ARING KELESING 49
49
Yakub bara tuk-tuk urip dalo' anak na'
1Men'uh anan en Yakub uvui nah lim anak-anak na', dahin kuma' men dalo', “Nei nah kelo' anak kui ji'ek pepeng, akui seng bara men kelo' ket aleng seng nei té' kelo' baya.
2“Pepeng nah lim kelo' anak kui,
en kelo' kelenghi nah dahuk, Yakub aleng taman kelo' nih,
aleng en daha' kuma' Israel lahuh.
3“Ruben, ika' nah aleng anak una' kui,
anak tubak kui men alem kui ji'ek tu'a.
Ika' aleng tagep dahin aleng tu'a men lim kelo' aleng anak kui.
4Bi ika' aleng kelalau selanguk, em deng en ta' duan,
nusi' nah ika' hipun aran anak una' la'an,
avin ika' uh tei nyeliwei udu tamam,
tegu anan ika' uh tei alem tilung kui,
ika' uh tei demasep na' men akui!
5“Simeon dawa' Lewi peharin,
malat dawa' tua aleng kelanget dawa'.
6“Meng nah batung kui seng tei ngioh pakat dawa',
meng nah beluak seng peji dahin peng dawa',
avin alem hangan unget dawa' uh tei lematei kelunan,
kenan hagen dawa' tua dawa' meté tei ngetem uhat belakating sapi'.
7Mekji nah unget dawa'. Parit tua dawa',
avin unget dawa' nan, parit tua dawa',
avin kenep hitah dawa' aleng kelalau lalé' anan.
Akui seng petulan-petulan dawa' té' hang daha' anak-anak kui,
akui aleng Yakub nih,
dahin metat dawa' té' hang-hang tam kelunan Israel anih.
8“Yehuda, ika' aleng seng en dalo' harim hek,
usu ka' aleng seng mangen daha' aleng bunu-bunu ka',
dalo' anak kui aleng tamam anih seng nukem tua ha' unan ka'.
9 #
Kah d Is 24:9; K Tula 5:5 Yehuda aleng awi anak singa',
uh ka' nyekalat kelunan, ika' pah tei peju ha' ji ngavan aleng bau, u anak kui,
ika' ngelebeng dahin miri awi singa' dih,
hi aleng seng makang nei nigoh ika'?
10Lavung aren seng em tei pebet té' Yehuda,
tada' keligem na' pah seng em peletu pebet men alem sepakang na',
tuken-tuken iha' nei, iha' tih iha' aleng hipun na',
ketu-ketu bengsa' seng nyepida tua té' iha'.
11Iha' seng ngatung anak keledei na' té' iung agun,
Iha' tih té' iung agun aleng sayu.
Iha' pah seng mesup ket en na' té' té' ata' agun,
lan, basung na' en na' sup té' ata' agun atih.
12Matan na' bela kenan ata' agun,
ipen na' pah puti kenan ata' uso'.
13“Zebulon seng murip té' benghé' banget,
iha' aleng seng jadi' tenen ngavan kapen nyangei,
iha' seng pejekhang dahin Sidon.
14“Isakhar aleng awi keledei aleng lerung tua tulang na',
ngelileng té' hang dua' lagah ngavan udan na'.
15Tegu iha' nyineng ngavan kelarah atih sayu,
dahin daléh atih dena' sayu lahuh,
en na' hidah nah la'ip na' ngenep nyi'un na',
pelalau jadi' awi dipen tua ha'.
16“Té' pah Dan nih, iha' aleng seng petneng bengsa'-bengsa' na',
itung ji na'an pahu men hang pahu tam Israel nih.
17Dan seng jadi' awi jam tuk nyipa' aleng té' béh alan,
awi jam tuk nyipa' levetdah té' nuang alan
aleng nudek tumin guda',
ateng kelunan aleng té' hujung na' legak ha' tana.
