ARING KELESING 48

Yakub ma'uk asi men Efraim dahin Manasye

1Men'uh anan tei nah daha' bara men Yusuf, “perah tamam,” ken daha'. Pelalau tei nah iha' geri dawa' anak na', iha' tih Manasye dawa' Efraim. 2En daha' bara nah men Yakub, “Nan, Yusuf anak ka' dih uh nei ateng nah jam ika'.” Iha' nah Israel nengayet nei ngelungun. 3#Ar Kel 28:13-14Ken na' men Yusuf, “Allah Aleng Hipun Tingan nei petula batung Na' men akui ha' Lus alem tana Kanaan dih, Iha' muak asi Na' men akui, 4pelalau kuma' men akui, ‘Akui seng na anak ka' nei katan dahin na ikam nei-nei kahum, na ikam kuri-kuri na'an pahu. Akui seng ma'uk daléh anih men pahu ka', jadi' ketanun daha' en daha' sengayan pa'en-pa'en.’

5“Marung anak ka' aleng im nganak ha' daléh Mesir em payan kui ateng ha' Mesir anih dih, akui nah aleng hipun dawa'. Efraim dawa' Manasye anih awi jam tuk Ruben dawa' Simeon. 6Bi anak ka' aleng ngebaya dawa' anih, dalo' nah aleng itung anum, ga' aran pahu men ika', bi marung aran aleng hipun daven kelo', sayu ha' aran dawa' harin na' anih aleng ga' aran ala tulan men pahu kui. 7Tegu kui nei leka' men Padan, katé' nah kenep kui, tei matei nah Rahel hinam dih ha' tana Kanaan, té' iung alan, tegu telo' uh jeleng seng ateng ha' Efrata, ek tanem nah iha' té' béh alan aleng tei ha' Efrata tih, iha' tih Betlehem.” #Ar Kel 35:16-19

8Tegu Israel nyineng dawa' anak Yusuf, iha' ha' meteng, “Hi aleng anih du?”

9Iha' nah Yusuf nyu'ei taman na', “Anih nah anak kui aleng en Allah uk men akui hinih.” Iha' nah Yakub kuma', “Im nei nah dawa' jeleng béh akui ja kui sebayang men dawa' si.” 10Té' pah matan Israel uh mabah tua nah avin iha' uk muku, nusi' nah iha' ji'ek jam nyineng la'an. Iha' nah Yusuf metei dawa' anak na' anan té' béh taman na', pelalau ha' ji'ek marek dawa' dahin ngelameng dawa' harin na' nan dih. 11Pelalau Israel kuma' men Yusuf, “Nusi' nah peletu kui kuma' akui seng nei jam neng ka' ji'ek la'an ni dih, bi kerei nih lan Allah uh masi akui, ateng kui behi'a nyineng anak ka' lahuh.” 12Men'uh anan en Yusuf ala nah dawa' anak na' men sepakang sepun dawa' nan, pelalau ha' nyepukun nukem tei ateng ha' tana.

13Uh anan en Yusuf gem nah dawa' anak na' atih, metei dawa' ha' unan laké' aya' Israel taman na' atih. Usu Yusuf bah ta'o gem Efraim tih, men bah ulei Israel sepun dawa' tih, usu Yusuf bah ulei aleng gem Manasye, men bah ta'o sepun dawa' Israel tih, en na' tei nah dawa' anak na' nan jeleng iha'. 14Bi Israel metei usu na' aleng bah ta'o té' ujung kahung Efraim, bi Efraim aleng da'uk men dawa'. Té' usu na' aleng bah ulei iha' gem kahung Manasye. Pehawin nah lun usu na', avin iha' metei usu ulei na' ujung Manasye, bi iha' tih aleng dekaya' men dawa'. 15Men'uh anan iha' nah iha' sebayang men Yusuf, ken na',

“U Allah aleng Allah sepuk

Abraham dawa' Ishak tamak,

dawa' pah uh murip ha' unan ka',

Ika' pah aleng Allah kui aleng puboh

akui ateng kerei inih.

16Meliket aleng uh makau akui men

lim-lim tusah, sayu nah Im masi

dawa' nyam anih.

Sayu nah aran kui dahin aran sepuk

Abraham nurei pa aran Ishak

aleng tamak, nei tula dengah alo' kenan dawa',

ateng dawa' nei kapan jadi' ji pahu

aleng dekaya' té' usun tana anih.”

17Tegu Yusuf nyineng taman na' metei usu na' té' ujung kahung Efraim, nusi' ha' ngenep iha' nutih, pelalau ha' ala usu taman na' men ujung kahung Efraim seng metei na' ujung kahung Manasye. 18Ken na' men taman na', “Nusi' ha' nunan, amei, té' ujung kahung ji anih im metei usu ka', avin anih aleng una' men dawa' dih.”

19Bi taman na' em mun, ken na', “U, jam kah akui anak, jam kah akui, iha' nih lahuh seng jadi' ji pahu, iha' pah seng jadi' dekaya' tingan na'. Bi lan pah iha' nunan, harin na' aleng da'uk anih seng jadi' dekaya' ugé' na' men'uh iha' aleng dekaya', dahin iha' aleng da'uk anih pah seng jadi' kuri-kuri bengsa'.”

20 # Ib 11:21 Pelalau nah iha' sebayang men dawa' tegu anan, ken na' men dawa',

“Daha' pahu Israel seng metut aran

kua' tegu daha' sebayang, ken daha' na'a,

‘Sayu nah Allah na ikam awi Efaim

dahin awi Manasye.” ’

Nunan nah iha' na Efraim itung una' men'uh Manasye.

21Men'uh anan kuma' nah Israel men Yusuf, “Akui seng tei matei nah anih, bi Allah seng té' dahin kam dahin seng geri ikam uli pala' daléh sepun tam nekulah. 22Kerei inih akui ma'uk tulan tana ka' lalau men'uh anun harim dalo', iha' tih ji tana tekayak aleng uh ek hilé' pakei malat dahin jelut té' daha' Amori arei dih.”

Currently Selected:

ARING KELESING 48: TDK1990

Highlight

Copy

Compare