ROMA 6
6
Pebet men sala avin Yesus Kristus
1 #
Rom 3:5-8
Avin ha' nutih seng nun aleng dahun tam la'an? Tekep tam pa'en na sala ja asi Allah atih nei pi'at-pi'at iah? 2#1 Pet 4:1 Peletu-letu nusi'. Itam anih aleng hu'uh matei musang men sala, seng nuno' itam seng murip halem na' loh? 3#Gal 3:27 Nusi' kah ikam hituk kuri-kuri kahum kam aleng hu'uh duh halem Kristus Yesus atih hu'uh duh té' alem patei Na'? 4#Kol 2:12; 1 Pet 3:21 Nunan pah itam uh tanem dahin Na' alem duh tam alem patei atih, ja piah awi Kristus hu'uh en Allah ju men patei alem aren Taman Na', nunan pah lahuh itam anih pah deng murip alem urip aleng maring.
5 #
Fil 3:10-11
Iha' itam hu'uh jadi' ji dahin Na' alem patei aleng piah awi patei Na', nunan pah lahuh itam jadi' ji dahin Na' alem itam piah-piah nei peju dahin Na'. 6#Gal 5:24 Avin itam jam marung anih, barik tam aleng una' hu'uh selepang dahin Na' ja batung aleng sala atih tasa', ja meng nah itam dipen sala loh, 7#1 Pet 4:1 avin kelunan aleng uh matei atih hu'uh pebet men sala. 8Bi iha' itam uh matei dahin Kristus, itam nginah itam seng murip dahin Na' lahuh. 9Itam jam Kristus hu'uh en Allah ju men hang kelunan aleng matei, nusi' pah Iha' matei la'an, patei atih pah nusi' té' tingan ujung Na' la'an. 10#Gal 2:19; Ib 9:26-28; 1 Pet 3:18 Avin alem Iha' matei matei nah Iha' té' sala ji hangun tua, alem Iha' murip pah Iha' murip men Allah. 11#2 Kor 5:15; 1 Pet 2:24 Nunan pah lahuh tekep nah ikam itung batung kam uh matei té' sala, bi murip men Allah alem Kristus Yesus.
12 #
Ar Kel 4:7
Avin atih, meng sala gem alem batung kam aleng seng matei anih, na ikam ngioh kivah na', 13#Rom 12:1; Ef 2:15; 5:14 dahin meng kam ma'uk kelawei kam men sala jadi' uvung hadui aleng em teneng, bi uk nah batung kam men Allah awi jam tuk kelunan aleng uh matei nei murip nekulah, dahin ma'uk kelawei kam men Allah jadi' uvung barik aleng teneng. 14#1 Yoh 3:6 Avin sala atih nusi' ha' ningan té' ujung kam la'an, avin nusi' kam alem tebara menuna' la'an, bi ikam uh alem asi nah anih.
15 #
Rom 5:17,21 Nuno' tuk? Seng tei tam na sala la'an iah avin itam em alem tebara menuna', avin itam uh alem asi nunih? Peletu-letu nusi'. 16Nusi' kah ikam jam, kelunan aleng ngavan kam ma'uk batung kam jadi' dipen na' dahin ngioh iha', dipen na' nah ikam anan, ngioh tua kam. Daho' anih teneng marung sala aleng geri pala patei dahin marung barik aleng ngioh aleng geri pala teneng lahuh. 17Bi ju nah aran Allah, ikam uh dipen sala men'a, bi kerei inih ikam uh ngioh lim-lim tebara aleng en daha' katuk atih dahin lelan kenep kam, 18#Yoh 8:22 avin ikam uh takau men sala, ikam uh jadi' panyin barik aleng teneng. 19Akui ngatah ngioh barik tam kelunan avin lema barik batung kam. Avin piah awi jam tuk menuna' ikam ma'uk kelawei kam jadi' dipen ket aleng masep dahin aleng nyelalang ja na hadui aleng nyelalang, nunan pah lahuh kerei inih sayu nah ikam ma'uk kelawei kam jadi' panyin barik aleng teneng, aleng na ikam murip telesen.
20Avin alem ikam dipen sala, nusi' nah ikam alem barik aleng teneng. 21#Yehez 16:16,63; Rom 8:6,13 Nun kah bua na' kelan kam té' iha'? Ket aleng ngavan kam ha'éh tua anan kerei inih. Ka'uh ket atih patei. 22#1 Pet 1:9 Bi kerei inih ikam uh takau men sala dahin uh jadi' panyin men Allah, bua-bua kam kerei inih geri ikam pala aleng ma'ang, dahin aleng ka'uh na' iha' tih urip aleng pa'en. 23#Rom 5:12 Avin tibah sala iha' nah patei, bi ket aleng en Allah ih tua, iha' tih urip aleng pa'en té' alem Tuhan tam Yesus Kristus.
Currently Selected:
ROMA 6: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
