ROMA 1
1
Atoh na': iha' bara tabi' na'
1 #
HST 9:15; 13:2; Gal 1:15 Surat anih nei men Paulus, panyin Yesus Kristus, aleng hu'uh en Na' uvui jadi' sihu, dahin uh en Na' telesen ja pedengah dengah sayu aleng nei men Allah. 2#Rom 16:25-26; Tit 1:2 Dengah sayu atih uh en Na' jaji men menuna' men ba daha' nabi Na' alem surat Na' aleng ma'ang. 3#2 Sam 7:12; Mat 22:24; Rom 9:5; 2 Tim 2:8 Dengah atih marung tuk Anak Na', aleng uh nei alem batung aleng uh kanak men pahu Daud, 4#HST 13:33 bi marung tuk Beluan Na' aleng ma'ang Iha' uh tula Iha' Anak Allah alem tingan alem Iha' nei peju murip men hang kelunan matei, iha' tih Tuhan tam Yesus Kristus. 5#HST 26:16-18; Rom 15:18; Gal 2:7-9 Kenan Na' nah kalo' uh ala asi dahin hadui sihu Tuhan anih, ja kalo' geri kelunan men hang lim na'an kelunan nei ngioh Tuhan avin daha' nginah té' aran Na'. 6Ikam pah té' dahin daha' anih lahuh, aleng hu'uh en Na' uvui jadi' ketanun Yesus Kristus.
7 #
Kah d Is 6:25-26; 1 Kor 1:1; Ef 1:1 Men lim kam aleng ha' daléh Roma aleng en Allah nyalam, dahin aleng uh en Na' uvui jadi' anak Tuhan, sayu nah asi dahin dena' nei ha' ikam, aleng nei men Allah Taman tam, dahin men Tuhan Yesus Kristus.
Paulus ngenep bara dengah sayu ha' Roma
8 #
Rom 16:19; 1 Tes 1:8 Aleng una', alem Yesus Kristus akui bara sayu kenep men Allah kui marung ikam lim, avin kinah kam uh en daha' pedengah té' ji usun tana anih. 9#Ef 1:16; Fil 1:8 Akui nyadui menangen lan kenep kui men Allah pedengah Anak Na', Allah pah aleng bara marung akui em tei ketapah bara aran kam alem sebayang kui. 10#HST 19:21; Rom 15:23,32 Pa'en akui akei, awi ha' kenep Allah lan, Iha' na ji alan ngavak salet nei ateng ha' ikam. 11#HST 28:31 Avin akui liveng ngenep nyineng ikam, ja akui deng ma'uk men ikam ket aleng men Belua' Ma'ang, ja ikam nei tageng; 12#2 Pet 1:1 aleng lan na', ja kenep kui nei tangen kenan kam, itam piah-piah nei tangen kenan kinah, iha' tih kinah kam dahin kinah kui.
13 #
HST 19:21; Yoh 15:16 Nusi' kui ngenep ikam em jam, u kelo' harik, kuri-kuri hangun akui uh petneng seng nei ateng ha' ikam, bi ateng kerei inih akui pa'en sa'eng; akui ngenep nei atih ja akui nyineng bua-bua té' hang kam lahuh, awi ita' nyineng bua té' hang lim daha' bengsa' ha' béh tih. 14Té' utang kui té' daha' Gerika, nurei pah té' daha' bengsa' ha' béh, té' kelunan aleng nyemugen, nurei pah té' kelunan aleng em nyemugen. 15Iha' kah tavit na' akui tangen lelan kenep kui ngenep mutat dengah sayu men ikam aleng ha' Rum nih lahuh.
Dengah sayu atih nah ji tingan Allah men ha'ut la'ung aleng nginah
16 #
NDI 119:46; Mk 8:38; HST 13:46; 1 Kor 1:18,24 Nusi' kui ha'éh bara dengah sayu atih, avin atih nah tingan Allah aleng ma'uk urip men ha'ut-ha'ut kelunan aleng nginah, aring-aring na' men kelunan Yahudi, nurei pah men kelunan Yunani lahuh. 17#Hab 2:4; Rom 3:21-22 Avin halem na' uh tula nah ji teneng Allah, pa'un na' men kinah, ateng na' pah kinah, awi aleng uh té' kalung, “Kelunan aleng teneng kenan kinah na' iha' seng murip.”
