ROMA 9
9
Bahat kenep Paulus marung daha' Israel
1Akui bara ket aleng teneng alem Kristus, nusi' kui pamoh, bi kenep kui aleng en Belua' Ma'ang ayak aleng menglan na' lahuh, 2akui kelalau bahat kenep dahin ku'in em tei halau, 3#Us 32:32 ateng kui kaséh awi jadi' tulah pebet men Kristus avin tavit daha' harik aleng bengsa' kui. 4#Us 4:22; 9:4; Kel d M 7:6; 14:1-2 Avin daha' atih kelunan Israel, daha' nah aleng uh en Na' ala jadi' anak na', daha' aleng hipun aren Allah, dahin pakat aleng tageng, dahin tebara menuna', dahin hadui Allah, dahin lim jaji, 5#Mat 1:1; Lk 3:23; Yoh 1:1; Rom 1:25 daha' nah men sepun tam aleng en tam ju atih, men pahu daha' nah Kristus nei nyemau balui kelunan, Iha' aleng Allah hujung ket lim-lim, aleng en tam ju pa'en-pa'en. Amin.
Avin daha' Israel pebet nusi' anan lemasat jaji Allah
6 #
Kah d Is 23:19; Rom 2:28 Nusi' dahun Allah em teneng. Kelunan Israel nan seng pahu Israel lim daha' iah? 7#Ar Kel 21:12 Daha' pahu Abraham tih, nusi' lim daha' atih adang anak na', bi “Daha' aleng men pahu Ishak atih dep kah aleng seng aran pahu ka',” ken Tuhan di. 8#Gal 4:23 Alem na', nusi' lim daha' anak na' seng en itung anak na' lan, bi anak aleng nei kenan jaji Allah atih aleng pahu na' lan#9:8 Ishak, atih nah aleng anak jaji aleng en kuma' anak Allah. Ismael, anak Abraham té' hawa' apit na', nusi' nah atih en itung anak Allah.. 9#Ar Kel 18:10 Avin nunih nah dahun jaji atih, “Tegu jaka' nunih Akui seng nei ateng, Sara pah seng nganak ji anak laké'.”
10 #
Ar Kel 25:21
Bi nusi' ha' nutih tua, bi tegu Ribka lahuh nei mali kenan Ishak aleng sepun tam, 11em payan anak atih kanak dahin em payan na nun-nun ket aleng sayu dahin aleng ji'ek, 12#Ar Kel 25:23 Tuhan kuma' men Ribka, “Anak aleng una' pulang tei jadi' nyam alem amin anak aleng baya,” 13#Mal 1:2-3 awi aleng uh kalung, “Yakup aleng Ek nyalam, bi Esau aleng Ngavak heléh.” Té' pah iha' nunih, adang Allah ngioh kenep Na' aleng mili kelunan, nusi' ha' kenan hadui daha', bi kenan uvui Allah.
Avin daha' Israel pebet nusi' anan lemasat teneng Allah
14 #
Kel d M 32:4
Avin ha' nunan ké', nuno' dahun tam kuma' ré? Allah em teneng atih iah? Peletu-letu nusi'. 15#Us 33:19 Iha' kah Iha' kuma' men Musa pa, “Akui seng masi daha' aleng Ek masi, Akui pah seng perah henga' masi daha' aleng seng Avak perah henga' masi.” 16#Ef 2:8 Avin ha' nutih, nusi' ha' kenan kenep kelunan dahin kenan tangen hadui kelunan, bi men Allah aleng masi. 17#Us 9:16 Iha' kah surat Tuhan kuma' men Firaun, “Avin tavit anih nah Akui meju ika', ja Akui petula tingan Kui men alem batung ka', ja aran Kui tei putat té' ji usun tana anih.” 18#Us 4:21; 7:3; 9:12; 14:4,17 Avin ha' nunan Allah masi hi-hi aleng kenep Na', dahin hi-hi aleng kenep Na' en Na' na muau, en Na' na muau nah kenep daha'.
19Adang kam seng kuma' men akui, “Avin na nun Iha' pesala itam? Seng hi aleng deng melawan kenep Na'?” 20#Yes 29:16; 45:9 U kelunan, hi kah ika' aleng ngenep pehu'ei dahin Allah? Deng ket aleng en Na' na atih seng kuma' men Iha' aleng na na' iah, “Avin na nun Ika' na akui nunih?” 21#Yer 18:6 Tukeng taring atih kah aleng té' kenep na' na tana kalit aleng en na' nyelung atih keta'? Men ji kela'ung tana atih iha' na ji taring men hadui aleng sayu, men kela'ung tana atih loh kah iha' na ji la'an men hadui aleng malei.
22 #
Yer 50:25
Nun aleng dahun ta' awi Allah ngenep petula unget Na' dahin bara tingan Na', bi Allah kelalau mawa kenep Na' té' taring aleng seng ga' unget Na', aleng adang seng tasa' atih? 23#Rom 2:4; 8:29; Ef 1:3-12 Nunan pah Iha' petula aren Na' aleng kaya té' daven-daven Na' aleng ngavan Na' mawa aleng uh en Na' nemei menuna' men aren Na' atih. 24Avin itam anih aleng uh en Na' uvui, nusi' ha' men hang daha' Yahudi tua, bi men kelunan aleng bengsa' ha' béh lahuh. 25#Hos 2:22 Awi jam tuk dahun Na' alem surat nabi Hosea di,
“Aleng em pahu Kui atih
Akui seng kuma' daha' pahu Kui,
dahin aleng em Ek nyalam atih pah
seng Ek nyalam pah lahuh.”
26 #
Hos 1:10
“Lan, ha' Ngavak kuma' men daha' atih,
‘Ikam anih nusi' kam pahu Kui,’
bi hinan nah daha' seng na aran daha'
‘anak-anak Allah aleng murip atih.’ ”
27 #
Yes 10:22-23; Rom 11:5 Bi Yesaya medéng marung tuk daha' Israel, nunih, “Pulu hangun pah daha' anak-anak Israel awi jam tuk kahum hit ha' bahé' banget tih, bi aleng hulé' daha' atih tua aleng seng murip. 28Lan, tasa' aleng uh té' patem atih té' ji usun tana, adang Tuhan seng pela'ung na' lalau. 29#Yes 1:9 Awi jam tuk Yesaya kuma' pekuna' lahuh,
“Awi Tuhan Hujung Ket Lim-lim em melo' ji beni,
adang itam uh jadi' awi jam tuk Sodom tua, dahin piah awi Gomora lahuh.”
Daha' Israel uh pebet avin sala daha'
30 #
Rom 10:20
Nun kah aleng dahun tam iha' ha' nunan? Kelunan aleng bengsa' ha' béh aleng em ilau teneng hu'uh hipun teneng atih, iha' tih teneng aleng kenan kinah, 31#Rom 10:2-3 bi pahu Israel aleng ilau tebara aleng nujo' teneng, nusi' nah daha' halum té' tebara atih. 32#Yes 8:14 Avin na nun? Avin daha' em nginah alem daha' ilau na', bi daha' ilau na' kenan hadui daha' tua. Daha' uh netung té' bato' avan daha' netung, 33#Yes 28:16; Mat 21:42; 1 Pet 2:6 awi jam tuk aleng alem surat,
“Akui melo' té' alem Sion ji bato' ngavan daha' netung
dahin ji bato' ngavan daha' telesa',
bi hi-hi aleng nginah té' Iha', nusi' iha' seng ga' ha'éh.”
Currently Selected:
ROMA 9: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