18“Akui menga urip aleng nei men Ika' tua anih, u Tuhan.
19“Gad seng en daha' ayau nyerang,
bi iha' pah seng livoh daha' dahin meté' daha' lahuh.
20“Asyer, iha' seng huwi tua ket en na' kani,
iha' pah aleng na kanen aleng heling men laja'.
21“Naftali seng awi tela'uh aleng uh takau,
iha' seng nganak anak aleng kajau-kajau.
22“Yusuf seng awi iung bua aleng lengoh,
awi iung bua aleng té' béh ata' itung,
da'an-da'an na' pah nyelahup tua lalau-lalau kelahen na' atih.
23Lan pah daha' aleng pakei jelut atih
uh meté' langa' daha' dahin pehigum iha',
24bi nusi' jelut na' atih mun tei hapat peletu,
lengen na' pah aleng kelalau tu'a lahuh
kenan usu Laké' Aleng Kelalau Ningan,
aleng nyingau akui Yakub taman kelo' anih,
kenan Laké' Aleng Puboh akui aleng Ngalang Bato' Israel anih lahuh,
25Allah tamam anih aleng seng masi ika',
Allah Aleng Hipun Tingan aleng muak asi Na' men ika',
iha' tih asi aleng men langit atih,
dahin asi aleng awi ata' itung aleng nei men alem tana réh,
dahin muak asi Na' men ika',
nei pekatan anak-anak dahin sau-sau ka' lahuh.
26Asi aleng uh en tamam anih ala atih,
lalau sayu men'uh asi daha' sepui menuna' dih,
lalau sayu men'uh ngalang-ngalang aleng té' pa'en atih.
Lim ket sayu atih seng nei té' ujung kahung Yusuf,
iha' tih ujung apau kahung ka' aleng kelalau dengah men kelo' harim.
27“Benyamin iha' nah aleng awi lejau danum#49:27 LEJAU DANUM alem Bahasa Kebangsaan “serigala”, iha' tih awi ji na'an aso' aleng hatan, aleng murip alem uro'. aleng hatan,
tegu jihima ké' iha' ha' kani ket aleng kelan na',
levi dau ket aleng kelan na' atih loh kah en na' petulan.”
28Anan nah lim dalo' anak Israel anan, pulu-dua' la'ung kahum daha'. Nunan nah dahun para taman dalo' men dalo', tegu iha' nulan asi na' men dalo'. Ha'ut-ha'ut la'ung dalo' kah iha' ma'uk asi na' men dalo'. Pesekdep-pesekdep nah dahun na' men dalo', ngioh aleng tekep men dalo' ha'ut la'ung.
Patei Yakub dahin tanem na'
29Men'uh anan en Yakub nangen nah dalo', ken na', “Tegu akui tei uli peji dahin daha' pahu kui aleng uh lalau dih na'a, en kelo' tanem nah akui té' béh sepuk dalo' dih alem luvang bato' ha' luma' Efron, laké' pahu Het atih, 30#Ar Kel 23:3-20té' alem luvang bato' aleng ha' luma' Makhpela aleng men béh matan dau pa'un ha' Mamre, alem tana Kanaan, tana anan aleng en Abraham melé' té' Efron kelunan Het atih, ja ha' avan liang pahu tam pa'en en tam puboh. 31#Ar Kel 25:9-10; 35:29Hitih nah daha' nanem Abraham dawa' Sara, nurei pah Ishak dawa' Ribka hawan na' lahuh, 32hitih kah akui tei nanem Lea lahuh. Tana dahin luvang bato' anan uh en melé' té' daha' Het anan.” 33#HST 7:15 Tegu Yakub uh duan dalo' anak-anak na' anan, en na' jat lim nah kudek na' tei hujung pagen avan na' tudu anan, pelalau matei nah iha' ji'ek, tei uli nah iha' dahin daha' aleng pahu na'.
Currently Selected:
ARING KELESING 49: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