Unget Allah té' daha' aleng alem adet ha' béh
18 #
Yoh 16:9; 2 Tes 2:12 Avin unget Allah uh tula men Surga té' lim barik dahin selalang kelunan aleng muau Iha', avin daha' nasa' ket aleng teneng té' barik daha' aleng em teneng atih. 19#HST 14:15-17; 17:24-28 Avin ket aleng ngavan kelunan deng jam marung tuk Allah uh tula kah kitan daha', avin Allah uh petula na' men daha'. 20#Ay 12:7-9; NDI 19:1; Ib 11:3 Avin men aring kelengunan usun tana, lim-lim tuk Allah aleng em tula uh tula té' kelunan, iha' atih tingan Na' aleng pa'en dahin barik Na' aleng petula Iha' Allah, avin ha' tula men hadui Na', ja daha' em deng nyu'ei la'an. 21#Ef 4:17-18; K Tula 14:7 Avin lan pah daha' uh jam Allah, bi daha' em meju Iha' na Iha' maren jadi' Allah daha', daha' pah em bara sayu kenep lahuh men Iha', bi kenep daha' tei tung-tung tua, tei kelahoh lidem tua. 22#Yer 10:14; 1 Kor 1:20 Daha' kuma' daha' nyemugen, bi daha' tei palui, 23#Kel d M 4:15-19; NDI 106:20 daha' ngalui aren Allah aleng em deng tasa' atih, na hudo' aleng jam na' awi kelunan aleng tasa', dahin awi jam tuk manuk lahuh awi jam tuk tulan aleng pat kudek, dahin awi ket aleng nganap réh.
24 #
HST 14:16
Avin ha' nutih Allah mekoh daha' alem kivah kenep daha' tei halem asep, ateng daha' ngeji'ek batung daha' pedeng daha' dep. 25#Rom 9:5 Avin teneng aleng men Allah en daha' ngalui dahin daho' amoh, daha' meju dahin ngetalau ket aleng uh en Allah ngelengunan, pulang nusi' daha' meju Allah aleng ngelengunan na' atih, bi Iha' aleng tekep en tam ju pa'en-pa'en. Amin.
26Avin tavit atih nah Allah mekoh daha' tei alem kivah aleng kelalau ji'ek. Avin daha' doh ngalui adet aleng tekep men batung daha', ala adet aleng em tekep daha' na. 27#Lewi 18:22; 20:13; 1 Kor 6:9 Nunan pah lahuh daha' laké' melek adet aleng tekep dahin doh, dahin jadi' lasu alem kivah daha' té' ji dahin ji aleng ha' béh, laké' dahin laké' na hadui aleng em tekep loh, batung daha' kah aleng ala tibah aleng tekep men hadui aleng sala atih.
28Avin daha' atih em kaséh meng'i Allah, Allah pah mekoh daha' tua na kenep aleng kelalau em tekep atih dahin na hadui aleng em tekep. 29Daha' penu té' lim ket aleng em teneng, dahin ji'ek, dahin kivah, dahin ngenep nasa'; penu dahin i'en, lematei, dahin pano', peluvat, dahin peji'ek kelunan, pehivuk tung-tung, 30dahin nyakat daho', dahin heléh té' Allah, ji'ek buat, balang, meju batung daha' dep, na ugé' aleng ji'ek, muau hinan taman daha', 31em té' kenep nyemugen, em ngioh jaji, em nyalam awi barik kelunan, dahin em masi. 32Kitan kah daha' dahun Allah, aleng bara kelunan aleng na hadui nutih tekep daha' matei tua. Nusi' pah iha' deng anan tua hadui daha', bi sa' pah daha' seng peji dahin kelunan aleng na hadui kelesé' nutih lahuh.
Currently Selected:
ROMA 1: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
