ARING KELESING 50
50
1Yusuf ji'ek pah pelalau payah té' neng taman na' nan dih, nurei pah iha' ji'ek meté' nangih té' patei taman na', dahin meté' marek iha'. 2Men'uh anan en Yusuf duan nah daha' duktun aleng nyadui men iha' anan, nyihu daha' metei lapah-lapah aleng ubat na patei taman na' em butung, iha' nah duktun metei ubat-ubat anan té' patei Israel nan. 3Alem pat-pulu dau daha' na hadui anan, nunan nah dara dau daha' pelepek hadui daha' metei ubat-ubat na iha' em bu. Tusu-pulu dau dara daha' Mesir lumuh iha'.
4Tegu ha' uh lepek dau daha' lumuh iha' anan, kuma' nah Yusuf men daha', aleng huang alem uma laja' Firaun, “Iha' ikam nyalam té' akui ji'ek, tei nah bara Firaun, nunih dahun kelo' bara dahuk, 5#Ar Kel 47:29-31 ‘Tamak uh nyihu kui na jaji men iha', iha' kuma' nunih, “Akui nih jeleng seng matei nah anih. Tegu ka' nanem akui na'a, sayu im tei nanem akui ha' luvang aleng uh ek ngalé' ha' tana Kanaan dih,” ken na' dih. Avin anan en koh nah akui ji'ek tei hitih jaki, amei, ja akui tei nanem tamak ji'ek nih si', men'uh anan nei kah akui uli la'an hinih,’ ken kelo' bara men Firaun.
6Iha' nah Firaun kuma', “Tei nah im nanem tamam hitih jaki ké', awi jam tuk dahun na', uh nyihu ika' supah anan.”
7Iha' nah Yusuf ji'ek leka' tei nanem taman na' nan, nurei pah daha' aleng nyadui men Firaun lahuh tei dahin na'. 8Lim-lim daha' aleng dekaya' alem uma laja' aleng tei, nurei pah lim-lim daha' aleng dekaya' alem daléh Mesir, nurei pah lim-lim daha' aleng huang uma Yusuf lahuh, nurei pah lim-lim dalo' harin na', dahin daha' aleng huang uma taman na' lahuh. Ketu na' nah anak dalo' dahin kading, duba, sapi', dalo' en dalo' lek ha' tana Gosyen. 9Té' pah kelita' dahin daha' aleng pakei guda' pah tei dahin daha', kelalau bangu daha' tei dahin na'.
10Tegu daha' tei ateng ha' lepau Goren-Haatad ngavan daha' mahik parei, aleng dipah ji hungei Yordan atih, tinan nah dahun daha' dekaya' lelan nirau, Yusuf pah lumuh taman na anan tusu dau. 11Tegu kelunan daléh Kanaan atih kelenghi dahun daha' ha' lepau ha' Goren-Haatad atih, kuma' nah daha', “Katé' lelan nah kenep daha' Mesir anih.” En daha' na nah aran avan daha' nangih atih Abel-Mizraim, aleng ha' dipah ji Yordan atih.
12Dalo' anak-anak Yakub pah ngioh na ket aleng awi hu'en taman dalo' anan dih. 13#HST 7:16 Lim-lim anak na' anan tei geri iha' ha' tana Kanaan, tei nanem iha' alem luvang bato', ha' luma' Makhpela, aleng men béh matan dau pa'un ha' Mamre, tana aleng en Abraham melé' té' Efron daha' bengsa' Het atih, aleng tana avan tanem daha' pa'en. 14Hu'uh Yusuf nanem taman na', tei nah iha' uli ha' Mesir, dahin dalo' harin-harin na' lim, nurei pah lim-lim kelunan aleng dahin na' aleng tei nanem taman na' anan, lim-lim daha' pah tei uli.
Yusuf pehalau kenep dalo' harin-harin na'
15Tegu dalo' harin Yusuf pelemana' taman dalo' uh matei, kuma' nah dalo', “Mina heléh si' kenep Yusuf té' itam, ngenep en na' nyulei si' hadui telo' aleng ji'ek té' iha' arei dih na'a.” 16Iha' dalo' nyihu tei bara dahun dalo' atih men Yusuf, kuma', “Em payan tamei dih matei, iha' ha' na daho' nunih, 17‘Nunih dahun kelo' men Yusuf, “Im masi nah barik ji'ek alo' harim dahin sala kalo' ji'ek avin kalo' uh na ket aleng ji'ek dahim,” ’ ken na'. Kerei inih im masi nah kalo', meng im hituk té' sala kalo', aleng panyin Allah aleng Allah tamei.” Pelalau Yusuf nangih, tegu daha' bara daho' anan men iha'.
18Té' pah dalo' harin na' anan tei pala iha' la'an lahuh nga'um ha' unan na', kuma' men iha', “Kalo' nei anih ja kalo' nyam amin ka' tua nah anih.”
19Bi Yusuf kuma' men dalo', “Meng kelo' takut. Bareng si' akui aleng seng jadi' kalui Allah iah? 20Lan kah kelo' uh na hadui aleng ji'ek té' akui dih, bi Allah uh petneng na' ja Iha' na ket aleng sayu, iha' tih Iha' uh pekurip kuri-kuri la'ung kelunan pahu tam anih, aleng uh té' ateng dau anih. 21Avin anan meng nah takut, adang kui ma'uk ket en kelo' kani, dahin ma'uk kanen men anak kelo' lahuh.” Nunan nah tuk iha' pehalau kenep dalo' harin na' dahin pedena' kenep dalo'.
Yusuf matei
22Yusuf pa'en murip ha' Mesir dahin dalo' panak-panak na'. Urip Yusuf ji atuh pulu duman. 23Bi Yusuf behi'a loh kah iha' té' sau-sau Efraim anak na' atih ateng tebin aleng ketlo', nurei pah anak Makhir aleng anak Manasye lahuh, aleng sau Manasye, ji anak na' atih. 24Ken Yusuf men dalo' harin na', “Nusi' dara la'an akui matei. Adang Allah seng hituk té' kelo', seng geri kelo' musang men daléh anih baya, tei ha' daléh aleng uh Na jaji dahin na supah men Abraham men Ishak dahin men Yakub.” 25#Us 13:19; Yos 24:32; Ib 11:22 Iha' nah Yusuf na supah men daha' anak-anak Israel lahuh, ken na' nunih, “Adang Allah seng hituk té' kelo', tegu anan en kelo' geri nah tulang-tulang kui men inih.” 26Men'uh anan dih matei nah Yusuf, tegu urip na' uh ji atuh pulu duman. Patei na' en daha' tei ubat-ubat aleng na ha' em butung, en dalo' lo' nah patei na' alem luyan ha' daléh Mesir.
Currently Selected:
ARING KELESING 50: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
