HADUI DAHA' SIHU TUHAN 28
28
Paulus melo' ha' busang Malta jarun unya
1Tegu kamé' hu'uh murip, iha' nah kamé' jam aran busang atih Malta. 2#HST 27:3; 2 Kor 11:27 Kelunan sawih ha' busang anan pah nyamah lelan té' kamé', pelalau daha' pengu apui dahin ala kamé' lim, avin kamé' lalek usan dahin tunei. 3Bi tegu Paulus uh mepeng ji kepah kayo' dahin melo' na' té' ujung apui atih, musang nah ji nyipa' avin kenan lasu atih, pelalau ma'at dahin nekyung té' usu na'. 4Tegu kelunan alem busang atih nyineng nyipa' atih nekyung té' usu na', daha' atih pah kuma' pedeng daha', “Adang kelunan anih hu'uh lematei kelunan. Lan pah iha' hu'uh takau men banget, bi To' aleng Nyulei itam kelunan em mun iha' murip.” 5#Mk 16:18 Bi Paulus ngetiwet nyipa' atih metei iha' alem apui, bi ji-ji pah iha' em jam henoh perah na'. 6#HST 14:11 En daha' kio' betung, en daha' kio' matei nah iha', beka' pa'en tengau tua ha' em té' nun-nun tusah na' kitan daha', beka' en daha' lo' kelunan dayung hedéh nah Paulus tih.
7Jeleng ngavan amé' tinan té' nah tana ji laké', laké' anan aleng kelunan aya' alem busang anan, aran na' Publius. Lun nei nah iha' nepa' kamé' dahin ala kamé' melo' alem uma' na' alem dara' telo' dau, nyamah lelan pah iha' té' kamé'. 8Té' pah taman Publius nan miri larem dahin perah butit bela. Tei nah Paulus halem pala iha', pelalau sebayang dahin metei usu na' té' ujung na', petagéh iha'. 9Men'uh anan nei nah daha' aleng té' perah alem busang anan pala iha', pelalau en na' petagéh nah daha' kelunan anan lahuh. 10Nusi' beloh-beloh amat daha' té' kamé' dahin mahek kamé', tegu kamé' seng leka' pah, en daha' petmei nah kuri-kuri ket aleng sayu nguyo' amé'.
Paulus tei ha' daléh Roma
11Telo' bulan men'uh anan leka' nah kamé' men inan tei halem ji kapen aleng nei men Aleksandria, kapen anan nyangei tinan jarun unya. Aran kapen anan Dioskuri, aleng alem daho' atih, Anak Papin. 12Lun ateng nah kamé' ha' Sirakusa, tinah nah kamé' nyangei telo' dau dara na', 13men inan kamé' panau nevei bahé' ateng ha' Regium. Dau malah ji nei nah dih aleng men pedah ta'o matan dau pa'un, dau malah ji nah la'an ké' ateng nah kamé' ha' Putioli. 14Tinan nah kamé' pepsuk dahin daha' harin tam aleng nginah, en daha' anan eng nah kamé' tinan tusu dau dara na'. Leka' nah kamé' tinan iha' nah kamé' ateng ha' Roma. 15Tegu daha' harin tam hinan kelenghi dengah kamé' uh ateng, nei nah daha' jam kamé' té' uma jaja' Apius dahin ha' Kedei Telo' nah kamé' pejam. Tegu Paulus nyineng daha' atih pelalau ha' bara sayu kenep men Allah, pelalau panah nah kenep na'.
Paulus ha' Roma
16 #
HST 27:3
Tegu kamé' tei ateng alem daléh Roma, en kepala' seladu koh nah Paulus melo' dep dahin ji seladu aleng jaga iha'. 17#HST 23:1 Men'uh telo' dau en Paulus uvui nah lim daha' kelunan aya' daha' Yahudi pepeng. Tegu daha' atih hu'uh pepeng, iha' ha' kuma' men daha', “U kelo' harik, lan pah akui em na ket nun-nun aleng nyura' pahu tam dahin adet sepun tam menuna', bi akui uh en daha' jin nunih, akui en daha' ala ha' Yerusalem, en daha' uk alem usu daha' Roma. 18Tegu daha' uh ngetneng akui, iha' nah daha' ngenep makau akui avin ji-ji pah em té' sala kui aleng tekep ngavak ga' ukum patei. 19#HST 25:11 Bi tegu daha' Yahudi nyakat daho' atih, iha' nah akui peden akei nei ha' unan Kaisar, bi nusi' kui ngenep lawan daha' bengsa' kui. 20#HST 26:6-7 Atih nah tavit na' akui mavéh ikam nei, ja akui jam ikam dahin tengaran-tengaran dahin kam; avin ha' tavit kinah tam pahu Israel kah akui ga' kaput té' avit anih nih.” 21Lun ken daha' men iha', “Nusi' té' kamé' ala surat nei men Yudea bara marung tuk ika', nusi' pah té' daha' harin tam aleng petira nun-nun ji'ek ka' lahuh. 22#Lk 2:34; HST 24:14 Bi kamé', ngenep lan pah kamé' kelenghi nuno' tuk aleng kenep ka', bi marung tuk katuk aleng nei nyelet nunih uh kitan amé' nah, daha' hino'-hino' pah aleng uh peji'ek na' lahuh.”
23Pelalau daha' petneng nah ji dau men Paulus, té' dau anan nah daha' kelalau kahum nei pepeng ha' ngavan na' nyakei atih. En na petira nah keligem Allah men daha' dahin petira teneng-teneng marung tuk Yesus, mejoh katuk Musa dahin daha' nabi lim. Iha' katuk daha' nunan men jihima ateng-ateng malem. 24Té' pah kelunan aleng menglan dahun na' alem iha' bara atih, té' pah aleng em nginah. 25Leka' nah daha' alem daha' em piah kenep. Iha' nah Paulus kuma' nunih men daha', “Teneng lelan kah aleng kurin Belua' Ma'ang men nabi Yesaya aleng en na' bara men daha' sepun tam dih, 26#Yes 6:9-10; Mat 13:14; Mk 4:12; Yoh 12:40 aleng nunih dahun na',
“Tei nah im ha' pahu anih, dahin kuma,
Lan ikam seng kelenghi, bi nusi' kam seng ateng té' alem na',
lan ikam seng nyineng, bi nusi' kam seng jam.
27Avin kenep daha' pahu anih uh sa' mahing tua,
iling daha' pah bahat kelenghi,
dahin matan daha' hu'uh daha' seperem,
bahi daha' nyineng té' matan daha',
dahin kelenghi té' iling daha',
bahi kenep daha' ateng té' alem na',
dahin ngelisah la'an,
ateng Akui pah petagéh daha'.’
28 #
NDI 67:2; 98:3; Lk 3:6; HST 13:46 Avin anan, sayu kelo' teneng té' daho' anih, urip aleng men Allah anih uh Na' nei ha' daha' kelunan bengsa' ha' béh, daha' atih pah seng kelenghi na'.” 29Tegu Paulus uh nengaran nutih, uli nah daha' Yahudi atih dahin pesekdep tua nah kenep daha' tengaran pedeng daha'.
30Paulus melo' alem uma aleng en na' siwa' dep atih dua' duman halum dara na', dahin ala lim kelunan aleng nei ateng jam iha'. 31#HST 1:3; 28:23 Iha' pah bara keligem Allah dahin katuk lim marung tuk Tuhan Yesus Kristus dahin hakéh kenep na', nusi' pah té' daha' aleng ma'eng iha'.
Currently Selected:
HADUI DAHA' SIHU TUHAN 28: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
