ROMA 2
2
Unget Allah té' daha' Yahudi: daha' em deng nyu'ei la'an
1 #
Mat 7:1-2; Lk 6:37; Yoh 8:7 Avin atih, ika' em deng nyu'ei la'an, u hi-hi kelunan aleng pesala kelunan. Avin alem daho' ngavam pesala kelunan ha' béh, ika' pesala batung ka' dep, im pesala kelunan nutih ké', bi batung ka' pah na ket atih lahuh. 2Itam pah jam Allah, ngioh aleng teneng kah Iha' mukum kelunan aleng na ket nutih. 3U kelunan aleng pesala kelunan aleng na nutih, ika' pah aleng na nutih lahuh, im ngio' seng takau ka' men ukum Allah iah? 4#2 Pet 3:15 Nuno', té' kah ika' nyelupoh daven aleng kelalau sayu atih, iha' tih kenep Na' aleng masi dahin kenep Na' aleng nengayet dahin aru kenep Na', nusi' pah ika' jam asi Allah atih geri ika' ngelisah kenep iah? 5Bi kenan mahing kenep ka' em kaséh nei ngelisah kenep, ika' melo' ukum atih men batung ka' dep men dau unget, iha' atih dau tegu ukum Allah aleng teneng atih seng nei tula. 6#NDI 62:13; Ivun 24:12; Mat 16:27; Yoh 5:29; 2 Kor 5:10 Iha' pah seng nyulei ma'uk ukum men ha'ut-ha'ut kelunan ngioh hadui daha'. 7Kelunan aleng aru kenep na hadui aleng sayu dahin ilau aren dahin hek dahin urip aleng em deng tei tasa', men kelunan atih Iha' seng ma'uk urip aleng pa'en. 8#2 Tes 1:8 Bi men kelunan aleng mahing kenep, aleng em ngioh aleng teneng, bi daha' ngioh ket aleng em teneng, seng nei unget dahin heléh, 9#Rom 1:16; 3:9 dahin tusah dahin katé' té' ujung ha'ut-ha'ut kelunan aleng na ji'ek nutih, aring-aring na' men kelunan Yahudi nurei men kelunan Gerika lahuh. 10Bi aren dahin hek dahin dena' kelan ha'ut la'ung aleng manau hadui aleng sayu, aring-aring na' men kelunan Yahudi nurei pah men kelunan Gerika lahuh.
11 #
Kel d M 10:17; HST 10:34; 1 Pet 1:17 Avin Allah, nusi' Ha' ngetuman kenep Na' té' kelunan. 12Avin kuri-kuri kelunan aleng uh na sala alem daha' em té' tebara menuna', daha' seng tasa' dahin em té' tebara menuna', dahin kuri-kuri kelunan aleng uh na sala alem daha' té' hida tebara menuna', daha' pah seng ga' ukum men tebara menuna'. 13#Mat 7:21; Yak 1:22,25; 1 Yoh 3:7 Avin nusi' ha' kelunan aleng kelenghi tua tebara menuna' aleng té' teneng ha' unan Allah, bi kelunan aleng ngioh tebara menuna', daha' nah aleng seng en Na' itung teneng. 14#HST 9:15; 13:2; Gal 1:15 Awi kelunan aleng alem adet ha' béh aleng em té' tebara menuna' na awi tebara menuna' atih avin adang barik daha' nunan, kelunan-kelunan atih té' tebara alem batung daha' dep, lan pah daha' em té' tebara menuna' atih. 15#Rom 1:32 Daha' petula hadui tebara menuna' uh kalung alem kenep daha'; henoh alem kenep daha' pah bara lahuh, kenep daha' pedeng daha' pah bara sala dahin teneng. 16#2 Tim 2:8 Tuk anan seng tula tegu dau Allah petneng kenan Yesus Kristus lim ket aleng sihuk alem kenep kelunan, awi kurin dengah sayu aleng ek petira anih.
Aleng kurang marung daha' Yahudi
17 #
Yak 2:19
Ika' kuma' ika' kelunan Yahudi dahin nginah té' tebara menuna', dahin melu alem Allah, 18#Fil 1:10 dahin jam kenep Na', dahin melu té' ket aleng sayu lan avin ika' uh pekalei té' tebara menuna'. 19#Mat 15:14; Lk 18:9 Ika' nginah batung ka' aleng mayak kelunan aleng buta', ika' aleng alah men daha' aleng alem lidem, 20#2 Tim 3:15 dahin katuk men daha' aleng palui, dahin guru men daha' nyam, avin alem tebara menuna' uh ha'ut lim daho' ngavam jam dahin ngavam teneng. 21#NDI 50:16-21; Mat 23:3-4 Avin ha' nunan, ika' aleng katuk daha' aleng ha' béh, nusi' ka' katuk batung ka' lahuh iah? Ika' aleng katuk meng nakau, nuno' batung ka' sikah? 22Ika' anih aleng nengaran meng kelunan petuyang, nuno' batung ka' sikah? Ika' anih aleng heléh té' hudo' en daha' ketalau, bi nuno' tuk marung ala ket men alem uma hudo' atih? 23Ika anih aleng melu alem tebara menuna' atih, beka' ika' muau Allah dahin nyelalang té' tebara menuna' atih iah? 24#Yes 52:5; Yehez 36:20 Avin aran Allah en kelunan peji'ek té' hang daha' kelunan aleng alem adet ha' béh avin ikam, awi aleng uh kalung.
25 #
Yer 4:4; 9:24-25 Sunat atih té' bang na' lahuh awi ika' ngioh tebara menuna', bi awi ika' nyelalang té' tebara menuna', sunat ka' atih uh jadi' em sunat. 26#Gal 5:6 Avin atih, awi kelunan aleng em sunat melo' lim katuk tebara menuna' atih, iha' aleng em sunat atih itung iha' uh sunat kah atih keta'? 27Ji pah lahuh, kelunan aleng em sunat alem batung awi iha' ha'ut ngioh tebara menuna', nusi' kah iha' seng pesala ika' aleng nyelalang té' tebara menuna' anan iah, lan pah ika' té' buhup dahin té' sunat? 28#Yoh 7:24; 15:8 Avin nusi' kelunan Yahudi seng kelunan Yahudi té' batung na' tua, dahin aleng lan sunat atih, nusi' ha' sunat té' batung tua. 29#Ar Kel 49:8; Kel d M 30:6; Kol 2:11 Bi Yahudi aleng lan atih, iha' nah Yahudi aleng halem kenep, dahin sunat aleng teneng atih, iha' nah sunat kenep, nusi' ha' ngioh daho' tua, bi alem belua'. Kelunan aleng nunih, bi nusi' ha' en kelunan hek, bi en Allah hek.
Currently Selected:
ROMA 2: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
