ROMA 5
5
Bua-bua barik teneng aleng men kinah
1 #
Yes 53:5; Rom 3:24,28; 4:24 Avin ha' nunan, avin itam uh en Allah itung teneng kenan kinah, uh dena' nah itam dahin Na' avin Tuhan tam Yesus Kristus, 2#Rom 3:23; Ef 3:12 aleng ngavan tam uh nei murip halem asi atih. Sayu itam melu alem itam nginah seng ala tulan alem aren Allah. 3#Yak 1:2-3; 1 Pet 1:5-7 Bi nusi' ha' atih tua, bi sayu itam melu alem katé' tam, avin itam jam katé' atih aleng pela'ung aru kenep; 4aru kenep atih pela'ung barik, dahin barik aleng uh la'ung atih pela'ung kinah, 5#NDI 22:5; 25:20; Ib 6:18-19 kinah atih pah nusi' ha' avan ta' ha'éh, avin halam Allah uh en Na' urah té' alem kenep tam kenan Belua Ma'ang aleng Na' nei men itam.
6Avin tegu jaka' na', alem itam lema loh, Kristus matei men itam kelunan aleng muau Allah. 7Avin mijat lan kelunan ngenep matei avin kelunan aleng teneng, mina avin kelunan aleng sayu mina té' kah kelunan aleng makang matei. 8#Yoh 3:16; 1 Yoh 4:10 Bi Allah bara halam Na' men itam, iha' tih alem itam kelunan sala loh Kristus matei men itam. 9#Rom 1:18; 2:5,8 Kerei inih itam uh en Allah itung teneng kenan daha Na', lalau lan pah la'an itam seng en Na' pekurip men unget Allah. 10#Rom 8:7 Ket bunu Allah itam nih, bi alem itam bunu Allah loh, itam uh en Allah na sayu dahin Na' avin patei Anak Na' atih. Lalau lan pah la'an alem itam uh sayu dahin Na' nunih, itam seng ala urip kenan urip Na'. 11Nusi' pah ha' nunan tua, bi itam pah melu la'an alem Allah alem Tuhan tam Yesus Kristus aleng ngavan tam uh ala sayu dahin Allah anih.
Pelemana': sala dahin patei nei men Adam, asi dahin urip nei men Kristus
12 #
Ar Kel 2:17; 3:6,19; Rom 6:23 Avin sala uh nei ha' usun tana anih kenan ji la'ung, kenan sala atih pah patei té', patei atih pah mepuk té' ujung lim kelunan, avin lim daha' uh na sala. 13#Rom 4:15 Avin jarun tebara menuna' atih em payan té', sala hu'uh té' alem usun tana, bi men em payan té' tebara, nusi' nah Allah pelemana' sala atih. 14#1 Kor 15:21-22,45,55 Bi patei atih gem daha' men urip Adam ateng urip Musa, ateng urip daha' aleng em na sala piah awi sala Adam pah lahuh. Adam atih itung ji katah marung Yesus aleng seng ateng atih.
15Bi ket aleng en Allah ih atih, nusi' ha' piah awi selalang Adam tih. Avin lim kelunan uh matei kenan sala na', bi huwi-huwi men'uh anna pah asi Allah nei nyungei men lim kelunan kenan asi ji la'ung aleng en Na' uk atih, Iha' atih Yesus Kristus. 16Ket en Na' uk tua atih nusi' ha' piah awi bua sala ji kelunan atih, avin ukum ji sala atih geri tasa', bi ket en Na' uk tua avin sala kahum atih ma'uk kenep aleng en Na' itung teneng. 17Avin kenan sala ji kelunan patei pah uh gem kelunan lim kenan ji kelunan atih, lalau lan pah kenan ji la'ung, iha' tih Yesus Kristus, daha' aleng ala asi Allah aleng kelalau atih dahin teneng Na' aleng en Na' ih tua atih, seng gem té' alem urip.
18 #
1 Kor 15:22
Avin atih, piah awi ji sala geri daha' lim tasa', nunan pah lahuh kenan ji hadui aleng teneng Allah itung kelunan lim uh teneng ja daha' deng ala urip. 19#Yes 53:11 Avin piah awi uau ji kelunan na kelunan kahum na sala, nunan pah lahuh avin ji kelunan ngioh daho', kelunan aleng kahum atih seng en Allah na teneng.
20 #
Rom 4:15; 7:8; Gal 3:19 Tebara menuna' nei pi'at ja sala pah sa'-sa' pi'at, bi hino' avan sala pi'at, hinan pah asi Allah sa'-sa' pi'at lahuh, 21#Rom 6:23 ja piah awi sala atih gem alem patei, nunan pah lahuh asi deng gem kenan teneng, atih pah geri urip aleng pa'en kenan Yesus Kristus Tuhan tam.
Currently Selected:
ROMA 5: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
