah daha' atih nah aleng en Na' na maren.
Lu kelunan aleng uh teneng
31 #
NDI 118:6; Mat 1:23 Avin ha' nunan, seng nun dahun tam la'an marung lim tuk anih? Iha' Allah té' dahin tam, hi kah seng deng lawan itam? 32#Yoh 3:16 Anak Na' atih pah Iha' em ma'eng peletu, bi iha' ma'uk Iha' men itam lim, lalau lan pah lim ket nun-nun seng en Na' uk tua men itam lahuh. 33#Yes 50:8 Hi kah aleng deng nyelema' kelunan aleng en Allah mili? Allah aleng itung daha' teneng. 34#NDI 110:1; 1 Yoh 2:1 Hi kah aleng seng deng pesala daha'? Kristus Yesus Iha' nah aleng hu'uh matei, lan, Iha' en Allah ju men hang kelunan matei, Iha' pah té' bah ta'o Allah, dahin akei asi ha' unan Allah avin itam. 35Ket nun kah aleng seng deng muéh itam men halam Kristus? Katé' kenep iah, humé' iah, katé' kenan kelunan iah, lien iah, awi jam tuk katé' utoh iah, ga' tusah iah, malat iah? 36#NDI 44:23; 2 Kor 4:11 Awi aleng uh kalung,
“Avin tavit Ika' kah kamé' té' té' alem tusah patei pahdau adeng,
kamé' en daha' lo' awi jam tuk duba aleng en daha' tevek dih tua.”
37 #
Yoh 16:33
Bi alem lim ket nunan itam kelalau maneng kenan Allah aleng nyalam itam. 38Avin akui jam lan nusi' té' nun-nun aleng deng mukéh itam men halam Allah. Patei, dahin urip, meliket, dahin ket aleng gem, ket aleng té' kerei inih, dahin ket aleng seng ateng, dahin nun-nun u'a tingan, 39dahin bau, dahin dalem, dahin nun-nun ket kelengunan aleng ha' béh pah peletu em deng mukéh itam men halam Allah aleng té' alem Kristus Yesus Tuhan tam.
Currently Selected:
ROMA 8: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
