ROMA 7
7
Yesus makau itam men tebara menuna'
1U kelo' harik, akui té' tengaran dahin kelunan aleng jam tebara menuna' atih, nusi' kah ikam jam tebara menuna' atih tageng gem kelunan jarun-jarun urip na' iah? 2Avin ji doh aleng té' laké' na' adang ha' kaput té' laké' na' kenan tebara atih alem laké' na' atih murip, bi awi laké' na' matei, pebet nah iha' men tebara marung laké' na' atih. 3Avin anan, awi alem laké' na' atih murip, doh atih tei peji dahin laké' ha' béh, doh atih en itung petuyang tua. Bi awi laké' na' matei, doh atih hu'uh pebet men tebara atih, nusi' nah iha' kelunan aleng petuyang, lan pah iha' peji dahin laké' aleng ha' béh. 4#Kol 2:14 Nunan pah lahuh u kelo' harik, ikam anih pah hu'uh matei musang men tebara menuna' atih avin ikam uh ala tulan alem batung Kristus, ja ikam jadi' anun ji kelunan aleng ha' béh la'an, iha' tih ketanun Na' aleng hu'uh en Allah ju men hang kelunan matei, ja itam musang bua-bua men Allah. 5#Rom 6:21 Avin alem itam murip ngioh barik usun tana tua, kivah tam aleng sala aleng nei ngelating avin tebara menuna' atih, kivah atih nyadui alem kelawei tam, musang bua-bua men patei. 6#Rom 6:2,4; 8:1,2 Bi kerei inih itam hu'uh takau men tebara menuna' atih, avin itam uh matei té' ket atih aleng uh ngaput itam, kerei inih pah itam ngioh alem urip maring, iha' tih alem belua', nusi' ha' awi ngioh surat tua awi aleng menuna'.
7 #
Us 20:14,17; Kel d M 5:18,21 Nun kah kurin tam kerei inih? Tebara menuna' atih sala iah? Peletu-letu nusi'. Bi awi ha' em té' tebara menuna' atih, nusi' nah akui jam sala. Awi ha' em té' tebara menuna' atih kuma' “Meng im ngivah,” nusi' kui jam kivah atih seng sala. 8#Rom 5:13 Bi alem tebara atih uh té' nunan dih, nurei kah kuri-kuri na'an sala meté' na alem kenep kui ha'ut na'an kivah. Avin awi em té' tebara menuna', sala en ta' lo' sayu kah tua. 9Menuna' akui murip alem ha' em té' tebara, bi tegu tebara atih ateng, sala atih murip la'an, akui anih pah matei. 10#Lewi 18:5; Yak 1:15 Tebara atih aleng tekep geri pala urip, bi iha' pah nujo' patei tua men akui. 11#Ib 3:13 Bi alem tebara atih uh té', sala atih pah meté' lan peluvat akui, tebara atih dih uh té' nunan dih iha' pah lematei akui.
12 #
1 Tim 1:8
Tebara menuna' atih adang ha' ma'ang, dahin katuk na' pah ma'ang, teneng dahin sayu. 13#Rom 5:20 Avin ha' nutih, aleng sayu atih jadi' patei men akui iah? Peletu-letu nusi'. Bi ja ha' tula sala, sala atih pah menei patei atih men akui men ket aleng sayu, ja kenan tebara atih sala nei tula kelalau lalé' ji'ek na'.
Tingan sala té' alem barik kelunan
14 #
NDI 51:5; Yoh 3:6 Itam jam tebara menuna' atih men belua' pa'un na', bi akui anih té' alem barik batung, akui uh en belé' men sala. 15Avin ket aleng ek na, nusi' nah akui jam pelemana' na'. Avin nusi' ha' ket aleng kenep kui aleng ek na, bi ket aleng ngavak heléh, atih nah ek na. 16Bi alem akui em ngenep ket aleng ek na, akui meng'i tebara menuna' atih sayu. 17Avin ha' nunan kerei inih nusi' ha' akui aleng na ket atih la'an, bi sala aleng melo' alem kui pah alen na na'. 18#Ar Kel 6:5; 8:21 Avin akui jam ji-ji ket aleng sayu pah em té' melo' alem kenep kui, iha' tih alem batung kui aleng men usun tana anih. Avin kenep kui ngenep, bi nusi' kui na na'. 19Avin ket aleng sayu aleng kenep kui, nusi' kui na na', bi aleng ji'ek aleng em kenep kui, beka' ek na kah. 20Bi alem akui em ngenep na ket aleng ek na, nusi' ha' akui aleng na ket atih, bi sala aleng melo' alem kui atih aleng na na'.
21Avin ha' nunan, uh tula nah ji kaput té' akui, iha' tih tegu akui ngenep na sayu, ji'ek atih té' dahik. 22Alem kenep kui lan akui kelu tebara Allah, 23#Gal 5:17; Yak 4:1; 1 Pet 2:11 bi alem kelawei kui akui jam té' ji tebara aleng dep aleng kebiteng dahin tebara aleng té' té' alem kenep kui atih. Tebara aleng dep atih geri akui salut kenan sala aleng alem kelawei kui. 24Katé' lelan nah kenep kui! Hi kah aleng seng deng makau akui men batung aleng geri akui matei anih? 25#1 Kor 15:57 Akui meju aran Allah, kenan Yesus Kristus Tuhan tam! Avin anan, akui uh jadi' panyin tebara Allah alem kenep kui, bi alem barik usun tana anih akui dipen sala.
Currently Selected:
ROMA 7: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
